Аёл – мураббий, насллар давомийлигини таъминлашдек шарафли вазифага масъул зот. Муқаддас динимиз аёлнинг маънавий хазинасини бойитиш, уни маърифатга ошно қилиб, кўнглини меҳр жавоҳирлари билан тўлдиришга амр этади. Вилоят вакиллигининг мажлислар залида отинойилар иштирокида бўлиб ўтган тадбирда айни шу борада сўз борди.
Унда Ўзбекистон мусулмонлари идорасининг Фарғона вилояти вакили, вилоят бош имом-хатибининг хотин-қизлар масалалари бўйича ёрдамчиси Ҳ.Комилова ва шаҳар-туман бош отинойилари қатнашдилар. Шунингдек, «Мўминалар» журнали муҳаррири Нилуфар Қўчқарова тадбир меҳмони бўлди.
Тадбирда бугунги кунда аёл-қизларга берилаётган эътибор, жамият, хусусан оила ва фарзанд тарбиясида аёл-қизларнинг ўрни, бу борада отинойилар олдидаги масъулиятлар ҳақида сўз юритилди. Тарғибот ишларида фаол бўлган отинойилар нашриёт томонидан тақдирланди.
Тадбирнинг иккинчи қисми ижтимоий ҳимояга муҳтож оила фарзандлари ҳолидан хабар олиш билан давом этди. «Мўминалар» журнали муҳаррири Нилуфар Қўчқарова, вилоят бош имом-хатибининг хотин-қизлар масалалари бўйича маслаҳатчиси Ҳилолахон Комилова, шаҳар бош имом-хатибининг хотин-қизлар масалалари бўйича маслаҳатчиси Манзура Аҳмадалиева ҳамда Ёшлар ишлари агентлиги Фарғона шаҳар бўлими бошлиғи Аҳаджон Акрамовлар Тотувлик кўчаси 55-уйда яшовчи Мамажонова Шаҳзодабону Рустамжон қизи, Матбуот кўчаси 29-уйда яшовчи Абдуллаева Руҳсора Баҳром қизи ҳамда “Мададкор” МФЙ Аҳмад Яссавий 18-уй 38-хонадонда яшовчи Қодирова Моҳичеҳраларнинг яшаш манзилларида бўлиб, хонадон соҳибларига қишки иссиқ кийимлар, зарурий озиқ-овқат маҳсулотлари ва “Мўминалар” журналига 1 йиллик бепул обуна тақдим этилди.
Fargonaziyo.uz сайти таҳририяти
