Қурбон ҳайити арафасида юртимизда инсон қадрини улуғлаш, аҳолининг ижтимоий ҳимояга муҳтож қатламларини қўллаб-қувватлаш, меҳр-оқибат ва саховат муҳитини янада мустаҳкамлашга қаратилган эзгу ишлар кенг кўламда амалга оширилмоқда.
Ўзбекистон Республикаси Президентининг инсон манфаати ва аҳоли саломатлигини таъминлашга қаратилган эзгу ташаббуслари асосида Қурбон ҳайити муносабати билан жойларда кенг қамровли хайрия тадбирлари ташкил этилмоқда. Хусусан, “Вақф” хайрия жамоат фонди, Соғлиқни сақлаш вазирлиги ҳамда Ўзбекистон мусулмонлари идораси ҳамкорлигида бемор болаларни қўллаб-қувватлаш, уларнинг даволаниши учун зарур шароитлар яратиш борасида амалий ишлар олиб борилмоқда.
Ана шундай хайрли тадбирлардан бири Фарғона вилоятида ҳам ташкил этилди. Фарғона вилояти бош имом-хатиби Убайдуллоҳ домла Абдуллаев ҳамда вилоят соғлиқни сақлаш бошқармаси мутасаддилари Фарғона туманида бўлиб, икки босқичли мураккаб жарроҳлик амалиёти ўтказилиши лозим бўлган болажонлар ҳолидан хабар олдилар.
Учрашув давомида бемор болалар ва уларнинг ота-оналари билан самимий мулоқот қилиниб, уларга маънавий далда ва кўмак берилди. Масъуллар томонидан Қурбон ҳайити муносабати билан эзгу тилаклар билдирилиб, болажонларнинг тезроқ соғайиб кетишлари тилаб қолинди. Шунингдек, даволaниш жараёнларини қўллаб-қувватлаш мақсадида хайрия маблағлари топширилди.
Тадбир иштирокчилари бундай саховат ишлари жамиятда меҳр-шафқат, ўзаро ҳурмат ва инсонпарварлик туйғуларини мустаҳкамлашга хизмат қилишини алоҳида таъкидладилар. Айниқса, бемор фарзандлар тарбияси билан машғул бўлган оилаларга эътибор ва ғамхўрлик кўрсатиш халқимизга хос олийжаноб қадриятларнинг амалий ифодаси экани қайд этилди.
Юртимизда инсон саломатлигини муҳофаза қилиш, эҳтиёжманд оилаларни қўллаб-қувватлаш ҳамда хайрия ва саховат ишларини кенгайтиришга қаратилган бундай тадбирлар келгусида ҳам изчил давом эттирилиши шубҳасиз.
***
Qurbon hayiti arafasida yurtimizda inson qadrini ulug‘lash, aholining ijtimoiy himoyaga muhtoj qatlamlarini qo‘llab-quvvatlash, mehr-oqibat va saxovat muhitini yanada mustahkamlashga qaratilgan ezgu ishlar keng ko‘lamda amalga oshirilmoqda.
O‘zbekiston Respublikasi Prezidentining inson manfaati va aholi salomatligini taʼminlashga qaratilgan ezgu tashabbuslari asosida Qurbon hayiti munosabati bilan joylarda keng qamrovli xayriya tadbirlari tashkil etilmoqda. Xususan, “Vaqf” xayriya jamoat fondi, Sog‘liqni saqlash vazirligi hamda O‘zbekiston musulmonlari idorasi hamkorligida bemor bolalarni qo‘llab-quvvatlash, ularning davolanishi uchun zarur sharoitlar yaratish borasida amaliy ishlar olib borilmoqda.
Ana shunday xayrli tadbirlardan biri Farg‘ona viloyatida ham tashkil etildi. Farg‘ona viloyati bosh imom-xatibi Ubaydulloh domla Abdullayev hamda viloyat sog‘liqni saqlash boshqarmasi mutasaddilari Farg‘ona tumanida bo‘lib, ikki bosqichli murakkab jarrohlik amaliyoti o‘tkazilishi lozim bo‘lgan bolajonlar holidan xabar oldilar.
Uchrashuv davomida bemor bolalar va ularning ota-onalari bilan samimiy muloqot qilinib, ularga maʼnaviy dalda va ko‘mak berildi. Masʼullar tomonidan Qurbon hayiti munosabati bilan ezgu tilaklar bildirilib, bolajonlarning tezroq sog‘ayib ketishlari tilab qolindi. Shuningdek, davolanish jarayonlarini qo‘llab-quvvatlash maqsadida xayriya mablag‘lari topshirildi.
Tadbir ishtirokchilari bunday saxovat ishlari jamiyatda mehr-shafqat, o‘zaro hurmat va insonparvarlik tuyg‘ularini mustahkamlashga xizmat qilishini alohida taʼkidladilar. Ayniqsa, bemor farzandlar tarbiyasi bilan mashg‘ul bo‘lgan oilalarga eʼtibor va g‘amxo‘rlik ko‘rsatish xalqimizga xos oliyjanob qadriyatlarning amaliy ifodasi ekani qayd etildi.
Yurtimizda inson salomatligini muhofaza qilish, ehtiyojmand oilalarni qo‘llab-quvvatlash hamda xayriya va saxovat ishlarini kengaytirishga qaratilgan bunday tadbirlar kelgusida ham izchil davom ettirilishi shubhasiz.
