Хабар берганимиздек, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бугунги жума намозини пойтахимизнинг Олмазор туманидаги «Исломобод» жоме масжидида адо этдилар.
Жума намозидан олдин муфтий ҳазратлари жамоатга устоз ва муаллимларнинг мақоми, қадр-қиммати, жамиятдаги ўрни қандай бўлиши ҳақида манфаатли суҳбат қилиб бердилар.
Дарҳақиқат, динимизда ҳам устознинг қадри, фазли жуда улуғланган. Чунки айнан муаллимлар келажак авлоднинг эътиқоди ва тафаккури тўғри шаклланишида муҳим ўрин тутади.
Шайх Нуриддин Холиқназар ҳазратлари ўз маърузаларида ана шу муҳим нуқтага эътибор қаратиб, оят ва ҳадислар асосида устоз ва мураббий бўлган зотларга юксак эҳтиромда бўлиш лозимлигини эслатиб ўтдилар. Зеро, Қуръони каримнинг бир ўрнида: «Аллоҳ сизлардан имон келтирган ва илм ато этилган зотларни (баланд) даража (мартаба)ларга кўтарур” (Мужодала сураси, 11-оят) дейилган бўлса, яна бир ўринда: «Биладиганлар билан билмайдиганлар баробар бўлурми?» (Зумар сураси, 9-оят) дея илм аҳли бўлганларнинг даражалари жуда юқори экани баён этилган.
Ҳадиси шарифда эса: «Албатта, уламолар пайғамбарларнинг меросхўрларидир. Пайғамбарлар динор ва дирҳам (мол-дунё) мерос қолдирмаган. Балки илм мерос қолдиришган. Ким бу илмдан насибадор бўлган бўлса, улкан бахтга муяссар бўлибди» деб келтирилади (Имом Термизий ривояти).
Муфтий ҳазратлари таълим-тарбиядек шарафли иш пайғамбарларнинг вазифаларидан бири экани, ўқитувчи ва мураббийларнинг машаққатли меҳнатлари эвазига ёш авлоднинг илмига илм, одобига одоб қўшилишини таъкидлар эканлар, “Ким устозини ранжитса илмнинг баракасидан маҳрум бўлади”, дея уқтирдилар.
Манфаатли маъруза давомида кейинги йилларда юртимизда устозлар мақоми, уларга бўлган эътибор юқори бўлаётгани эътироф этилиб, муаллим ва мураббийлар ҳақига хайрли дуолар қилинди.
***
Xabar berganimizdek, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bugungi juma namozini poytaximizning Olmazor tumanidagi «Islomobod» jome masjidida ado etdilar.
Juma namozidan oldin muftiy hazratlari jamoatga ustoz va muallimlarning maqomi, qadr-qimmati, jamiyatdagi o‘rni qanday bo‘lishi haqida manfaatli suhbat qilib berdilar.
Darhaqiqat, dinimizda ham ustozning qadri, fazli juda ulug‘langan. Chunki aynan muallimlar kelajak avlodning e’tiqodi va tafakkuri to‘g‘ri shakllanishida muhim o‘rin tutadi.
Shayx Nuriddin Xoliqnazar hazratlari o‘z ma’ruzalarida ana shu muhim nuqtaga e’tibor qaratib, oyat va hadislar asosida ustoz va murabbiy bo‘lgan zotlarga yuksak ehtiromda bo‘lish lozimligini eslatib o‘tdilar. Zero, Qur’oni karimning bir o‘rnida: «Alloh sizlardan imon keltirgan va ilm ato etilgan zotlarni (baland) daraja (martaba)larga ko‘tarur” (Mujodala surasi, 11-oyat) deyilgan bo‘lsa, yana bir o‘rinda: «Biladiganlar bilan bilmaydiganlar barobar bo‘lurmi?» (Zumar surasi, 9-oyat) deya ilm ahli bo‘lganlarning darajalari juda yuqori ekani bayon etilgan.
Hadisi sharifda esa: «Albatta, ulamolar payg‘ambarlarning merosxo‘rlaridir. Payg‘ambarlar dinor va dirham (mol-dunyo) meros qoldirmagan. Balki ilm meros qoldirishgan. Kim bu ilmdan nasibador bo‘lgan bo‘lsa, ulkan baxtga muyassar bo‘libdi» deb keltiriladi (Imom Termiziy rivoyati).
Muftiy hazratlari ta’lim-tarbiyadek sharafli ish payg‘ambarlarning vazifalaridan biri ekani, o‘qituvchi va murabbiylarning mashaqqatli mehnatlari evaziga yosh avlodning ilmiga ilm, odobiga odob qo‘shilishini ta’kidlar ekanlar, “Kim ustozini ranjitsa ilmning barakasidan mahrum bo‘ladi”, deya uqtirdilar.
Manfaatli ma’ruza davomida keyingi yillarda yurtimizda ustozlar maqomi, ularga bo‘lgan e’tibor yuqori bo‘layotgani e’tirof etilib, muallim va murabbiylar haqiga xayrli duolar qilindi.
