Фарғона шаҳрида Экошаҳар учун ажратилган 70 гектарлик майдонда “Янги Ўзбекистон” боғини барпо қилиш учун дарахт экиш бошланди. Шу муносабат билан катта тадбир ташкил этилди. Унда вилоят ҳокими Хайрулло Бозоров бошчилигидаги мутасаддилар билан бирга вилоят бош имом-хатиби Убайдуллоҳ домла Абдуллаев ҳамда бир гуруҳ имом-хатиблар иштирок этишди.
Тадбирда Қуръон тиловат қилиниб, янги барпо этилаётган маскан вилоятимиз аҳлига хайрли бўлишини сўраб, дуо қилинди.
Дарахт экиш тадбиридаги 1000 дан зиёд иштирокчилар орасида Марғилон шаҳар бош имом-хатиби Абдулфаттоҳ домла Олимов, шаҳар имом-хатиблари ва масжид фаоллари ҳам бўлиб, улар ҳам ушбу хайрли ишни халқимиз учун баракот ва манфаатли бўлишини тилаб ўз ҳиссаларини қўшдилар. Зеро ҳадиси шарифда айтилганидек бу каби ишларда улкан ажр ва савоб бордир.
Абу Дардо розийаллоҳу анҳу ривоят қилади. Бир киши Дамашқ кўчаларининг биридан ўтаётиб, кўчат экаётган одамга кўзи тушди ва унга: “Нега бу ишни қилаяпсиз, ахир сиз Расулуллоҳ соллаллоҳу алайҳи васалламнинг саҳобаларидансиз-ку?” деди. Шунда у киши: “Сен шошма, мен Расулуллоҳ соллаллоҳу алайҳи васаллам: “Ким бир кўчат экса, ундан одам ёки Аллоҳ яратган махлуқотлардан биронтаси еса, бунинг эвазига ўша (кўчат эккан банда)га садақа бўлади”, деб айтишганларини эшитганман”, — деди (Аҳмад ривояти).
Фарғона вилояти ҳокимлигининг маълум қилишича, кун давомида 4000 тупдан зиёд каштан, Қрим соснаси, оққайин, клен, лола дарахти ва бошқа турдаги манзарали дарахтлар ўтқазилган ҳамда дарахт экиш ишлари давом эттирилади.
