Юртимизда муқаддас қадамжолар, қабристонлар ва зиёратгоҳларни обод сақлаш, марҳумлар хотирасини ёд этиш халқимизнинг азалий қадриятларидан бири ҳисобланади. Бу каби хайрли ишлар орқали инсон нафақат ўтганлар ҳақига ҳурмат кўрсатади, балки жамиятда меҳр-оқибат ва ҳамжиҳатлик муҳитини мустаҳкамлашга ҳам ҳисса қўшади.
Муқаддас динимизда қабрларни зиёрат қилиш, марҳумлар ҳақига дуо ва истиғфор айтиш савобли амаллардан саналади. Зиёрат инсонга умрнинг ғаниматлигини эслатиб, уни яхшиликка, эзгуликка ва маънавий покликка чорлайди.
Шу боис халқимиз азалдан қабристонларни пок ва озода сақлашга, ўтган аждодлар хотирасини эҳтиром қилишга алоҳида аҳамият бериб келади.
Шу муносабат билан бугун ҳудудлардаги қабристонларда кенг кўламли ҳашар тадбирлари ўтказилди. Унда нуронийлар, маҳалла фаоллари, ёшлар ва жамоатчилик вакиллари фаол иштирок этдилар.
Ҳашар давомида қабрлар атрофи тозаланиб, бегона ўтлар ва чиқиндилар йиғиштирилди. Йўлаклар тартибга келтирилиб, зиёратчилар учун қулай муҳит яратилди.
Шунингдек, ҳудудлардаги масжид ва қабристонлар атрофига гуллар ва манзарали кўчатлар ўтказилди.
Қабристонларни обод сақлаш, зиёратгоҳларга эътибор қаратиш — бу нафақат жамоатчилик вазифаси, балки ҳар бир инсоннинг маънавий бурчидир.
***
Yurtimizda muqaddas qadamjolar, qabristonlar va ziyoratgohlarni obod saqlash, marhumlar xotirasini yod etish xalqimizning azaliy qadriyatlaridan biri hisoblanadi. Bu kabi xayrli ishlar orqali inson nafaqat o‘tganlar haqiga hurmat ko‘rsatadi, balki jamiyatda mehr-oqibat va hamjihatlik muhitini mustahkamlashga ham hissa qo‘shadi.
Muqaddas dinimizda qabrlarni ziyorat qilish, marhumlar haqiga duo va istig‘for aytish savobli amallardan sanaladi. Ziyorat insonga umrning g‘animatligini eslatib, uni yaxshilikka, ezgulikka va ma’naviy poklikka chorlaydi.
Shu bois xalqimiz azaldan qabristonlarni pok va ozoda saqlashga, o‘tgan ajdodlar xotirasini ehtirom qilishga alohida ahamiyat berib keladi.
Shu munosabat bilan bugun hududlardagi qabristonlarda keng ko‘lamli hashar tadbirlari o‘tkazildi. Unda nuroniylar, mahalla faollari, yoshlar va jamoatchilik vakillari faol ishtirok etdilar.
Hashar davomida qabrlar atrofi tozalanib, begona o‘tlar va chiqindilar yig‘ishtirildi. Yo‘laklar tartibga keltirilib, ziyoratchilar uchun qulay muhit yaratildi.
Shuningdek, hududlardagi masjid va qabristonlar atrofiga gullar va manzarali ko‘chatlar o‘tkazildi.
Qabristonlarni obod saqlash, ziyoratgohlarga e’tibor qaratish — bu nafaqat jamoatchilik vazifasi, balki har bir insonning ma’naviy burchidir.
