Марғилон шаҳридаги “Бурҳониддин Марғиноний” илмий-маърифий ва туризм мажмуасида навбатдаги босқичдаги янги йирик лойиҳалар қурилиши бошланди.
Шу муносабат билан ташкил этилган тадбирда вилоят ҳокими Хайрулло Бозоров иштирок этди.
Мажмуа қурилишининг иккинчи босқичи доирасида ҳудудда замонавий Илмий тадқиқот маркази барпо этилиши режалаштирилган бўлиб, унда кутубхона, маъмурий хоналар, махсус тадқиқот ва иш хоналари, архив, семинар ва кўргазма заллари ҳамда “Ҳидоя” китоби монументи жой олади.
Шунингдек, мажмуа ҳудудида 1 минг 500 ўринли муҳташам Анжуманлар саройи — Конгресс хол қурилиши ҳам кўзда тутилган.
Фиқҳшунослик йўналишига ихтисослашган олий таълим муассасасининг барпо этилиши эса нафақат вилоят, балки мамлакатимиз илмий-маърифий ҳаётида муҳим тарихий воқеа сифатида баҳоланмоқда.
Тадбир доирасида вилоят ҳокими, нуронийлар, фаоллар ва масъул раҳбарлар иштирокида ўтган самимий мулоқотда Президентимиз ташаббуси билан мамлакатимизда амалга оширилаётган кенг кўламли ислоҳотлар, бунёдкорлик ишлари ва янги лойиҳаларнинг аҳамияти ҳақида сўз борди.
Мутасаддилар томонидан барча қурилиш ишларини ўз вақтида ва юқори сифатда амалга ошириш зарурлиги алоҳида таъкидланди.
Нуронийлар юртимизда олиб борилаётган эзгу ва хайрли ишлар учун миннатдорлик билдириб, янги лойиҳалар эл-юрт манфаатига хизмат қилишини тиладилар.
Яхши ниятлар ижобатини сўраб дуолар қилиниб, қурилиш ишларига киришилди.
***
Marg‘ilon shahridagi “Burhoniddin Marg‘inoniy” ilmiy-ma’rifiy va turizm majmuasida navbatdagi bosqichdagi yangi yirik loyihalar qurilishi boshlandi.
Shu munosabat bilan tashkil etilgan tadbirda viloyat hokimi Xayrullo Bozorov ishtirok etdi.
Majmua qurilishining ikkinchi bosqichi doirasida hududda zamonaviy Ilmiy tadqiqot markazi barpo etilishi rejalashtirilgan bo‘lib, unda kutubxona, ma’muriy xonalar, maxsus tadqiqot va ish xonalari, arxiv, seminar va ko‘rgazma zallari hamda “Hidoya” kitobi monumenti joy oladi.
Shuningdek, majmua hududida 1 ming 500 o‘rinli muhtasham Anjumanlar saroyi — Kongress xol qurilishi ham ko‘zda tutilgan.
Fiqhshunoslik yo‘nalishiga ixtisoslashgan oliy ta’lim muassasasining barpo etilishi esa nafaqat viloyat, balki mamlakatimiz ilmiy-ma’rifiy hayotida muhim tarixiy voqea sifatida baholanmoqda.
Tadbir doirasida viloyat hokimi, nuroniylar, faollar va mas’ul rahbarlar ishtirokida o‘tgan samimiy muloqotda Prezidentimiz tashabbusi bilan mamlakatimizda amalga oshirilayotgan keng ko‘lamli islohotlar, bunyodkorlik ishlari va yangi loyihalarning ahamiyati haqida so‘z bordi.
Mutasaddilar tomonidan barcha qurilish ishlarini o‘z vaqtida va yuqori sifatda amalga oshirish zarurligi alohida ta’kidlandi.
Nuroniylar yurtimizda olib borilayotgan ezgu va xayrli ishlar uchun minnatdorlik bildirib, yangi loyihalar el-yurt manfaatiga xizmat qilishini tiladilar.
Yaxshi niyatlar ijobatini so‘rab duolar qilinib, qurilish ishlariga kirishildi.
