Бугун, 20 февраль куни Наманган вилоятидаги Султон Увайс Қараний зиёратгоҳи мажмуасининг тантанали очилиш маросими ва илмий конференцияси бошланди, – дея хабар бермоқда Ўзбекистон мусулмонлари идораси Матбуот хизмати. Анжуманда Ўзбекистон мусулмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Ахмедов ва Наманган вилояти ҳокими Шавкат Абдураззақов ҳамда 100 нафарга яқин маҳаллий ва хорижлик уламолар, соҳа мутахассислари иштирок этмоқда.
Анжуман Қуръони карим тиловати ва эзгу дуолари билан бошланди.
Сўзга чиққан нотиқлар сўнгги йилларда муҳтарам Президентимиз томонларидан амалга оширилган ислоҳотлар натижасида, хусусан, Наманган вилоятига ташрифлари чоғида берган тавсиялари туфайли вилоятда салмоқли ўзгаришлар ва янгиланишлар амалга оширилгани, ўтган вақт давомида Султон Увайс Қараний зиёратгоҳида кенг кўламли бунёдкорлик ишлари амалга оширилиб, мажмуа таркибидаги жоме масжид, мақбара, музей қайта таъмирланди, янги кутубхона ва меҳмонхона бунёд этилиб, ён-атроф обод этилганини алоҳида қайд қилдилар.
Анжуман иши давом этмоқда.
Фарғона бош имом-хатиби Убайдуллоҳ домла Абдуллаев ҳам айни вақтда анжуманда иштирок этмоқда.
