Ўзбекистон Республикасининг диний соҳадаги давлат сиёсати қуйидаги асосий принципларга таянади:
• Қонунийлик
• Виждон эркинлиги
• Диннинг давлатдан ажратилганлиги
• Тенглик
• Эркин фикрлаш
• Динлараро мулоқот ва ўзаро тушуниш
Қонунийлик принципига мувофиқ диний соҳадаги давлат сиёсати Конституцияга ва қонунчилик ҳужжатларига мувофиқ амалга оширилади.
Виждон эркинлиги принципига биноан Ўзбекистон Республикасида барча шахслар учун дин ва эътиқод эркинлиги кафолатланади.
Диннинг давлатдан ажратилганлиги принципи диний ташкилотлар ва давлат органлари ўзаро бир-бирининг фаолиятига аралашмаслиги, давлат диний ташкилотлар зиммасига давлатнинг бирор-бир вазифаларини юкламаслиги, диний ташкилотларнинг давлат функцияларини амалга оширишига йўл қўймаслигига оид қоидаларни назарда тутади.
Тенглик принципига мувофиқ фуқаролар жинси, ирқи, миллати, тили, дини, эътиқоди, ижтимоий келиб чиқиши ва ижтимоий мавқеидан қатъи назар, қонун олдида тенг бўлиб, бир хил ҳуқуқ ва эркинликларга эга бўлади.
Эркин фикрлаш принципига кўра, фуқароларга бошқа шахслар, жамият ҳамда давлатнинг қонун билан белгиланган ҳуқуқлари, эркинликларига ва қонуний манфаатларига дахл қилмаган ҳолда ўз фикрини эркин билдириш, очиқ мулоқот ва ўзаро ҳурматга асосланган баҳс-мунозарага киришиш ҳуқуқи кафолатланади.
Динлараро мулоқот ва ўзаро тушуниш принципи асосида турли динларга эътиқод қиладиган ёки бирор-бир динга эътиқод қилмайдиган фуқаролар, турли конфессияларга оид ташкилотлар ўзаро диний бағрикенглик, муроса, ҳурмат ва тушуниш асосида мулоқот ўрнатади.
***
O‘zbekiston Respublikasining diniy sohadagi davlat siyosati quyidagi asosiy prinsiplarga tayanadi:
• Qonuniylik
• Vijdon erkinligi
• Dinning davlatdan ajratilganligi
• Tenglik
• Erkin fikrlash
• Dinlararo muloqot va o‘zaro tushunish
Qonuniylik prinsipiga muvofiq diniy sohadagi davlat siyosati Konstitutsiyaga va qonunchilik hujjatlariga muvofiq amalga oshiriladi.
Vijdon erkinligi prinsipiga binoan O‘zbekiston Respublikasida barcha shaxslar uchun din va e’tiqod erkinligi kafolatlanadi.
Dinning davlatdan ajratilganligi prinsipi diniy tashkilotlar va davlat organlari o‘zaro bir-birining faoliyatiga aralashmasligi, davlat diniy tashkilotlar zimmasiga davlatning biror-bir vazifalarini yuklamasligi, diniy tashkilotlarning davlat funksiyalarini amalga oshirishiga yo‘l qo‘ymasligiga oid qoidalarni nazarda tutadi.
Tenglik prinsipiga muvofiq fuqarolar jinsi, irqi, millati, tili, dini, e’tiqodi, ijtimoiy kelib chiqishi va ijtimoiy mavqeidan qat’i nazar, qonun oldida teng bo‘lib, bir xil huquq va erkinliklarga ega bo‘ladi.
Erkin fikrlash prinsipiga ko‘ra, fuqarolarga boshqa shaxslar, jamiyat hamda davlatning qonun bilan belgilangan huquqlari, erkinliklariga va qonuniy manfaatlariga daxl qilmagan holda o‘z fikrini erkin bildirish, ochiq muloqot va o‘zaro hurmatga asoslangan bahs-munozaraga kirishish huquqi kafolatlanadi.
Dinlararo muloqot va o‘zaro tushunish prinsipi asosida turli dinlarga e’tiqod qiladigan yoki biror-bir dinga e’tiqod qilmaydigan fuqarolar, turli konfessiyalarga oid tashkilotlar o‘zaro diniy bag‘rikenglik, murosa, hurmat va tushunish asosida muloqot o‘rnatadi.
