Шу йил 12 май куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ва Дин ишлари бўйича қўмита раисининг биринчи ўринбосари Давронбек Махсудов Индонезия Ҳаж фонди директори ўринбосари Индра Гунаван бошчилигидаги делегацияни қабул қилди.
Учрашув аввалида Ҳомиджон домла меҳмонларни юртимизга ташрифи билан қутлаб, Муфтий Шайх Нуриддин Холиқназар ҳазратларининг саломи ва эзгу тилакларини етказди. Шунингдек, юртимизда диний-маърифий соҳада амалга оширилаётган ислоҳотлар, хусусан, кейинги йилларда ҳаж квотаси 15 мингдан ошгани ва зиёратчиларга яратилаётган қулайликлар ҳақида маълумот берди.
Мулоқот давомида Дин ишлари бўйича қўмита раисининг биринчи ўринбосари Давронбек Махсудов Ўзбекистоннинг ҳаж ва умра тадбирларини ташкил этишдаги 30 йиллик бой тажрибасини алоҳида таъкидлаб, Индонезия билан диний-маърифий йўналишда тажриба алмашиш икки томон учун ҳам манфаатли бўлишини билдирди.
Ўз навбатида Индонезия делегацияси раҳбари Индра Гунаван самимий қабул ва фойдали маълумотлар учун миннатдорлик изҳор этиш баробарида икки давлат ўртасидаги тарихий алоқаларга тўхталиб, Индонезиянинг собиқ президенти Сукарно Самарқанддаги Имом Бухорий мажмуасини зиёрат қилган илк хорижий давлат арбоби эканига урғу қаратди.
Шунингдек, у ўз сўзида Индонезиянинг ҳаж ва умра тизимига оид маълумотларни тақдим этиш баробарида муборак сафарга зиёратчиларни тайёрлаш тажрибаси ҳақида маълумот тақдим этди.Учрашув асносида томонлар келгусида мутахассисларнинг масофавий тажриба алмашишига келишиб олди.
Шу билан бирга, томонлар ўзларини қизиқтирган саволларга атрофлича жавоб олди.
Дўстона ва самимий руҳда ўтган мулоқот якунида ўзаро эсдалик совғалари алмашилди.
***
Shu yil 12 may kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov va Din ishlari bo‘yicha qo‘mita raisining birinchi o‘rinbosari Davronbek Maxsudov Indoneziya Haj fondi direktori o‘rinbosari Indra Gunavan boshchiligidagi delegatsiyani qabul qildi.
Uchrashuv avvalida Homidjon domla mehmonlarni yurtimizga tashrifi bilan qutlab, Muftiy Shayx Nuriddin Xoliqnazar hazratlarining salomi va ezgu tilaklarini yetkazdi. Shuningdek, yurtimizda diniy-ma’rifiy sohada amalga oshirilayotgan islohotlar, xususan, keyingi yillarda haj kvotasi 15 mingdan oshgani va ziyoratchilarga yaratilayotgan qulayliklar haqida ma’lumot berdi.
Muloqot davomida Din ishlari bo‘yicha qo‘mita raisining birinchi o‘rinbosari Davronbek Maxsudov O‘zbekistonning haj va umra tadbirlarini tashkil etishdagi 30 yillik boy tajribasini alohida ta’kidlab, Indoneziya bilan diniy-ma’rifiy yo‘nalishda tajriba almashish ikki tomon uchun ham manfaatli bo‘lishini bildirdi.
O‘z navbatida Indoneziya delegatsiyasi rahbari Indra Gunavan samimiy qabul va foydali ma’lumotlar uchun minnatdorlik izhor etish barobarida ikki davlat o‘rtasidagi tarixiy aloqalarga to‘xtalib, Indoneziyaning sobiq prezidenti Sukarno Samarqanddagi Imom Buxoriy majmuasini ziyorat qilgan ilk xorijiy davlat arbobi ekaniga urg‘u qaratdi.
Shuningdek, u o‘z so‘zida Indoneziyaning haj va umra tizimiga oid ma’lumotlarni taqdim etish barobarida muborak safarga ziyoratchilarni tayyorlash tajribasi haqida ma’lumot taqdim etdi.Uchrashuv asnosida tomonlar kelgusida mutaxassislarning masofaviy tajriba almashishiga kelishib oldi.
Shu bilan birga, tomonlar o‘zlarini qiziqtirgan savollarga atroflicha javob oldi.
Do‘stona va samimiy ruhda o‘tgan muloqot yakunida o‘zaro esdalik sovg‘alari almashildi.
