Саудия Арабистонининг бир қанча «alekhbariya», «mubasher», «alriyadh», «kapsola» каби етакчи нашрларида Мадина шаҳридаги Шаҳзода Муҳаммад бин Абдулазиз халқаро аэропорти 1447 ҳижрий Ҳаж мавсуми учун Ўзбекистондан келган зиёратчиларнинг биринчи рейсларини қабул қилгани ҳақида лавҳалар эълон қилинди. Унда ҳамюртларимизни саудиялик мутасаддилар томонидан муносиб кутиб олингани ҳақидаги тасвирлар ифода этилган.
«Паспортлар бош бошқармаси Ҳаж мавсумида зиёратчиларни қабул қилишга тўлиқ тайёр. Паспорт назорати пештахталари энг сўнгги технологиялар билан такомиллаштирилган, шунингдек, бир нечта тилларда мулоқот қила оладиган малакали ходимлар билан таъминланган, бу эса бутун дунёдан келган кўп сонли зиёратчиларга тезкор ва уюшган хизматларни тақдим этишга ҳисса қўшади» дейилади хабарларда.
Ҳақиқатан, Давлатимиз раҳбарининг ташаббуси билан ҳаж ва умра сафарларини ташкил этиш ҳамда зиёратчиларга хизмат кўрсатиш сифати йилдан-йилга яхшиланиб бораётгани ҳам юксак эътибор намунасидир.
Таъкидлаш жоизки, ўзбекистонлик ҳожиларнинг тартиби, одоби, ишчи гуруҳининг ишлаши ва ҳозирланган шарт-шароитлар бошқа давлатлар фуқароларида ижобий таассурот уйғотмоқда.
***
Saudiya Arabistonining bir qancha «alekhbariya», «mubasher», «alriyadh», «kapsola» kabi yetakchi nashrlarida Madina shahridagi Shahzoda Muhammad bin Abdulaziz xalqaro aeroporti 1447 hijriy Haj mavsumi uchun O‘zbekistondan kelgan ziyoratchilarning birinchi reyslarini qabul qilgani haqida lavhalar e’lon qilindi. Unda hamyurtlarimizni saudiyalik mutasaddilar tomonidan munosib kutib olingani haqidagi tasvirlar ifoda etilgan.
«Pasportlar bosh boshqarmasi Haj mavsumida ziyoratchilarni qabul qilishga to‘liq tayyor. Pasport nazorati peshtaxtalari eng so‘nggi texnologiyalar bilan takomillashtirilgan, shuningdek, bir nechta tillarda muloqot qila oladigan malakali xodimlar bilan ta’minlangan, bu esa butun dunyodan kelgan ko‘p sonli ziyoratchilarga tezkor va uyushgan xizmatlarni taqdim etishga hissa qo‘shadi» deyiladi xabarlarda.
Haqiqatan, Davlatimiz rahbarining tashabbusi bilan haj va umra safarlarini tashkil etish hamda ziyoratchilarga xizmat ko‘rsatish sifati yildan-yilga yaxshilanib borayotgani ham yuksak e’tibor namunasidir.
Ta’kidlash joizki, o‘zbekistonlik hojilarning tartibi, odobi, ishchi guruhining ishlashi va hozirlangan shart-sharoitlar boshqa davlatlar fuqarolarida ijobiy taassurot uyg‘otmoqda.
