Таровеҳ намози – бандани кечани ибодат билан бедор ўтказганнинг савобига ноил этади. Расулуллоҳ соллаллоҳу алайҳи васаллам: “Агар киши имом билан то тугатгунча бирга намоз ўқиса, тунни бедор ўтказган деб ҳисобланади”, деганлар (Имом Абу Довуд, Имом Насоий ривояти).
- Тунги намоз – Пайғамбаримиз соллаллоҳу алайҳи васалламнинг суннатлари. Расулуллоҳ соллаллоҳу алайҳи васаллам кечасини ибодат билан ўтказганларидан оёқлари шишиб кетарди.
- Қиёмул лайл (кечани ибодат билан ўтказиш) – жаннатга киришнинг энг катта сабабларидан бири.
- Кечасини ибодат билан ўтказган банданинг жаннатдаги даражаси кўтарилади.
- Кечаси ибодат қиладиганлар Аллоҳнинг раҳматига сазовор бўладилар.
- Аллоҳ таоло Ўзининг солиҳ бандалари қаторида тунги намозни ўқийдиганларни алоҳида мадҳ этган: “Улар тунларни Роббиларига сажда қилиб, бедор ўтказадилар” (Фурқон сураси, 64-оят).
- Қиёмул лайл – фарз намозларидан кейинги энг афзал намозлардан бири.
- Тунги ибодат – бандани Роббига яқин қилади, ёмонликларни даф этади, гуноҳларни кетказади. Расулуллоҳ соллаллоҳу алайҳи васаллам айтадилар: “Кечанинг қиёмини лозим тутинг. Чунки у сизлардан олдинги солиҳларнинг одатидир. У Роббингизга қурбатдир, ёмонликларга каффорот ва гуноҳлардан қайтарувчидир”.
- Қиёмул лайл танадан касалликларни ҳам кетказади. Расулуллоҳ соллаллоҳу алайҳи васаллам: “У жисмдан дардни қувгувчидир”, деганлар.
- Мўминнинг шарафи – кечаси ибодат қилишдадир.
- Кечасини ибодат билан ўтказган банда эга бўладиган ажр-савоб, бахт-саодат ва мукофотлар дунё ва ундаги нарсалардан афзалдир.
Расулуллоҳ соллаллоҳу алайҳи васаллам айтадилар: “Ким Рамазон ойида иймон билан савоб умиди (таровеҳ)да қоим бўлса, унинг аввалги гуноҳлари кечирилади” (Имом Бухорий, Имом Муслим ривояти).
Даврон НУРМУҲАММАД
***
Taroveh namozi – bandani kechani ibodat bilan bedor o‘tkazganning savobiga noil etadi. Rasululloh sollallohu alayhi vasallam: “Agar kishi imom bilan to tugatguncha birga namoz o‘qisa, tunni bedor o‘tkazgan deb hisoblanadi”, deganlar (Imom Abu Dovud, Imom Nasoiy rivoyati).
- Tungi namoz – Payg‘ambarimiz sollallohu alayhi vasallamning sunnatlari. Rasululloh sollallohu alayhi vasallam kechasini ibodat bilan o‘tkazganlaridan oyoqlari shishib ketardi.
- Qiyomul layl (kechani ibodat bilan o‘tkazish) – jannatga kirishning eng katta sabablaridan biri.
- Kechasini ibodat bilan o‘tkazgan bandaning jannatdagi darajasi ko‘tariladi.
- Kechasi ibodat qiladiganlar Allohning rahmatiga sazovor bo‘ladilar.
- Alloh taolo O‘zining solih bandalari qatorida tungi namozni o‘qiydiganlarni alohida madh etgan: “Ular tunlarni Robbilariga sajda qilib, bedor o‘tkazadilar” (Furqon surasi, 64-oyat).
- Qiyomul layl – farz namozlaridan keyingi eng afzal namozlardan biri.
- Tungi ibodat – bandani Robbiga yaqin qiladi, yomonliklarni daf etadi, gunohlarni ketkazadi. Rasululloh sollallohu alayhi vasallam aytadilar: “Kechaning qiyomini lozim tuting. Chunki u sizlardan oldingi solihlarning odatidir. U Robbingizga qurbatdir, yomonliklarga kafforot va gunohlardan qaytaruvchidir”.
- Qiyomul layl tanadan kasalliklarni ham ketkazadi. Rasululloh sollallohu alayhi vasallam: “U jismdan dardni quvguvchidir”, deganlar.
- Mo‘minning sharafi – kechasi ibodat qilishdadir.
- Kechasini ibodat bilan o‘tkazgan banda ega bo‘ladigan ajr-savob, baxt-saodat va mukofotlar dunyo va undagi narsalardan afzaldir.
Rasululloh sollallohu alayhi vasallam aytadilar: “Kim Ramazon oyida iymon bilan savob umidi (taroveh)da qoim bo‘lsa, uning avvalgi gunohlari kechiriladi” (Imom Buxoriy, Imom Muslim rivoyati).
Davron NURMUHAMMAD
