Айни дамда Ўзбекистон мусулмонлари идораси раиси, муфтий Нуриддин домла ҳазратлари Қоҳира шаҳрида Миср Араб Республикаси Президенти Абдулфаттоҳ ас-Сисий шафеълигида ташкил этилган “Фатвонинг мамлакат ва жамият барқарор ривожланишида тутган ўрни” мавзусидаги халқаро анжуманда иштирок этмоқдалар.
Нуфузли тадбир Қуръони карим қироати билан бошланди.
Шундан сўнг, Бутундунё Фатво ҳайъати бош котибияти томонидан мазкур йўналишда қилинаётган ишларга оид видеоролик намойиш этилди.
Анжуманда турли давлатлардан келган Ислом оламининг энг йирик уламолари, муфтийлари, дин ва давлат арбоблари, олимлар ва юздан ортиқ соҳа ходимлари қатнашмоқда.
Унда иштирокчилар Фатво идораларининг аҳамияти, барқарор ривожланиш мақсадларига эришишда фатвонинг ўрни ҳамда фатво ишлаб чиқиш, уни ҳаётга тадбиқ этиш ва етарли илмга эга бўлмаган шахслар томонидан бирёқлама фатволар эълон қилиш ҳолатларининг олдини олиш масалалари бўйича долзарб нутқлар қилинмоқда.
Ўзбекистон мусулмонлари идораси Матбуот хизмати
