Жорий йилнинг 24 март куни Швеция парламентида Ўзбекистоннинг диний-маърифий соҳадаги ислоҳотлари, бағрикенглик муҳити ва миллатлараро ҳамжиҳатлик борасида амалга ошираётган ишларига бағишланган семинар-тақдимот ўтказилди.
Тадбирда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Дин ишлари бўйича қўмита раисининг биринчи ўринбосари, тарих фанлари доктори, профессор Давронбек Махсудов, шунингдек, юртимиздаги диний конфессия етакчилари, элчихона ва соҳа вакиллари иштирок этишди.
Швеция томонидан эса, парламент аъзолари, элчилар, маданият маркази вакиллари, илмий-тадқиқот институтлари мутахассислари, экспертлар, ватандошлар, оммавий ахборот воситалари вакиллари – жами 120 нафар иштирокчи қатнашди.
Тақдимотда давлатимиз томонидан диний бағрикенглик тамойилларини қарор топтириш, турли миллат ва элатлар ўртасида дўстликни янада мустаҳкамлаш борасида кенг кўламли ишлар, диний конфессия вакиллари ўртасида дўстлик ришталарини мустаҳкамлаш, ушбу йўналишда амалга оширилган ишлар ҳамда илгари сурилган эзгу ташаббуслар халқаро ҳамжамият томонидан эътироф этилаётганига урғу қаратилди.
Семинарда Ўзбекистонда сўнгги йилларда жаҳолатга қарши маърифат билан курашишга алоҳида эътибор қаратилаётгани, бу йўлда аҳолининг диний-маърифий саводхонлигини ошириш, ёш авлодни турли бузғунчи оқимлар таъсирига тушиб қолишдан сақлаш бўйича мунтазам тушунтириш ишлари олиб борилаётгани баён этилди.
Семинар асносида хорижлик мутахассислар ва иштирокчилар билан қизғин савол-жавоблар бўлиб ўтди. Халқаро ҳамжамият вакилларини қизиқтирган саволларга соҳа масъуллари томонидан асосли жавоблар берилди.
Халқаро семинар иштирокчилари Ўзбекистондаги динлараро мулоқот, бағрикенглик муҳити ва тинчликсеварлик сиёсати нафақат минтақа, балки бутун дунё учун намуна эканини таъкидлади.
***
Joriy yilning 24 mart kuni Shvetsiya parlamentida O‘zbekistonning diniy-maʼrifiy sohadagi islohotlari, bag‘rikenglik muhiti va millatlararo hamjihatlik borasida amalga oshirayotgan ishlariga bag‘ishlangan seminar-taqdimot o‘tkazildi.
Tadbirda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Din ishlari bo‘yicha qo‘mita raisining birinchi o‘rinbosari, tarix fanlari doktori, professor Davronbek Maxsudov, shuningdek, yurtimizdagi diniy konfessiya yetakchilari, elchixona va soha vakillari ishtirok etishdi.
Shvetsiya tomonidan esa, parlament aʼzolari, elchilar, madaniyat markazi vakillari, ilmiy-tadqiqot institutlari mutaxassislari, ekspertlar, vatandoshlar, ommaviy axborot vositalari vakillari – jami 120 nafar ishtirokchi qatnashdi.
Taqdimotda davlatimiz tomonidan diniy bag‘rikenglik tamoyillarini qaror toptirish, turli millat va elatlar o‘rtasida do‘stlikni yanada mustahkamlash borasida keng ko‘lamli ishlar, diniy konfessiya vakillari o‘rtasida do‘stlik rishtalarini mustahkamlash, ushbu yo‘nalishda amalga oshirilgan ishlar hamda ilgari surilgan ezgu tashabbuslar xalqaro hamjamiyat tomonidan eʼtirof etilayotganiga urg‘u qaratildi.
Seminarda O‘zbekistonda so‘nggi yillarda jaholatga qarshi maʼrifat bilan kurashishga alohida eʼtibor qaratilayotgani, bu yo‘lda aholining diniy-maʼrifiy savodxonligini oshirish, yosh avlodni turli buzg‘unchi oqimlar taʼsiriga tushib qolishdan saqlash bo‘yicha muntazam tushuntirish ishlari olib borilayotgani bayon etildi.
Seminar asnosida xorijlik mutaxassislar va ishtirokchilar bilan qizg‘in savol-javoblar bo‘lib o‘tdi. Xalqaro hamjamiyat vakillarini qiziqtirgan savollarga soha masʼullari tomonidan asosli javoblar berildi.
Xalqaro seminar ishtirokchilari O‘zbekistondagi dinlararo muloqot, bag‘rikenglik muhiti va tinchliksevarlik siyosati nafaqat mintaqa, balki butun dunyo uchun namuna ekanini taʼkidladi.
