Олий таълим, фан ва инновациялар вазирлиги ҳузуридаги Инновацион ривожланиш агентлиги билан Имом Бухорий номидаги Тошкент ислом институти ўртасида имзоланган шартномага мувофиқ Ўзбекистон мусулмонлари идораси фондида сақланаётган асарларнинг электрон каталогини тузиш бўйича амалий тадқиқот лойиҳаси амалга оширилмоқда.
Ушбу лойиҳага Ўзбекистон мусулмонлари идораси ва Тошкент ислом институти, Ўзбекистон халқаро исломшунослик академияси, Ўзбекистон Республикаси Фанлар академияси, Абу Райҳон Беруний номидаги Шарқшунослик институти, Ўзбекистон миллий архивидаги етук илмий малака ва салоҳиятга эга бўлган 15 нафар мутахассис жалб қилинган.
2025 йилнинг 1 октябридан Ўзбекистон мусулмонлар идорасида лойиҳа доирасидаги амалий ишлар бошланди. Грант лойиҳа доирасида икки йил давомида Ўзбекистон мусулмонлар идораси кутубхонаси фондида сақланаётган 3 065 жилд асарлар мажмуасининг уч тилдаги (ўзбек, инглиз ва араб тиллари) электрон каталоги яратилади. Шунингдек, фонддаги асарларнинг электрон каталоги яратилиши билан бир қаторда бир қанча илмий ишлар ҳам бажарилиши кўзда тутилган.
Юқорида зикр этилган ишларни самарали ташкил этиш мақсадида 2025 йил 6 октябр куни Ўзбекистон мусулмонлар идорасида лойиҳа иштирокчилари иштирокида йиғилиш ўтказилди. Йиғилишда Ўзбекистон мусулмонлари идораси раиси ўринбосари Муҳаммадолим Муҳаммадсиддиқов, Кутубхона бўлими бошлиғи Камолиддин Маҳкамов, Тошкент ислом институти ректори Уйғун Ғафуров ва бошқалар иштирок этди.
Мажлисда лойиҳа доирасида амалга ошириладиган ишлар доирасида эътибор қаратилиши керак бўлган масалалар муҳокама қилинди.
10 октябр куни Имом Бухорий номидаги Тошкент ислом институтида лойиҳа доирасида семинар ташкил этилди. Унда Ўзбекистон Республикаси Фанлар академияси Абу Райҳон Беруний номидаги Шарқшунослик қўлёзмалар институти бўлим бошлиғи Ҳамидулла Лутфиллаев асарларнинг электрон каталогини тузиш жараёнида манбалар билан ишлашда мутахассис эътибор қаратиши лозим бўлган жиҳатлар борасида иштирокчиларга маъруза қилиб берди. Шунингдек, мутахассислар ўзаро фикр алмашишди.
Жорий йилнинг 14 октябридан эътиборан лойиҳага жалб этилган мутахассислар Ўзбекистон мусулмонлари идораси фондида сақланаётган манбалар каталогини тузиш бўйича амалий ишларни бошлаб юборишган.
Ўзбекистон мусулмонлари идораси
Матбуот хизмати
***
Oliy ta’lim, fan va innovasiyalar vazirligi huzuridagi Innovasion rivojlanish agentligi bilan Imom Buxoriy nomidagi Toshkent islom instituti oʻrtasida imzolangan shartnomaga muvofiq Oʻzbekiston musulmonlari idorasi fondida saqlanayotgan asarlarning elektron katalogini tuzish boʻyicha amaliy tadqiqot loyihasi amalga oshirilmoqda.
Ushbu loyihaga Oʻzbekiston musulmonlari idorasi va Toshkent islom instituti, Oʻzbekiston xalqaro islomshunoslik akademiyasi, Oʻzbekiston Respublikasi Fanlar akademiyasi, Abu Rayhon Beruniy nomidagi Sharqshunoslik instituti, Oʻzbekiston milliy arxividagi etuk ilmiy malaka va salohiyatga ega boʻlgan 15 nafar mutaxassis jalb qilingan.
2025 yilning 1 oktyabridan Oʻzbekiston musulmonlar idorasida loyiha doirasidagi amaliy ishlar boshlandi. Grant loyiha doirasida ikki yil davomida Oʻzbekiston musulmonlar idorasi kutubxonasi fondida saqlanayotgan 3 065 jild asarlar majmuasining uch tildagi (oʻzbek, ingliz va arab tillari) elektron katalogi yaratiladi. Shuningdek, fonddagi asarlarning elektron katalogi yaratilishi bilan bir qatorda bir qancha ilmiy ishlar ham bajarilishi koʻzda tutilgan.
Yuqorida zikr etilgan ishlarni samarali tashkil etish maqsadida 2025 yil 6 oktyabr kuni Oʻzbekiston musulmonlar idorasida loyiha ishtirokchilari ishtirokida yigʻilish oʻtkazildi. Yigʻilishda Oʻzbekiston musulmonlari idorasi raisi oʻrinbosari Muhammadolim Muhammadsiddiqov, Kutubxona boʻlimi boshligʻi Kamoliddin Mahkamov, Toshkent islom instituti rektori Uygʻun Gʻafurov va boshqalar ishtirok etdi.
Majlisda loyiha doirasida amalga oshiriladigan ishlar doirasida e’tibor qaratilishi kerak boʻlgan masalalar muhokama qilindi.
10 oktyabr kuni Imom Buxoriy nomidagi Toshkent islom institutida loyiha doirasida seminar tashkil etildi. Unda Oʻzbekiston Respublikasi Fanlar akademiyasi Abu Rayhon Beruniy nomidagi Sharqshunoslik qoʻlyozmalar instituti boʻlim boshligʻi Hamidulla Lutfillaev asarlarning elektron katalogini tuzish jarayonida manbalar bilan ishlashda mutaxassis e’tibor qaratishi lozim boʻlgan jihatlar borasida ishtirokchilarga ma’ruza qilib berdi. Shuningdek, mutaxassislar oʻzaro fikr almashishdi.
Joriy yilning 14 oktyabridan e’tiboran loyihaga jalb etilgan mutaxassislar Oʻzbekiston musulmonlari idorasi fondida saqlanayotgan manbalar katalogini tuzish boʻyicha amaliy ishlarni boshlab yuborishgan.
Oʻzbekiston musulmonlari idorasi
Matbuot xizmati
