Рамазон — меҳр-мурувват, хайру саховат ойи! Шу боис ҳам бу ойда хайрли ишлар салмоғи ортади. Марғилон шаҳар бош имом-хатиби Абдулфаттоҳ домла Олимов бошчилигидаги бир гуруҳ масъуллар кўп йиллар давомида дин хизматида фаолият қилган, ҳозирда нафақада бўлган фахрийларни зиёрат қилдилар.
Жумладан, узоқ йиллар шаҳардаги «Барака» масжидида турли вазифаларда ишлаган Нишонбой ҳожи ва Маҳмуджон хожи оталар ҳолларидан хабар олиниб, улар билан самимий суҳбат қилинди. Суҳбат асносида бугунги кунда юртимизда диний-маърифий соҳада амалга оширилаётган ислоҳотлар, бу йилги Рамазон ва хатми Қуръонлар файзи ҳақида гапириб берилди.
Имом Ҳокимдан келтирилган ривоятда Пайғамбаримиз соллаллоҳу алайҳи васаллам: “Сизларга яхшиларингиз ким эканини билдирайми?”, – деганларида, “Ҳа, эй Аллоҳнинг Расули!”, – дедилар. “Сизларнинг яхшиларингиз – ёши улуғларингиз ва амаллари гўзалроғингиздир”, – дея марҳамат қилдилар.
Кексалар дуоси ижобатдир. Умид қиламизки, улуғ кунларда юртимиз ободлиги, халқимиз фаровонлиги, динимиз ривожини сўраб қилинган дуолар ижобат бўлади.
***
Ramazon — mehr-muruvvat, xayru saxovat oyi! Shu bois ham bu oyda xayrli ishlar salmog‘i ortadi. Marg‘ilon shahar bosh imom-xatibi Abdulfattoh domla Olimov boshchiligidagi bir guruh mas’ullar ko‘p yillar davomida din xizmatida faoliyat qilgan, hozirda nafaqada bo‘lgan faxriylarni ziyorat qildilar.
Jumladan, uzoq yillar shahardagi «Baraka» masjidida turli vazifalarda ishlagan Nishonboy hoji va Mahmudjon xoji otalar hollaridan xabar olinib, ular bilan samimiy suhbat qilindi. Suhbat asnosida bugungi kunda yurtimizda diniy-ma’rifiy sohada amalga oshirilayotgan islohotlar, bu yilgi Ramazon va xatmi Qur’onlar fayzi haqida gapirib berildi.
Imom Hokimdan keltirilgan rivoyatda Payg‘ambarimiz sollallohu alayhi vasallam: “Sizlarga yaxshilaringiz kim ekanini bildiraymi?”, – deganlarida, “Ha, ey Allohning Rasuli!”, – dedilar. “Sizlarning yaxshilaringiz – yoshi ulug‘laringiz va amallari go‘zalrog‘ingizdir”, – deya marhamat qildilar.
Keksalar duosi ijobatdir. Umid qilamizki, ulug‘ kunlarda yurtimiz obodligi, xalqimiz farovonligi, dinimiz rivojini so‘rab qilingan duolar ijobat bo‘ladi.
