Ўзбекистон делегациясининг Швеция сафари доирасида 25 март куни Швеция, Норвегия ва Данияда ўқиш ва иш билан бўлиб турган 200 нафардан зиёд ватандошларимиз билан бир пиёла чой устида учрашув ташкил қилинди.
Тадбир аввалида Швециядаги ватандошлар жамоаси томонидан амалга оширилаётган маънавий-маърифий тадбирлар, хусусан, миллийликни сақлаш, ҳамжиҳатликни мустаҳкамлаш, спорт мусобақалари ва таълим-тарбия ишлари тўғрисида тақдимот қилинди.
Учрашувда хорижда истиқомат қилаётган ватандошлар ҳолидан хабар олиш, уларнинг ҳуқуқ ва манфаатлари, эътиқодларини ҳимоялаш борасида Давлатимиз Раҳбари ташаббуси билан жуда катта ишлар қилинаётгани эътироф этилди. Жумладан, Рамазон ойида уламолар, имом-хатиблар ва қориларни дунё давлатларига юбориш анъанага айлангани, бу йил ҳам бир гуруҳ уламолар Россия, Жанубий Корея, АҚШ ва Европа мамлакатларида бўлиб қайтгани, у ерларда ватандошларимиз учун ифторлик дастурхонлари ёзилиб, маърифий суҳбатлар ташкил этилгани юқори баҳоланди.
Шайх Нуриддин Холиқназар ҳазратлари ватандошлар жамоаси ва улар томонидан амалга оширилган ишлар натижасида ўзбек жамияти муҳити яхши шакллангани, Ватан нафаси яққол сезилиб тургани ва ватанпарварлик фазилати сайқалланаётганини таъкидладилар.
Янги Ўзбекистондаги диний-маърифий соҳадаги ислоҳотлар, Рамазон ойидаги тадбирлар, хатми Қуръонлар, Қадр кечасидаги дуолар, Рамазон ҳайити арафасида Ислом цивилизацияси маркази ва Имом Бухорий масжид-мажмуаси очилиши катта байрам туҳфаси бўлгани алоҳида қайд этилди.
Муфтий ҳазратлари Ватан ва унга бўлган муҳаббат тушунчаси борасида Қуръони карим оятлари, ҳадиси шарифлар ва мўътабар манбалар асосида сўзлаб бердилар.
Мамлакатимизда инсонни қадрлашга бўлган эътибор йил сайин ортаётгани, аҳолининг эҳтиёжманд қатламини қўллаб-қувватлашга алоҳида эътибор қаратилаётгани, хайрия ишларига жуда катта маблағ ажратилгани рақамлар ва мисоллар асосида келтириб ўтилди.
Шунингдек, бугунги мураккаб ва қалтис даврда ҳар қачонгидан ҳам огоҳ ва ҳушёр бўлиб яшаш зарур бўлаётгани, ҳар қандай диний масалада савол ёки мурожаатлар бўлса, Ўзбекистон мусулмонлари идораси ҳузуридаги Фатво марказига боғланиш бўйича маълумотлар берилди.
Ватандошларимиз, хусусан, фан доктори Муҳиддин Ширинов Собиқ иттифоқ даври билан бугунги кунни қиёсланса, жуда катта ўзгаришлар бўлгани, хусусан, Швеция парламентида чиқиш қилиш ҳам Ўзбекистоннинг дунё миқёсидаги нуфузи ортиб бораётганига бир мисол бўлишини таъкидлади.
Ўзбекистон делегацияси томонидан ватандошларнинг илм-фан, маданият, ишлаб чиқариш, хизмат кўрсатиш, спорт соҳасидаги ютуқлари юқори баҳоланди.
Ўзбекистон делегацияси ватандошлар томонидан ташкил этилган корхоналар фаолияти билан ҳам танишди.
Учрашувда ватандошларимиз олис масофалардан келиб она Ватан нафасини ҳис эттиришга ҳаракат қилгани учун делегация аъзоларига ўз миннатдорликларини изҳор этишди. Якунда Қуръони карим оятлари тиловат қилиниб, дуолар қилинди.
***
O‘zbekiston delegatsiyasining Shvetsiya safari doirasida 25 mart kuni Shvetsiya, Norvegiya va Daniyada o‘qish va ish bilan bo‘lib turgan 200 nafardan ziyod vatandoshlarimiz bilan bir piyola choy ustida uchrashuv tashkil qilindi.
Tadbir avvalida Shvetsiyadagi vatandoshlar jamoasi tomonidan amalga oshirilayotgan maʼnaviy-maʼrifiy tadbirlar, xususan, milliylikni saqlash, hamjihatlikni mustahkamlash, sport musobaqalari va taʼlim-tarbiya ishlari to‘g‘risida taqdimot qilindi.
Uchrashuvda xorijda istiqomat qilayotgan vatandoshlar holidan xabar olish, ularning huquq va manfaatlari, eʼtiqodlarini himoyalash borasida Davlatimiz Rahbari tashabbusi bilan juda katta ishlar qilinayotgani eʼtirof etildi. Jumladan, Ramazon oyida ulamolar, imom-xatiblar va qorilarni dunyo davlatlariga yuborish anʼanaga aylangani, bu yil ham bir guruh ulamolar Rossiya, Janubiy Koreya, AQSH va Yevropa mamlakatlarida bo‘lib qaytgani, u yerlarda vatandoshlarimiz uchun iftorlik dasturxonlari yozilib, maʼrifiy suhbatlar tashkil etilgani yuqori baholandi.
Shayx Nuriddin Xoliqnazar hazratlari vatandoshlar jamoasi va ular tomonidan amalga oshirilgan ishlar natijasida o‘zbek jamiyati muhiti yaxshi shakllangani, Vatan nafasi yaqqol sezilib turgani va vatanparvarlik fazilati sayqallanayotganini taʼkidladilar.
Yangi O‘zbekistondagi diniy-maʼrifiy sohadagi islohotlar, Ramazon oyidagi tadbirlar, xatmi Qurʼonlar, Qadr kechasidagi duolar, Ramazon hayiti arafasida Islom sivilizatsiyasi markazi va Imom Buxoriy masjid-majmuasi ochilishi katta bayram tuhfasi bo‘lgani alohida qayd etildi.
Muftiy hazratlari Vatan va unga bo‘lgan muhabbat tushunchasi borasida Qurʼoni karim oyatlari, hadisi shariflar va mo‘tabar manbalar asosida so‘zlab berdilar.
Mamlakatimizda insonni qadrlashga bo‘lgan eʼtibor yil sayin ortayotgani, aholining ehtiyojmand qatlamini qo‘llab-quvvatlashga alohida eʼtibor qaratilayotgani, xayriya ishlariga juda katta mablag‘ ajratilgani raqamlar va misollar asosida keltirib o‘tildi.
Shuningdek, bugungi murakkab va qaltis davrda har qachongidan ham ogoh va hushyor bo‘lib yashash zarur bo‘layotgani, har qanday diniy masalada savol yoki murojaatlar bo‘lsa, O‘zbekiston musulmonlari idorasi huzuridagi Fatvo markaziga bog‘lanish bo‘yicha maʼlumotlar berildi.
Vatandoshlarimiz, xususan, fan doktori Muhiddin Shirinov Sobiq ittifoq davri bilan bugungi kunni qiyoslansa, juda katta o‘zgarishlar bo‘lgani, xususan, Shvetsiya parlamentida chiqish qilish ham O‘zbekistonning dunyo miqyosidagi nufuzi ortib borayotganiga bir misol bo‘lishini taʼkidladi.
O‘zbekiston delegatsiyasi tomonidan vatandoshlarning ilm-fan, madaniyat, ishlab chiqarish, xizmat ko‘rsatish, sport sohasidagi yutuqlari yuqori baholandi.
O‘zbekiston delegatsiyasi vatandoshlar tomonidan tashkil etilgan korxonalar faoliyati bilan ham tanishdi.
Uchrashuvda vatandoshlarimiz olis masofalardan kelib ona Vatan nafasini his ettirishga harakat qilgani uchun delegatsiya aʼzolariga o‘z minnatdorliklarini izhor etishdi. Yakunda Qurʼoni karim oyatlari tilovat qilinib, duolar qilindi.
