Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Набий соллаллоҳу алайҳи васалламни махлуқотларга раҳмат ўлароқ юборган кундан афзалроқ хурсандчилик борми?!
Ким Муҳаммад соллаллоҳу алайҳи васалламнинг таваллудлари билан шодланмаса, асло шодлик, хурсандчилик кўрмайди.
У зотнинг туғилишлари билан раҳмат булоқлари отилиб, олам раҳматга тўлди. Шунинг учун ҳам, Набий соллаллоҳу алайҳи васалламнинг мавлидлари Аллоҳ таолонинг неъматини нишонлаш ва бу юксак иноятдан хурсандчилик байрами бўлган.
Бу байрамни ушбу неъматларнинг қадрини билган, уни бардавом ва зиёда бўлишини умид қилган кишилар нишонлайди…
Аллоҳ таоло Муҳаммад соллаллоҳу алайҳи васалламни башариятга қандай севишни ўргатиш учун юборган…
Набий соллаллоҳу алайҳи васалламга чин муҳаббат қўювчи кишини суннатга фақат тўғри эргашаётганини, бидъатчини эса (амали каби) муҳаббати ҳам нуқсонли эканини кўрасиз.
Набий соллаллоҳу алайҳи васалламнинг мавлидлари билан мўмин кишигина қувонади.
Мўминлар ушбу мунаввар ойни Ҳабибимиз соллаллоҳу алайҳи васаллам мавлидлари муносабати билан хурсандчиликда ўтказадилар. Зеро, мавлиди шариф ойи хурсандчилик қилиш, меҳр-муҳаббат кўрсатиш, яхшилик, эҳсон-садақалар қилиш ойидир.
Набий соллаллоҳу алайҳи васалламга муҳаббат қўювчи ҳар бир киши бу ой келишидан аввал тайёргарлик кўриб, ой давомида имкон қадар улуғ неъматга шукронаси, шодлигини изҳор қилишга интилган.
Солиҳ кишилар мавлидни нишонлашга моддий имкон тополмасалар, ҳеч бўлмаса бу ой давомида шомдан кейин тонг отгунча йўлни ёритиб туриши учун чироқларини ёқиб деразаларига қўйиб қўяр эканлар.
Онам Аллоҳ раҳмат қилсин бобоси шайх Мустафо ҳақида шундай дер эди: «Бобом Рабиъул аввал ташрифидан бир неча ой аввал тайёргарликни бошлаб юборарди. Аслида бобом давлатманд эмасди, лекин ҳолатини бировга билдирмас, аксинча унинг яхши амаллари, зикр мажлиси, меҳмондорчилиги сабабидан уйимиз баракага тўлиб кетарди.
Мавлид ойи арафасида жонлиқ сўйиб, пулларини жамғариб қўяр, бу ой кириши билан бир жарчи қишлоқ чор атрофида баланд овозда: «Ким егуликка, кийим-кечикка эҳтиёжи бўлса шайх Мустафонинг уйига борсин!» деб айланиб чиқарди. Қишлоқдаги ёш болалар унинг ортидан қувонч билан чопқиллашарди».
Шайх Мустафонинг ҳовлиси боғ-роғлари бор, безатилган баланд қаср эмас, балки лойдан қурилган қишлоқдаги оддий уйлардан эди. Чунки бу уй эгаси топганини тупроққа сарфлашнинг ўрнига тўғри Аллоҳ таоло йўлида ишлатиб, фойдаси аниқ бўлган тижоратни афзал кўрар эди.
Кечки пайт шайх Мустафонинг ҳовлисида чироқлар илиниб, одамлар тўпланишиб зикр, салавот, мадҳлар айтиларди.
Сўнгра таом тортилиб, бой-камбағаллар бирга хурсандчилик қилишарди. Унда баракани кўрардингиз. Фақир қалбидан эҳсон соҳиби ҳақига Аллоҳдан кенгчилик сўраб дуо қилар, соҳиби эҳсон эса, Аллоҳ таолога яқинлашишига сабаб бўладиган шундай ишга муваффақ қилгани ва буни янада зиёда қилишини, ҳаёти давомида яхшиликда бардавом этишини сўраб дуо қиларди.
Бу хайрли одат бошқа ҳамқишлоқларимиз хонадонида ҳам давом этарди.
Муҳаммад Холид Собитнинг
«Тарихул иҳтифол би мавлидин Набий соллаллоҳу алайҳи васаллам» китобидан
Муҳаммад Зариф Муҳаммад Олим тайёрлади.
***
Bismillahir Rohmanir Rohiym.
Аlloh taologa bitmas-tuganmas hamdu sanolar boʼlsin.
Paygʼambarimizga mukammal va batamom salavotu durudlar boʼlsin.
Аlloh taolo Nabiy sollallohu alayhi vasallamni maxluqotlarga rahmat oʼlaroq yuborgan kundan afzalroq xursandchilik bormi?!
Kim Muhammad sollallohu alayhi vasallamning tavalludlari bilan shodlanmasa, aslo shodlik, xursandchilik koʼrmaydi.
U zotning tugʼilishlari bilan rahmat buloqlari otilib, olam rahmatga toʼldi. Shuning uchun ham, Nabiy sollallohu alayhi vasallamning mavlidlari Аlloh taoloning neʼmatini nishonlash va bu yuksak inoyatdan xursandchilik bayrami boʼlgan.
Bu bayramni ushbu neʼmatlarning qadrini bilgan, uni bardavom va ziyoda boʼlishini umid qilgan kishilar nishonlaydi…
Аlloh taolo Muhammad sollallohu alayhi vasallamni bashariyatga qanday sevishni oʼrgatish uchun yuborgan…
Nabiy sollallohu alayhi vasallamga chin muhabbat qoʼyuvchi kishini sunnatga faqat toʼgʼri ergashayotganini, bidʼatchini esa (amali kabi) muhabbati ham nuqsonli ekanini koʼrasiz.
Nabiy sollallohu alayhi vasallamning mavlidlari bilan moʼmin kishigina quvonadi.
Moʼminlar ushbu munavvar oyni Habibimiz sollallohu alayhi vasallam mavlidlari munosabati bilan xursandchilikda oʼtkazadilar. Zero, mavlidi sharif oyi xursandchilik qilish, mehr-muhabbat koʼrsatish, yaxshilik, ehson-sadaqalar qilish oyidir.
Nabiy sollallohu alayhi vasallamga muhabbat qoʼyuvchi har bir kishi bu oy kelishidan avval tayyorgarlik koʼrib, oy davomida imkon qadar ulugʼ neʼmatga shukronasi, shodligini izhor qilishga intilgan.
Solih kishilar mavlidni nishonlashga moddiy imkon topolmasalar, hech boʼlmasa bu oy davomida shomdan keyin tong otguncha yoʼlni yoritib turishi uchun chiroqlarini yoqib derazalariga qoʼyib qoʼyar ekanlar.
Onam Аlloh rahmat qilsin bobosi shayx Mustafo haqida shunday der edi: «Bobom Rabiʼul avval tashrifidan bir necha oy avval tayyorgarlikni boshlab yuborardi. Аslida bobom davlatmand emasdi, lekin holatini birovga bildirmas, aksincha uning yaxshi amallari, zikr majlisi, mehmondorchiligi sababidan uyimiz barakaga toʼlib ketardi.
Mavlid oyi arafasida jonliq soʼyib, pullarini jamgʼarib qoʼyar, bu oy kirishi bilan bir jarchi qishloq chor atrofida baland ovozda: «Kim yegulikka, kiyim-kechikka ehtiyoji boʼlsa shayx Mustafoning uyiga borsin!» deb aylanib chiqardi. Qishloqdagi yosh bolalar uning ortidan quvonch bilan chopqillashardi».
Shayx Mustafoning hovlisi bogʼ-rogʼlari bor, bezatilgan baland qasr emas, balki loydan qurilgan qishloqdagi oddiy uylardan edi. Chunki bu uy egasi topganini tuproqqa sarflashning oʼrniga toʼgʼri Аlloh taolo yoʼlida ishlatib, foydasi aniq boʼlgan tijoratni afzal koʼrar edi.
Kechki payt shayx Mustafoning hovlisida chiroqlar ilinib, odamlar toʼplanishib zikr, salavot, madhlar aytilardi.
Soʼngra taom tortilib, boy-kambagʼallar birga xursandchilik qilishardi. Unda barakani koʼrardingiz. Faqir qalbidan ehson sohibi haqiga Аllohdan kengchilik soʼrab duo qilar, sohibi ehson esa, Аlloh taologa yaqinlashishiga sabab boʼladigan shunday ishga muvaffaq qilgani va buni yanada ziyoda qilishini, hayoti davomida yaxshilikda bardavom etishini soʼrab duo qilardi.
Bu xayrli odat boshqa hamqishloqlarimiz xonadonida ham davom etardi.
Muhammad Xolid Sobitning
«Tarixul ihtifol bi mavlidin Nabiy sollallohu alayhi vasallam» kitobidan
Muhammad Zarif Muhammad Olim tayyorladi.
