Агар энг бахтли инсон бўлишни истасангиз

Доктор Муҳаммад Ротиб Нобулусий ёзади:

“Агар инсонларнинг энг бахтлиси бўлишни истасангиз, одамларни хурсанд қилинг, уларнинг қалбига шодлик улашинг. Шунда сиз ҳам бахтли бўласиз. Зеро, Роббимизнинг гўзал исмларидан бири “Аш-Шакур” яъни кўп шукр қилувчи бўлиб, У Зот қилинган битта яхшиликка ўнтадан етти юз баробаргача, ҳаттоки ундан кўпроқ ҳам савоб беради.

Инсонларга, ҳайвонот ва наботот оламига қанчалик кўп яхшилик қилсангиз, шунча ўзингизни бахтли ҳис қиласиз. Айниқса, бир қийналган оилага яхшилик қилсангиз, оила аъзоларининг, айниқса ёш болакайларнинг табассуми сизни қанчалик хурсанд қилади.

Бир кам таъминланган оилани биламан. Оила бошлиғи – ота оғир бетоб эди. Юрагини операция қилиш учун катта маблағ талаб қиларди. Ҳар гал уни кўргани уйига борар эканман, оила аъзоларининг ғам-қайғуга ботгани, жажжи болажонларнинг маюс кўзларига гувоҳ бўлардим.

Бир бадавлат одам муолажа пулини тўлаб берди. Муолажа яхши ўтди, оила бошлиғи соғайиб кетди. Зиёрат қилгани борсам, уйдаги ҳолат буткул бошқача, айниқса, болажонлар ниҳоятда хурсанд ва қувноқ эди. Буни кўриб кўзларим қувнаб кетди.

Одамларнинг оғирини енгил қилувчи, уларга далда бўлиб, уларнинг қалбига хурсандчилик киритадиганларнинг Аллоҳ таолонинг ҳузурида мартабаси баланддир.

Агар энг бахтли инсон бўлишни истасангиз, одамларнинг қалбига хурсандчилик киритинг. Шунда Аллоҳ таоло ҳам сизни хурсанд этади. Зеро, Роббимиз – Аш-Шакурдир.

Унутмангки, бахт – мол-дунёнинг кўплигида эмас. Бахт – Аллоҳ билан бўлган алоқангиздир.

Дўстларимдан бири ўзига гувоҳ бўлган ушбу воқеани сўзлаб берган эди. Хизмат сафари билан хориждан ярим кечаси соат 12 ларда уйга қайтар эканман, йўл чеккасида боласини кўтариб йиғлаб ўтирган аёлга кўзим тушди. Уларга яқин бориб, нима бўлгани ҳақида суриштирдим. Аёл фарзанди беморлиги, иситмаси 42га кўтарилганини, турмуш ўртоғи вафот этгани ва яқин таниши йўқ мусофир экани ҳақида айтди. Имкон қадар ёрдам бердим. Бир касалхонадан бошқа шифохонага олиб бордим, бир қанча дорихоналарга югурдим. Ниҳоят болакайнинг иссиғи тушди. Соат эрталабги 5 бўлганди. Бир қийналган одамга ёрдам берганимдан ўзимни ниҳоятда бахтли ҳис қилдим. Гўёки жаннатда юргандек бўлдим.

Абдуллоҳ ибн Аббос розияллоҳу анҳу Расулуллоҳ соллаллоҳу алайҳи васалламнинг масжидларида эътикофда ўтирардилар. Кўзлари бир тушкунликка тушган кишига тушди. Унинг олдига бориб: “Нега маҳзун кўринасиз?” деб сўрадилар.

У: “Қарзларим кўпайиб кетди, қайтаришга маблағим йўқ, шуни ўйлаб ғамга ботдим”, деди. Абдуллоҳ ибн Аббос розияллоҳу анҳу: “Мен қарз берган одам билан сенга муҳлат беришини сўраб гаплашиб кўрайми?” дедилар. Ҳалиги киши бошини қимирлатиб, розилик билдирди.

Абдуллоҳ ибн Аббос розияллоҳу анҳу дарҳол ўринларидан туриб, ташқарига чиқдилар. Одамлар: “Эй, ибн Аббос эътикоф ўтирганингиз ёдингиздан чиқдими?” дедилар.

Абдуллоҳ ибн Аббос розияллоҳу анҳу: “Йўқ асло унутмадим. Лекин Аллоҳга қасамки бир биродаримнинг ҳожатини осон қилиш, унинг қалбига хурсандчилик киритиш йўлида саъй-ҳаракат қилишим мен учун бир ойлик нафл рўза ва масжидда эътикоф ўтиришдан афзалдир”, дедидар”.

Даврон НУРМУҲАММАД

***

Bismillahir Rohmanir Rohiym

Doktor Muhammad Rotib Nobulusiy yozadi:

“Agar insonlarning eng baxtlisi bo‘lishni istasangiz, odamlarni xursand qiling, ularning qalbiga shodlik ulashing. Shunda siz ham baxtli bo‘lasiz. Zero, Robbimizning go‘zal ismlaridan biri “Ash-Shakur” ya’ni ko‘p shukr qiluvchi bo‘lib, U Zot qilingan bitta yaxshilikka o‘ntadan yetti yuz barobargacha, hattoki undan ko‘proq ham savob beradi.

Insonlarga, hayvonot va nabotot olamiga qanchalik ko‘p yaxshilik qilsangiz, shuncha o‘zingizni baxtli his qilasiz. Ayniqsa, bir qiynalgan oilaga yaxshilik qilsangiz, oila a’zolarining, ayniqsa yosh bolakaylarning tabassumi sizni qanchalik xursand qiladi.

Bir kam ta’minlangan oilani bilaman. Oila boshlig‘i – ota og‘ir betob edi. Yuragini operatsiya qilish uchun katta mablag‘ talab qilardi. Har gal uni ko‘rgani uyiga borar ekanman, oila a’zolarining g‘am-qayg‘uga botgani, jajji bolajonlarning mayus ko‘zlariga guvoh bo‘lardim.

Bir badavlat odam muolaja pulini to‘lab berdi. Muolaja yaxshi o‘tdi, oila boshlig‘i sog‘ayib ketdi. Ziyorat qilgani borsam, uydagi holat butkul boshqacha, ayniqsa, bolajonlar nihoyatda xursand va quvnoq edi. Buni ko‘rib ko‘zlarim quvnab ketdi.

Odamlarning og‘irini yengil qiluvchi, ularga dalda bo‘lib, ularning qalbiga xursandchilik kiritadiganlarning Alloh taoloning huzurida martabasi balanddir.

Agar eng baxtli inson bo‘lishni istasangiz, odamlarning qalbiga xursandchilik kiriting. Shunda Alloh taolo ham sizni xursand etadi. Zero, Robbimiz – Ash-Shakurdir.

Unutmangki, baxt – mol-dunyoning ko‘pligida emas. Baxt – Alloh bilan bo‘lgan aloqangizdir.

Do‘stlarimdan biri o‘ziga guvoh bo‘lgan ushbu voqeani so‘zlab bergan edi. Xizmat safari bilan xorijdan yarim kechasi soat 12 larda uyga qaytar ekanman, yo‘l chekkasida bolasini ko‘tarib yig‘lab o‘tirgan ayolga ko‘zim tushdi. Ularga yaqin borib, nima bo‘lgani haqida surishtirdim. Ayol farzandi bemorligi, isitmasi 42ga ko‘tarilganini, turmush o‘rtog‘i vafot etgani va yaqin tanishi yo‘q musofir ekani haqida aytdi. Imkon qadar yordam berdim. Bir kasalxonadan boshqa shifoxonaga olib bordim, bir qancha dorixonalarga yugurdim. Nihoyat bolakayning issig‘i tushdi. Soat ertalabgi 5 bo‘lgandi. Bir qiynalgan odamga yordam berganimdan o‘zimni nihoyatda baxtli his qildim. Go‘yoki jannatda yurgandek bo‘ldim.

Abdulloh ibn Abbos roziyallohu anhu Rasululloh sollallohu alayhi vasallamning masjidlarida e’tikofda o‘tirardilar. Ko‘zlari bir tushkunlikka tushgan kishiga tushdi. Uning oldiga borib: “Nega mahzun ko‘rinasiz?” deb so‘radilar.

U: “Qarzlarim ko‘payib ketdi, qaytarishga mablag‘im yo‘q, shuni o‘ylab g‘amga botdim”, dedi. Abdulloh ibn Abbos roziyallohu anhu: “Men qarz bergan odam bilan senga muhlat berishini so‘rab gaplashib ko‘raymi?” dedilar. Haligi kishi boshini qimirlatib, rozilik bildirdi.

Abdulloh ibn Abbos roziyallohu anhu darhol o‘rinlaridan turib, tashqariga chiqdilar. Odamlar: “Ey, ibn Abbos e’tikof o‘tirganingiz yodingizdan chiqdimi?” dedilar.

Abdulloh ibn Abbos roziyallohu anhu: “Yo‘q aslo unutmadim. Lekin Allohga qasamki bir birodarimning hojatini oson qilish, uning qalbiga xursandchilik kiritish yo‘lida sa’y-harakat qilishim men uchun bir oylik nafl ro‘za va masjidda e’tikof o‘tirishdan afzaldir”, dedidar”.

Davron NURMUHAMMAD