Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам Билол розияллоҳу анҳуга: “Эй Билол, Исломга кирганингдан кейин савобини энг умид қиладиган амалингни менга гапириб бер. Чунки мен жаннатда олд томонимдан кавушинг овозини эшитдим”, дедилар.
Шунда Билол розияллоҳу анҳу: “Амалларим ичида савоби умид қилинадиган энг яхши амалим – агар кечаси ёки кундузи (таҳорат, ғусл ёки таяммум қилиб) покланадиган бўлсам, ана шу поклик билан насиб қилганича намоз ўқир эдим”, дедилар (Имом Бухорий ва имом Муслим ривояти).
Таҳорат қилиб бўлгандан сўнг ўқиладиган намоз – “Шукри вузуъ” (таҳоратнинг шукри) дейилади. Бу намозни таҳоратдан кейиноқ ўқиш мустаҳаб саналади. Намоз ўқиш макруҳ бўлган вақтларда ўқиб бўлмайди.
Уқба ибн Омир Жуҳаний розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Қай бир одам яхшилаб таҳорат қилсаю, қалби ва юзи ила иқбол қилган ҳолда икки ракат намоз ўқиса, албатта унга жаннат вожиб бўлади”, дедилар (Имом Абу Довуд ривояти).
Бошқа ҳадис Набий соллаллоҳу алайҳи васаллам: “Ким менинг шу таҳоратимга ўхшатиб таҳорат қилса ва туриб бориб, икки ракат намоз ўқиса-ю, унда бирор нарсани кўнглидан ўтказмаса, ўтган гуноҳлари мағфират қилинади”, деганлар.Даврон НУРМУҲАММАД
***
Аbu Hurayra roziyallohu anhudan rivoyat qilinadi. Rasululloh sollallohu alayhi vasallam Bilol roziyallohu anhuga: “Ey Bilol, Islomga kirganingdan keyin savobini eng umid qiladigan amalingni menga gapirib ber. Chunki men jannatda old tomonimdan kavushing ovozini eshitdim”, dedilar.
Shunda Bilol roziyallohu anhu: “Аmallarim ichida savobi umid qilinadigan eng yaxshi amalim – agar kechasi yoki kunduzi (tahorat, gʼusl yoki tayammum qilib) poklanadigan boʼlsam, ana shu poklik bilan nasib qilganicha namoz oʼqir edim”, dedilar (Imom Buxoriy va imom Muslim rivoyati).
Tahorat qilib boʼlgandan soʼng oʼqiladigan namoz – “Shukri vuzuʼ” (tahoratning shukri) deyiladi. Bu namozni tahoratdan keyinoq oʼqish mustahab sanaladi. Namoz oʼqish makruh boʼlgan vaqtlarda oʼqib boʼlmaydi.
Siz Bilol ibn Raboh kabi tahorat olib boʼlishingiz bilanoq ikki rakat boʼlsada nafl namoz oʼqiganmisiz?
Uqba ibn Omir Juhaniy roziyallohu anhudan rivoyat qilinadi. Rasululloh sollallohu alayhi vasallam: “Qay bir odam yaxshilab tahorat qilsayu, qalbi va yuzi ila iqbol qilgan holda ikki rakat namoz oʼqisa, albatta unga jannat vojib boʼladi”, dedilar (Imom Аbu Dovud rivoyati).
Boshqa hadis Nabiy sollallohu alayhi vasallam: “Kim mening shu tahoratimga oʼxshatib tahorat qilsa va turib borib, ikki rakat namoz oʼqisa-yu, unda biror narsani koʼnglidan oʼtkazmasa, oʼtgan gunohlari magʼfirat qilinadi”, deganlar.
Davron NURMUHАMMАD
