Ассалому алайкум, муҳтарам Фарғона аҳли!
Қадрли дўстлар!
Бугун қадимий ва бетакрор Фарғона заминида улкан тарихий воқеага гувоҳ бўлиб турибмиз. Буюк ипак йўли дурдонаси бўлган кўҳна Марғилон шаҳрида сизлар билан бирга “Бурҳониддин Марғиноний” илмий-маърифий ва туризм мажмуасининг очилиш маросимида иштирок этмоқдамиз.
Сиз азизларни, бутун Фарғона вилояти аҳлини ана шундай қувончли воқеа, катта байрам билан чин қалбимдан самимий табриклайман.
Мана шундай улуғвор мажмуа барчамизга муборак бўлсин!
Фарғона эли, бутун халқимизга кўп йиллар давомида хизмат қилсин!
Ҳурматли ватандошлар!
Меҳнаткаш, оқкўнгил ва олижаноб Фарғона аҳлига бўлган юксак ҳурмат ва эҳтиром ифодаси сифатида бу заминда катта-катта ишларни амалга оширяпмиз.
Шу мақсадда, аввало, вилоятни 2030 йилгача ижтимоий-иқтисодий ривожлантириш дастури ҳаётга изчил татбиқ этиляпти. Жумладан, қадимий Қўқон шаҳрини ҳар томонлама обод қилиб, бу ерда аэропортни қайта тикладик. Марғилон, бошқа шаҳар ва туманлар, қишлоқ ва маҳаллалар қиёфаси ҳам тубдан ўзгариб, уларга Янги Ўзбекистон нафаси кириб бормоқда. Замонавий ишлаб чиқариш мажмуалари, таълим, тиббиёт ва маданият масканлари, IT-парклар, “Янги Ўзбекистон” турар жой массивлари барпо этилмоқда.
Буларнинг барчаси аҳоли учун қулай меҳнат ва турмуш шароитларини яратиш, ҳар бир юртдошимизга меҳр ва эътибор кўрсатиш, инсон қадрини оширишга қаратилгани билан аҳамиятлидир.
Умуман, барча соҳа ва тармоқларда Фарғона ўзининг тажриба мактабига эга бўлиб бораётгани ҳаммамизни хурсанд қилади.
Ушбу ҳудуд кейинги пайтда нафақат мамлакатимиз, балки халқаро миқёсдаги йирик анжуманларга ҳам мезбонлик қилмоқда. Қўқон шаҳрида халқаро ҳунармандчилик фестивали, Риштонда кулолчилик анжуманини ўтказиш яхши анъанага айланди. Марказий Осиё мамлакатларининг ҳудудлараро ҳамкорлик форумлари ҳам Фарғонада муваффақиятли ўтказилмоқда.
Сизларга маълумки, сўнгги йилларда миллий меъморчилик ечимларини қўллаган ҳолда, тарихий ва замонавий анъаналарни мужассам этган йирик туристик мажмуалар барпо этишга алоҳида эътибор беряпмиз. Хусусан, Самарқандда “Буюк ипак йўли” ва Имом Бухорий мажмуалари, Хоразмда “Арда Хива” халқаро туризм маркази ишга туширилди.
Яқинда азим пойтахтимизда очилган, Янги Ўзбекистон дурдонаси сифатида эътироф этилаётган Ислом цивилизацияси маркази ҳам бу борада улкан қадам бўлди. Таъкидлаш керакки, ушбу мажмуа экспозициясида Фарғона тарихига алоҳида ўрин ажратилган. Бу масканда тўртта йирик порталдан биттаси Қўқон портали деб аталади, Биринчи Ренессанснинг буюк намояндалари – Аҳмад Фарғоний ва Бурҳониддин Марғиноний боболаримиз фаолияти атрофлича ёритилган. Буларнинг барчаси – Фарғона вилоятига, бу замин фарзандларига юксак ҳурмат ва эҳтиром ифодаси, десак, айни ҳақиқатни айтган бўламиз.
Яна бир муҳим жиҳати – ана шундай мажмуалар туфайли жорий йилнинг биринчи чорагида Ўзбекистонга 3 миллионга яқин хорижий сайёҳ ташриф буюрди ва туризм экспорти 1,1 миллиард доллардан ошди. Бу, албатта, дастлабки натижа, келажакда унинг салмоғи янада катта бўлади деб ишонаман.
Қадрли фарғоналик юртдошларим!
Маълумки, бу сўлим диёрдан етишиб чиққан, маънавий ҳаётимизда ўчмас из қолдирган Увайсий, Нодира, Анбар отин, Дилшод Барно, Гулханий, Муқимий, Фурқат, Завқий, Чархий, Собир Абдулла каби шоир ва адиблар номлари халқимиз ўртасида маълум ва машҳур.
Шунингдек, Азиз Қаюмов, Эркин Воҳидов, Худойберди Тўхтабоев, Охунжон Ҳакимов, Умарали Норматов, Энахон Сиддиқова, Анвар Обиджон сингари олимлар, шоир ва адиблар яратган асарлар ҳам халқимизнинг маънавий мулкига айланган.
Ўзбек санъати ва маданияти равнақига беқиёс ҳисса қўшган Юсуфжон қизиқ Шакаржонов, Уста Олим Комилов, Муҳиддин Қориёқубов, Тамарахоним, Ҳалима Носирова, Мукаррама Турғунбоева, Жўрахон Султонов, Маъмуржон Узоқов, Таваккал Қодиров, Саодат Қобулова, Берта Давидова, Муроджон Аҳмедов, Наби Раҳимов, Ҳамза Умаров сингари улуғ санъаткорлар билан бутун халқимиз фахрланади.
Бугунги даврамизда Абдуҳошим Исмоилов, Абдулаҳад Абдурашидов, Қиличбек Тожиев каби устоз санъаткорлар билан бирга ўнлаб истеъдодли ёшларни кўриб турганимдан хурсандман. Бу – Фарғона заминида авлодлар ўртасидаги анъаналар давом этаётганидан далолатдир. Бугун уларнинг санъатидан баҳраманд бўлиш ҳам биз учун катта байрамдир.
Чиндан ҳам, бизнинг қандай буюк санъатимиз, ўзининг маҳорат мактабига эга бўлган санъаткорларимиз бор!
Шу ўринда сизларга бир янгиликни етказмоқчиман.
Биз санъат аҳлининг меҳнати ва истеъдодини қадрлаш, ижодий асарларини келажак авлодларга етказиш бўйича катта ишларни режа қиляпмиз. Элимиз суйган машҳур ҳофизимиз Шерали Жўраев, ўзбек эстрада санъати юлдузи Фаррух Зокировнинг алоҳида мактабларини ташкил этдик. Ушбу анъанани давом эттириб, фарғоналик устоз санъаткорларнинг ҳам маҳорат мактабларини очамиз.
Бундан ташқари, маънавият ва маърифат, маданият ва санъат вакиллари билан катта мулоқот ўтказамиз. Ушбу мулоқотда соҳа ходимларини қўллаб-қувватлаш, уларга қўшимча шароитлар яратиш бўйича янги ташаббусларни илгари сурамиз.
Азиз дўстлар!
Халқимизда “Тўйга тўёна билан” деган яхши гап бор. Фарғонага бу сафар ҳам янги-янги ташаббуслар, катта-катта лойиҳалар билан келдим. Мақсад – вилоят ривожини янги босқичга олиб чиқиш, уни барча соҳаларда намунали ҳудудга айлантиришдан иборат. Бугун очилаётган “Бурҳониддин Марғиноний” илмий-маърифий ва туризм мажмуаси шу йўлда, ҳеч шубҳасиз, янги даврни бошлаб беради.
Миллий меъморчилик анъаналари асосида бунёд этилган, 35 гектар майдонни эгаллаган бетакрор мажмуа Ислом ҳуқуқшунослиги институти, мақом театри, очиқ амфитеатр, ўлкашунослик музейи, адиб ва санъаткорлар хиёбони, ҳунармандлар маркази, меҳмонхона ва сервис шохобчалари сингари кўплаб бино ва иншоотларни ўз ичига олади. Буларнинг барчаси, аввало, Марғиноний бобомизнинг бой илмий меросини ўрганиш ва тарғиб қилиш, ҳудуднинг қадимий ҳунармандчилик анъаналарини асраб-авайлаш, зиёрат туризмини ривожлантиришга хизмат қилади.
Ишончим комил, Янги Ўзбекистон мўъжизалари қаторидан муносиб ўрин эгаллайдиган бу муҳташам обида Фарғона вилоятининг ташриф қоғозларидан бирига айланади.
Бугун биз орзу қилаётган янги Бухорий, Термизий, Фарғоний, Хоразмий ва Марғинонийлар авлоди қаердан етишиб чиқади? Албатта, улар мана шундай маърифат, илм ва зиё масканларида тарбия топади.
Шу маънода, сизлар билан бирга келажакка хизмат қиладиган жуда катта эзгу ишни амалга оширдик, десак, ҳар томонлама тўғри бўлади.
Биз ушбу мажмуани айнан Марғилон шаҳрида барпо этганимиз замирида жуда чуқур тарихий ва ҳаётий ҳақиқат мужассам. Бу табаррук шаҳар кўплаб илм ва маърифат эгаларини вояга етказган. Тарихий манбаларда айтилишича, мазкур қутлуғ маскан “Маърифат аҳлининг ватани” деган юксак шарафга сазовор бўлган.
Биз ана шундай қудратли маънавий меросимизга таяниб, Марғилон, бутун Фарғона тарихининг шон-шараф китобига янги саҳифалар битмоқдамиз. Бу билан ҳар қанча фахрлансак, ғурурлансак арзийди.
Фурсатдан фойдаланиб, мажмуани барпо этишда иштирок этган олим ва лойиҳачиларга, муҳандис ва қурувчиларга, ишчи ва хизматчиларга, ушбу олижаноб ишга ҳисса қўшган барча саховатли инсонларга самимий миннатдорлик изҳор этаман.
Эзгу ишларимизда буюк аждодларимизнинг руҳлари ҳамиша қўллаб-қувватласин!
Янги Ўзбекистон, Янги Фарғона равнақи ва шуҳрати янада зиёда бўлсин!
Катта раҳмат сизларга, доимо соғ-омон бўлинглар!
***
Assalomu alaykum, muhtaram Fargʻona ahli!
Qadrli doʻstlar!
Bugun qadimiy va betakror Fargʻona zaminida ulkan tarixiy voqeaga guvoh boʻlib turibmiz. Buyuk ipak yoʻli durdonasi boʻlgan koʻhna Margʻilon shahrida sizlar bilan birga “Burhoniddin Margʻinoniy” ilmiy-maʼrifiy va turizm majmuasining ochilish marosimida ishtirok etmoqdamiz.
Siz azizlarni, butun Fargʻona viloyati ahlini ana shunday quvonchli voqea, katta bayram bilan chin qalbimdan samimiy tabriklayman.
Mana shunday ulugʻvor majmua barchamizga muborak boʻlsin!
Fargʻona eli, butun xalqimizga koʻp yillar davomida xizmat qilsin!
Hurmatli vatandoshlar!
Mehnatkash, oqkoʻngil va olijanob Fargʻona ahliga boʻlgan yuksak hurmat va ehtirom ifodasi sifatida bu zaminda katta-katta ishlarni amalga oshiryapmiz.
Shu maqsadda, avvalo, viloyatni 2030-yilgacha ijtimoiy-iqtisodiy rivojlantirish dasturi hayotga izchil tatbiq etilyapti. Jumladan, qadimiy Qoʻqon shahrini har tomonlama obod qilib, bu yerda aeroportni qayta tikladik. Margʻilon, boshqa shahar va tumanlar, qishloq va mahallalar qiyofasi ham tubdan oʻzgarib, ularga Yangi Oʻzbekiston nafasi kirib bormoqda. Zamonaviy ishlab chiqarish majmualari, taʼlim, tibbiyot va madaniyat maskanlari, IT-parklar, “Yangi Oʻzbekiston” turar joy massivlari barpo etilmoqda.
Bularning barchasi aholi uchun qulay mehnat va turmush sharoitlarini yaratish, har bir yurtdoshimizga mehr va eʼtibor koʻrsatish, inson qadrini oshirishga qaratilgani bilan ahamiyatlidir.
Umuman, barcha soha va tarmoqlarda Fargʻona oʻzining tajriba maktabiga ega boʻlib borayotgani hammamizni xursand qiladi.
Ushbu hudud keyingi paytda nafaqat mamlakatimiz, balki xalqaro miqyosdagi yirik anjumanlarga ham mezbonlik qilmoqda. Qoʻqon shahrida xalqaro hunarmandchilik festivali, Rishtonda kulolchilik anjumanini oʻtkazish yaxshi anʼanaga aylandi. Markaziy Osiyo mamlakatlarining hududlararo hamkorlik forumlari ham Fargʻonada muvaffaqiyatli oʻtkazilmoqda.
Sizlarga maʼlumki, soʻnggi yillarda milliy meʼmorchilik yechimlarini qoʻllagan holda, tarixiy va zamonaviy anʼanalarni mujassam etgan yirik turistik majmualar barpo etishga alohida eʼtibor beryapmiz. Xususan, Samarqandda “Buyuk ipak yoʻli” va Imom Buxoriy majmualari, Xorazmda “Arda Xiva” xalqaro turizm markazi ishga tushirildi.
Yaqinda azim poytaxtimizda ochilgan, Yangi Oʻzbekiston durdonasi sifatida eʼtirof etilayotgan Islom sivilizatsiyasi markazi ham bu borada ulkan qadam boʻldi. Taʼkidlash kerakki, ushbu majmua ekspozitsiyasida Fargʻona tarixiga alohida oʻrin ajratilgan. Bu maskanda toʻrtta yirik portaldan bittasi Qoʻqon portali deb ataladi, Birinchi Renessansning buyuk namoyandalari – Ahmad Fargʻoniy va Burhoniddin Margʻinoniy bobolarimiz faoliyati atroflicha yoritilgan. Bularning barchasi – Fargʻona viloyatiga, bu zamin farzandlariga yuksak hurmat va ehtirom ifodasi, desak, ayni haqiqatni aytgan boʻlamiz.
Yana bir muhim jihati – ana shunday majmualar tufayli joriy yilning birinchi choragida Oʻzbekistonga 3 millionga yaqin xorijiy sayyoh tashrif buyurdi va turizm eksporti 1,1 milliard dollardan oshdi. Bu, albatta, dastlabki natija, kelajakda uning salmogʻi yanada katta boʻladi deb ishonaman.
Qadrli fargʻonalik yurtdoshlarim!
Maʼlumki, bu soʻlim diyordan yetishib chiqqan, maʼnaviy hayotimizda oʻchmas iz qoldirgan Uvaysiy, Nodira, Anbar otin, Dilshod Barno, Gulxaniy, Muqimiy, Furqat, Zavqiy, Charxiy, Sobir Abdulla kabi shoir va adiblar nomlari xalqimiz oʻrtasida maʼlum va mashhur.
Shuningdek, Aziz Qayumov, Erkin Vohidov, Xudoyberdi Toʻxtaboyev, Oxunjon Hakimov, Umarali Normatov, Enaxon Siddiqova, Anvar Obidjon singari olimlar, shoir va adiblar yaratgan asarlar ham xalqimizning maʼnaviy mulkiga aylangan.
Oʻzbek sanʼati va madaniyati ravnaqiga beqiyos hissa qoʻshgan Yusufjon qiziq Shakarjonov, Usta Olim Komilov, Muhiddin Qoriyoqubov, Tamaraxonim, Halima Nosirova, Mukarrama Turgʻunboyeva, Joʻraxon Sultonov, Maʼmurjon Uzoqov, Tavakkal Qodirov, Saodat Qobulova, Berta Davidova, Murodjon Ahmedov, Nabi Rahimov, Hamza Umarov singari ulugʻ sanʼatkorlar bilan butun xalqimiz faxrlanadi.
Bugungi davramizda Abduhoshim Ismoilov, Abdulahad Abdurashidov, Qilichbek Tojiyev kabi ustoz sanʼatkorlar bilan birga oʻnlab isteʼdodli yoshlarni koʻrib turganimdan xursandman. Bu – Fargʻona zaminida avlodlar oʻrtasidagi anʼanalar davom etayotganidan dalolatdir. Bugun ularning sanʼatidan bahramand boʻlish ham biz uchun katta bayramdir.
Chindan ham, bizning qanday buyuk sanʼatimiz, oʻzining mahorat maktabiga ega boʻlgan sanʼatkorlarimiz bor!
Shu oʻrinda sizlarga bir yangilikni yetkazmoqchiman.
Biz sanʼat ahlining mehnati va isteʼdodini qadrlash, ijodiy asarlarini kelajak avlodlarga yetkazish boʻyicha katta ishlarni reja qilyapmiz. Elimiz suygan mashhur hofizimiz Sherali Joʻrayev, oʻzbek estrada sanʼati yulduzi Farrux Zokirovning alohida maktablarini tashkil etdik. Ushbu anʼanani davom ettirib, fargʻonalik ustoz sanʼatkorlarning ham mahorat maktablarini ochamiz.
Bundan tashqari, maʼnaviyat va maʼrifat, madaniyat va sanʼat vakillari bilan katta muloqot oʻtkazamiz. Ushbu muloqotda soha xodimlarini qoʻllab-quvvatlash, ularga qoʻshimcha sharoitlar yaratish boʻyicha yangi tashabbuslarni ilgari suramiz.
Aziz doʻstlar!
Xalqimizda “Toʻyga toʻyona bilan” degan yaxshi gap bor. Fargʻonaga bu safar ham yangi-yangi tashabbuslar, katta-katta loyihalar bilan keldim. Maqsad – viloyat rivojini yangi bosqichga olib chiqish, uni barcha sohalarda namunali hududga aylantirishdan iborat. Bugun ochilayotgan “Burhoniddin Margʻinoniy” ilmiy-maʼrifiy va turizm majmuasi shu yoʻlda, hech shubhasiz, yangi davrni boshlab beradi.
Milliy meʼmorchilik anʼanalari asosida bunyod etilgan, 35 gektar maydonni egallagan betakror majmua Islom huquqshunosligi instituti, maqom teatri, ochiq amfiteatr, oʻlkashunoslik muzeyi, adib va sanʼatkorlar xiyoboni, hunarmandlar markazi, mehmonxona va servis shoxobchalari singari koʻplab bino va inshootlarni oʻz ichiga oladi. Bularning barchasi, avvalo, Margʻinoniy bobomizning boy ilmiy merosini oʻrganish va targʻib qilish, hududning qadimiy hunarmandchilik anʼanalarini asrab-avaylash, ziyorat turizmini rivojlantirishga xizmat qiladi.
Ishonchim komil, Yangi Oʻzbekiston moʻjizalari qatoridan munosib oʻrin egallaydigan bu muhtasham obida Fargʻona viloyatining tashrif qogʻozlaridan biriga aylanadi.
Bugun biz orzu qilayotgan yangi Buxoriy, Termiziy, Fargʻoniy, Xorazmiy va Margʻinoniylar avlodi qayerdan yetishib chiqadi? Albatta, ular mana shunday maʼrifat, ilm va ziyo maskanlarida tarbiya topadi.
Shu maʼnoda, sizlar bilan birga kelajakka xizmat qiladigan juda katta ezgu ishni amalga oshirdik, desak, har tomonlama toʻgʻri boʻladi.
Biz ushbu majmuani aynan Margʻilon shahrida barpo etganimiz zamirida juda chuqur tarixiy va hayotiy haqiqat mujassam. Bu tabarruk shahar koʻplab ilm va maʼrifat egalarini voyaga yetkazgan. Tarixiy manbalarda aytilishicha, mazkur qutlugʻ maskan “Maʼrifat ahlining vatani” degan yuksak sharafga sazovor boʻlgan.
Biz ana shunday qudratli maʼnaviy merosimizga tayanib, Margʻilon, butun Fargʻona tarixining shon-sharaf kitobiga yangi sahifalar bitmoqdamiz. Bu bilan har qancha faxrlansak, gʻururlansak arziydi.
Fursatdan foydalanib, majmuani barpo etishda ishtirok etgan olim va loyihachilarga, muhandis va quruvchilarga, ishchi va xizmatchilarga, ushbu olijanob ishga hissa qoʻshgan barcha saxovatli insonlarga samimiy minnatdorlik izhor etaman.
Ezgu ishlarimizda buyuk ajdodlarimizning ruhlari hamisha qoʻllab-quvvatlasin!
Yangi Oʻzbekiston, Yangi Fargʻona ravnaqi va shuhrati yanada ziyoda boʻlsin!
Katta rahmat sizlarga, doimo sogʻ-omon boʻlinglar!
