“Онагинам, илтимос мени ўлдирманг! Сиз менинг ягона онажонимсиз! Мен сизни энг бошидан бошлаб яхши кўраман. Иккимизда ҳам айни бир хил қон оқади, сизнинг юрагингиз уришини ҳаммадан аниқроқ мен эшитаман. Хурсанд бўлсангиз, мен ҳам хурсанд бўламан, бирон нарсадан қайғурсангиз, мен ҳам! Сизнинг ҳар бир оғриғингизни ҳис қиламан, чунки иккаламиз бир вужудмиз, чунки… сизда яшайман. Шундай экан, сиздан ўтинаман,мени нобуд қилманг!”
Бу ҳали туғилмаган гўдакнинг нидоси. Кўряпсизми, у онасига мурожаат қилар экан, ҳатто “сизни туғилганимдан бошлаб яхши кўраман” деб эмас, балки аввал бошидан демоқда.
Эй бўлажак она! Афсуски, сен бу нидоларни эшитмайсан, ҳали туғилмаган фарзандингни бошқа – яшаётган болаларинг янглиғ ҳис қилолмайсан! Сен учун бу бола бошқалари каби эмас. Уни хоҳламайсан! Ўйлайсанки, у сенинг эркинлигинга ҳамда “карьера” аталмиш фаолиятинга халақит қилади. Ундан ҳали туғилмасиданоқ қутилиб қўяқолишни ўйлайсан!
Сен ўйлайсанки, сенинг бахтинг “карьеранг”да. Сен айтасанки, болани катта қилиш учун моддий имконият йўқ. Ва ҳомилани олдириб ташлайсан! Йўқ, ундай қилма, нобуд қилма уни! “Карьера”дан кўра кўпроқ фарзандинг сенга фойда беради. Болага яшаш учун имкон бер!
Д.Имомова
“Саломатлик тақвими”дан олинди
