Бугун, 27 сентябрь куни Фарғона вилояти бош имом-хатиби Убайдуллоҳ домла Абдуллаев Марғилон шаҳридаги “Саид Амир Хамза” жоме масжидига ташриф буюрдилар. Убайдуллоҳ домла, аввало, жамоат билан бирга пешин намозини адо этиб, сўнгра жамоатга маъруза қилдилар.
Маърузада юртимизда диний-маърифий соҳада амалга оширилаётган ишлар, имом-хатиблик мақоми ва масъулияти ҳамда уламолар қадри ҳақида сўз юритилди. Шунингдек, ташкилий масала ҳам кўриб чиқилди.
Узоқ йиллар давомида диний соҳада самарали фаолият олиб борган, Марғилон шаҳридаги “Саид Амир Хамза” жоме масжиди имом-хатиби Собиржон домла Норматов ўз хоҳишига кўра вазифасидан озод этилди.
У кишининг диний соҳага қўшган беқиёс ҳиссаси ва кўп йиллик хизматлари эътиборга олиниб, Ўзбекистон мусулмонлари идорасининг махсус буйруғига асосан “Фахрий имом” мақоми берилди. Буйруқ матни жамоатга ўқиб эшиттирилди.
Устоз Собиржон домланинг илм ва тажриба билан ўтган ҳаёти ҳамда олиб борган хизматлари юксак эътироф этилди. Шунингдек, келгусида ҳам янги авлод имомлари учун у кишининг ҳаётий тажрибаси ибрат мактаби бўлиб қолиши таъкидланди.
***
Bugun, 27 sentyabr kuni Farg‘ona viloyati bosh imom-xatibi Ubaydulloh domla Abdullayev Marg‘ilon shahridagi “Said Amir Xamza” jome masjidiga tashrif buyurdilar. Ubaydulloh domla, avvalo, jamoat bilan birga peshin namozini ado etib, so‘ngra jamoatga ma’ruza qildilar.
Ma’ruzada yurtimizda diniy-ma’rifiy sohada amalga oshirilayotgan ishlar, imom-xatiblik maqomi va mas’uliyati hamda ulamolar qadri haqida so‘z yuritildi. Shuningdek, tashkiliy masala ham ko‘rib chiqildi.
Uzoq yillar davomida diniy sohada samarali faoliyat olib borgan, Marg‘ilon shahridagi “Said Amir Xamza” jome masjidi imom-xatibi Sobirjon domla Normatov o‘z xohishiga ko‘ra vazifasidan ozod etildi.
U kishining diniy sohaga qo‘shgan beqiyos hissasi va ko‘p yillik xizmatlari e’tiborga olinib, O‘zbekiston musulmonlari idorasining maxsus buyrug‘iga asosan “Faxriy imom” maqomi berildi. Buyruq matni jamoatga o‘qib eshittirildi.
Ustoz Sobirjon domlaning ilm va tajriba bilan o‘tgan hayoti hamda olib borgan xizmatlari yuksak e’tirof etildi. Shuningdek, kelgusida ham yangi avlod imomlari uchun u kishining hayotiy tajribasi ibrat maktabi bo‘lib qolishi ta’kidlandi.
