Амман сафари чоғида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Иордания халқаро ислом илмлари университетида таълим олаётган юртимиздан борган талаба ёшлар билан учрашдилар.
Мулоқотда мамлакатимизда диний-маърифий соҳада амалга оширилаётган ислоҳотлар, таълим йўналишидаги янгиликлар, илм олиш ва инсонларга фойда келтиришнинг савоби ҳамда она Ватанга садоқат ва мазкур олийгоҳни тамомлагандан кейин юрт тараққиёти ва мусулмон уммати саодатига ҳисса қўшиш каби масалаларга алоҳида тўхталдилар.
Иордания университети раҳбарияти ўзбек талабаларининг одоб-ахлоқи, илм олишга чанқоқлиги, меҳр-муҳаббати, ақл-заковати ва устозларга бўлган эҳтиромини жуда юқори баҳолади.
Мусофирликда таълим олаётган талабалар Муфтий ҳазратларининг ҳол-аҳвол сўраб келганлари учун миннатдорлик билдириб, “Инсон қадри учун” тамойили амалда бўлган мамлакатимиздаги ислоҳотлар, узоқ юртларда ўқиш ёки ишлаш мақсадида юртган фуқароларимиз доимо эътиборда эканидан мамнунликларини изҳор этдилар.
***
Amman safari chog‘ida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Iordaniya xalqaro islom ilmlari universitetida ta’lim olayotgan yurtimizdan borgan talaba yoshlar bilan uchrashdilar.
Muloqotda mamlakatimizda diniy-ma’rifiy sohada amalga oshirilayotgan islohotlar, ta’lim yo‘nalishidagi yangiliklar, ilm olish va insonlarga foyda keltirishning savobi hamda ona Vatanga sadoqat va mazkur oliygohni tamomlagandan keyin yurt taraqqiyoti va musulmon ummati saodatiga hissa qo‘shish kabi masalalarga alohida to‘xtaldilar.
Iordaniya universiteti rahbariyati o‘zbek talabalarining odob-axloqi, ilm olishga chanqoqligi, mehr-muhabbati, aql-zakovati va ustozlarga bo‘lgan ehtiromini juda yuqori baholadi.
Musofirlikda ta’lim olayotgan talabalar Muftiy hazratlarining hol-ahvol so‘rab kelganlari uchun minnatdorlik bildirib, “Inson qadri uchun” tamoyili amalda bo‘lgan mamlakatimizdagi islohotlar, uzoq yurtlarda o‘qish yoki ishlash maqsadida yurtgan fuqarolarimiz doimo e’tiborda ekanidan mamnunliklarini izhor etdilar.
