Ўзбекистон мусулмонлари идораси Фарғона вилояти вакиллигида шаҳар-туман бош имом-хатиблари иштирокида йиғилиш бўлиб ўтди. Йиғилишни вилоят бош имом-хатиби Убайдуллоҳ домла Абдуллаев олиб борди.
Унда шаҳар-туман бош имом-хатибларининг ҳисоботлари тингланди. Жумладан, Фурқат, Бешариқ ва Қува туманларида диний-маърифий соҳада имом-хатиблар томонидан амалга оширилаётган ишлар, мавжуд муаммолар ҳамда уларни ҳал этиш чоралари ҳақида тўхталинди.
Шунингдек, вилоят ҳокими ўринбосари Ж.Хатамов ҳам йиғилишда қатнашиб, тарғибот ва аксилтарғибот йўналишида қилинаётган ишларни янада жадаллаштириш ва очиқлик-шаффофликни таъминлаш мақсадида рақамли технологиялардан кенг фойдаланган ҳолда «Маънавий-маърифий ишлар базаси» иловаси ишга туширилгани, вилоятда фаолият юритаётган диний соҳа ходимлари, хусусан, имом-хатиблар ҳам ушбу иловадан кенг тарзда фойдаланаётганларини қайд этди. Шундай бўлсада ҳали етарлича камчиликлар ҳам мавжуд экани, уларни бартараф этишда имом-хатиблар ҳам янада фаол бўлишга чақирилди.
Маълумот учун, «Маънавий-маърифий ишлар базаси» иловасидан маънавий-маърифий соҳада фаолият олиб бораётган ходимлар фойдаланиб, унда бевосита ва билвосита равишда олиб борилаётган тарғибот ишларини шаффоф тарзда, ўз вақтида қайд этиб бориш ҳамда барча йўналишдаги тарғибот ишларини таҳлилини олиб боришни таъминлайди.
