Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ташаббуси билан юртимизда фаолият юритиб келаётган 3500 дан зиёд имом-хатиб ва имом ноиблар учун воиз уламо ва малакали мутахассислар иштирокида маънавий-маърифий суҳбатлар ўтказиш йўлга қўйилди.
Шу йил 22 февраль куни Ўзбекистон мусулмонлари идораси раиси ўринбосари Муҳаммадолим Муҳаммадсиддиқов ва Диний идора Қуръони карим ва тажвидни ўргатиш бўлими мудири Шайх Алижон қори Қорақалпоғистон Республикаси, вилоятлар ва Тошкент шаҳри вакилликлари жамоаси ва масжидларнинг барча имом-хатиб ва имом ноибларига zoom дастури орқали маънавий-маърифий суҳбат ўтказдилар.
Масофавий учрашувда профессор Муҳаммадолим домла Муҳаммадсиддиқов ўз маърузасида юртимиз мўмин-мусулмонлари ҳуқуқий давлат ва қонун устувор бўлган жамиятда истиқомат қилиши, барча қонун олдида тенг эканини, шу боис нима касб қилиш ва қандай лавозим эгаси бўлишидан қатъий назар барча қонунга амал қилиши зарур эканини алоҳида таъкидлади.
Шайх Алижон қори Қуръони карим фазилати ҳақида манфаатли мавъиза қилиб, жумладан, Каломуллоҳнинг инсониятга раҳмат ўлароқ нозил қилингани, уни ўқиган қорига дунёю охиратда бериладиган ажру мукофотлар, улуғ ойларда қилинган хатми Қуръонларнинг савоби янада зиёда бўлиши, Қуръони каримни эшитиш қалбга ҳузур бериши ҳақида оят, ҳадис ва уларнинг шарҳи билан тушунтириб берди.
Маънавий-маърифий учрашувда нотиқлар томонидан барча соҳа вакиллари қатори имом-домлалар ҳам ўз вазифасини сидқидилдан бажаришга харис бўлиши, ахлоқий сифатларини камол топтириб бориши, илму маърифат ва жамоат ишларида мўмин-мусулмонларга намуна бўлиши лозимлигини таъкидлаш баробарида дин пешволари жамиятдаги мақом ва мартабаларига ҳар томонлама муносиб бўлишлари айтиб ўтилди.
* * *
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbusi bilan yurtimizda faoliyat yuritib kelayotgan 3500 dan ziyod imom-xatib va imom noiblar uchun voiz ulamo va malakali mutaxassislar ishtirokida ma’naviy-ma’rifiy suhbatlar o‘tkazish yo‘lga qo‘yildi.
Shu yil 22 fevral kuni O‘zbekiston musulmonlari idorasi raisi o‘rinbosari Muhammadolim Muhammadsiddiqov va Diniy idora Qur’oni karim va tajvidni o‘rgatish bo‘limi mudiri Shayx Alijon qori Qoraqalpog‘iston Respublikasi, viloyatlar va Toshkent shahri vakilliklari jamoasi va masjidlarning barcha imom-xatib va imom noiblariga zoom dasturi orqali ma’naviy-ma’rifiy suhbat o‘tkazdilar.
Masofaviy uchrashuvda professor Muhammadolim domla Muhammadsiddiqov o‘z ma’ruzasida yurtimiz mo‘min-musulmonlari huquqiy davlat va qonun ustuvor bo‘lgan jamiyatda istiqomat qilishi, barcha qonun oldida teng ekanini, shu bois nima kasb qilish va qanday lavozim egasi bo‘lishidan qat’iy nazar barcha qonunga amal qilishi zarur ekanini alohida ta’kidladi.
Shayx Alijon qori Qur’oni karim fazilati haqida manfaatli mav’iza qilib, jumladan, Kalomullohning insoniyatga rahmat o‘laroq nozil qilingani, uni o‘qigan qoriga dunyoyu oxiratda beriladigan ajru mukofotlar, ulug‘ oylarda qilingan xatmi Qur’onlarning savobi yanada ziyoda bo‘lishi, Qur’oni karimni eshitish qalbga huzur berishi haqida oyat, hadis va ularning sharhi bilan tushuntirib berdi.
Ma’naviy-ma’rifiy uchrashuvda notiqlar tomonidan barcha soha vakillari qatori imom-domlalar ham o‘z vazifasini sidqidildan bajarishga xaris bo‘lishi, axloqiy sifatlarini kamol toptirib borishi, ilmu ma’rifat va jamoat ishlarida mo‘min-musulmonlarga namuna bo‘lishi lozimligini ta’kidlash barobarida din peshvolari jamiyatdagi maqom va martabalariga har tomonlama munosib bo‘lishlari aytib o‘tildi.