Жидда шаҳрида бўлиб ўтган халқаро конференцияда 140 та давлатдан вазирлар, муфтийлар, олимлар, экспертлар, тадқиқотчилар, дипломатлар ҳамда ҳаж сафарларини ташкил этишга масъул идоралар вакиллари қатнашди.
Анжуман доирасида Президент маслаҳатчиси ўринбосари Музаффар Комилов, муфтий Шайх Нуриддин Холиқназар ҳазратлари ва Дин ишлари бўйича қўмита раиси Содиқжон Тошбоев бошчилигидаги Ўзбекистон делегацияси Саудия Арабистонининг вазирлик ва ташкилотлари, соҳа мутахассислари билан учрашувлар ўтказиб, ҳаж сафарларини юқори даражада уюштириш борасидаги илғор тажрибаларни атрофлича ўрганди. Шу билан бирга, делегация аъзолари ҳаж мавсумига тайёргарлик жараёнлари, замонавий хизматлар ва янги тартиб-қоидалар билан яқиндан танишди.
Анжумандаги суҳбатлар, экспертлар тавсиялари, соҳавий семинар-тренинглар ва хорижий делегатлар билан тажриба алмашиш иштирокчилар учун амалий аҳамият касб этди. Шунингдек, 5 гектар жойни ўз ичига олган йирик кўргазма ва амалий учрашувлар эса мамлакатлар ўртасидаги ҳамкорлик янада мустаҳкамланиши, хизматлар сифати ва зиёратчилар учун қулайликлар даражасининг ошишига муносиб хизмат қилади.
Мазкур ҳаж конференцияси бешинчи бор йирик халқаро миқёсда ўтказилди. Анжуман инновацион дастурлар, илғор ташаббуслар, рақамли технологиялар ва сунъий интеллект имкониятларидан самарали фойдаланиш, зиёратларни юқори савияда ташкил этишга оид билимларни оширишда жуда манфаатли бўлди.
***
Jidda shahrida bo‘lib o‘tgan xalqaro konferensiyada 140 ta davlatdan vazirlar, muftiylar, olimlar, ekspertlar, tadqiqotchilar, diplomatlar hamda haj safarlarini tashkil etishga mas’ul idoralar vakillari qatnashdi.
Anjuman doirasida Prezident maslahatchisi o‘rinbosari Muzaffar Komilov, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisi Sodiqjon Toshboyev boshchiligidagi O‘zbekiston delegatsiyasi Saudiya Arabistonining vazirlik va tashkilotlari, soha mutaxassislari bilan uchrashuvlar o‘tkazib, haj safarlarini yuqori darajada uyushtirish borasidagi ilg‘or tajribalarni atroflicha o‘rgandi. Shu bilan birga, delegatsiya a’zolari haj mavsumiga tayyorgarlik jarayonlari, zamonaviy xizmatlar va yangi tartib-qoidalar bilan yaqindan tanishdi.
Anjumandagi suhbatlar, ekspertlar tavsiyalari, sohaviy seminar-treninglar va xorijiy delegatlar bilan tajriba almashish ishtirokchilar uchun amaliy ahamiyat kasb etdi. Shuningdek, 5 gektar joyni o‘z ichiga olgan yirik ko‘rgazma va amaliy uchrashuvlar esa mamlakatlar o‘rtasidagi hamkorlik yanada mustahkamlanishi, xizmatlar sifati va ziyoratchilar uchun qulayliklar darajasining oshishiga munosib xizmat qiladi.
Mazkur haj konferensiyasi beshinchi bor yirik xalqaro miqyosda o‘tkazildi. Anjuman innovatsion dasturlar, ilg‘or tashabbuslar, raqamli texnologiyalar va sun’iy intellekt imkoniyatlaridan samarali foydalanish, ziyoratlarni yuqori saviyada tashkil etishga oid bilimlarni oshirishda juda manfaatli bo‘ldi.
