Шу йил 7 март куни Рамазон ойини кўтаринки руҳда ўтказиш юзасидан Қорақалпоғистон Республикаси, вилоятлар ва Тошкент шаҳридаги туман-шаҳар бош имом-хатибларининг онлайн мажлиси ўтказилди. Унда Ўзбекистон Республикаси Президентининг дин ва миллатлараро муносабатлар масалалари бўйича маслаҳатчиси Музаффар Комилов, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ва Дин ишлари бўйича қўмита раиси Содиқжон Тошбоев иштирок этди.
Йиғилишда хайру саховат, меҳр-оқибат мавсуми бўлмиш Рамазон ойини муносиб тарзда кутиб олиш ва юқори савияда ўтказиш бўйича бир қатор муҳим вазифалар белгилаб берилди.
Хусусан, эҳтиёжманд оилалар, ногиронлар, ёлғиз кексалар, боқувчисини йўқотган фуқаролар ҳамда “Меҳрибонлик”, “Мурувват” ва “Саховат” уйларига ҳадялар улашиш, беморларнинг ҳолидан хабар олиш кабилар алоҳида қайд этилди. “Вақф” хайрия жамоат фонди томонидан ҳам олис ва чекка ҳудудларда ёрдамга муҳтож оилалар ҳамда меҳрга муҳтож болаларга ҳадялар улашишни амалга оширишга чақирилди.
Шунингдек, имом-домлаларга хатми Қуръонларни тартибли ўтишини таъминлаш, намозхонларга муносиб шарт-шароитларни ҳозирлаш ва Рамазон ойида Фатво марказидаги Кол марказ фаолиятини 12 соатли иш тартибига ўтказишга ҳам эътибор қилинди.
Сўзга чиққан нотиқлар муборак ой муносабати билан барча масжидларда ҳамда уларга туташ бўлган зиёратгоҳ, қадамжо ва қабристонларда мунтазам озодалик ва ободонлаштириш ишларини амалга ошириш, мўмин-мусулмонлар эмин-эркин ибодат қилиши учун масжидларда хавфсизлик чораларини кўриш, жумладан, электр, газ, транспорт ва ёнғин хавфсизлиги ҳамда хонақоҳлар муҳофазасига эътибор қаратиш муҳимлиги таъкидланди.
Соҳа раҳбарлари томонидан ОАВда Рамазон ойини халқимиз учун меҳр-оқибат, тинчлик-осудалик ва шукроналик тимсоли эканини ўзида мужассам этган чиқишларни амалга ошириш ҳамда исрофгарчилик, боқимандалик кабилардан халос бўлиш бўйича чиқишлар қилишга урғу қаратилди.
* * *
Shu yil 7 mart kuni Ramazon oyini ko‘tarinki ruhda o‘tkazish yuzasidan Qoraqalpog‘iston Respublikasi, viloyatlar va Toshkent shahridagi tuman-shahar bosh imom-xatiblarining onlayn majlisi o‘tkazildi. Unda O‘zbekiston Respublikasi Prezidentining din va millatlararo munosabatlar masalalari bo‘yicha maslahatchisi Muzaffar Komilov, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisi Sodiqjon Toshboyev ishtirok etdi.
Yig‘ilishda xayru saxovat, mehr-oqibat mavsumi bo‘lmish Ramazon oyini munosib tarzda kutib olish va yuqori saviyada o‘tkazish bo‘yicha bir qator muhim vazifalar belgilab berildi.
Xususan, ehtiyojmand oilalar, nogironlar, yolg‘iz keksalar, boquvchisini yo‘qotgan fuqarolar hamda “Mehribonlik”, “Muruvvat” va “Saxovat” uylariga hadyalar ulashish, bemorlarning holidan xabar olish kabilar alohida qayd etildi. “Vaqf” xayriya jamoat fondi tomonidan ham olis va chekka hududlarda yordamga muhtoj oilalar hamda mehrga muhtoj bolalarga hadyalar ulashishni amalga oshirishga chaqirildi.
Shuningdek, imom-domlalarga xatmi Qur’onlarni tartibli o‘tishini ta’minlash, namozxonlarga munosib shart-sharoitlarni hozirlash va Ramazon oyida Fatvo markazidagi Kol markaz faoliyatini 12 soatli ish tartibiga o‘tkazishga ham e’tibor qilindi.
So‘zga chiqqan notiqlar muborak oy munosabati bilan barcha masjidlarda hamda ularga tutash bo‘lgan ziyoratgoh, qadamjo va qabristonlarda muntazam ozodalik va obodonlashtirish ishlarini amalga oshirish, mo‘min-musulmonlar emin-erkin ibodat qilishi uchun masjidlarda xavfsizlik choralarini ko‘rish, jumladan, elektr, gaz, transport va yong‘in xavfsizligi hamda xonaqohlar muhofazasiga e’tibor qaratish muhimligi ta’kidlandi.
Soha rahbarlari tomonidan OAVda Ramazon oyini xalqimiz uchun mehr-oqibat, tinchlik-osudalik va shukronalik timsoli ekanini o‘zida mujassam etgan chiqishlarni amalga oshirish hamda isrofgarchilik, boqimandalik kabilardan xalos bo‘lish bo‘yicha chiqishlar qilishga urg‘u qaratildi.
