Халқимизнинг табиатига мутлақо ёт бўлган сиёсий, диний экстремизм, ақидапараст ва бошқа ёвуз оқимларнинг минтақамизга кириб келиши ва тарқалиши тинчлик ва осойишталикка, фарзандларимизнинг келажагига катта хавф туғдиришини одамлар онгига чуқур сингдириб бориш керак. Халқларимиз тафаккурида юксак ахлоқий маънавий қадриятларни қарор топтириш ва мустаҳкамлаш орқали уларни ёвуз кучларга қарши курашга сафарбар этиш зарур.
И. Каримов
Динимиз номи “Ислом”. Ислом сўзининг луғавий таржимаси эса “тинчлик, омонлик” маъноларини англатади. Ислом дини инсонларни тинч-тотув яшашга, бошқаларга, ҳатто бошқа дин вакилларига ҳам зулм қилмасликка чақиради. Динимиз асосида раҳм-шафқат, меҳр-оқибат, инсонпарварлик, биродарлик, ўзаро ҳурмат, тинчлик-осойишталик каби эзгу хислатлар ётади.
Аллоҳ таоло айтади: “Ким бир жонни ноҳақдан ёки ер юзида фасод қилмаса ҳам ўлдирса, худди ҳамма одамларни ўлдирган бўлади” (Моида 32).
Ислом дини ҳар бир жонни жуда қадрлайди, хоҳ мусулмон бўлсин, хоҳ ғайри дин бўлсин, қандай ирққа тегишли бўлмасин, қайси миллатга тегишли бўлмасин, барибир барча-барчасини ардоқлайди. Бир беайб инсонни ўлдириш бутун бошли инсониятни ўлдиргандек жиноят ҳисобланади.
Пайғамбаримиз алайҳиссалом ҳадиси муборакларида марҳамат қилиб айтадилар:
“Умматимдан қайси бири умматимга қарши чиқса, унинг яхшиси ва ёмонини фарқига бормаса, умматимнинг мўминига зиён тегишидан ўзини тиймаса, берган ваъдасига вафо қилмаса, у менинг умматим эмас”.
Дарҳақиқат, бундай террорчиларни мусулмон деб бўлмайди. Чунки агар мусулмон бўлганларида мусулмонларга қурол кўтаришмасди. Мусулмонлар байрами бўлган саййидул-айём, ҳажжул-масокин бўлган жумъаи муборакда бундай қабиҳ ишни қилишмасди. Яна Худодан қўрқмасдан Аллоҳ байтига кириб, намоз ўқиб турган намозхонларни қириб, қанча-қанча оилалар боқувчисиз қолди, қанча-қанча аёллар тул қолишди, қанча-қанча етим болалар дунёда кўпайди.
Ҳозирда инсонлар ҳаётига зомин бўлаётган диний экстремизм ва терроризм – Ироқ, Сурия, Афғонистон, Яман, Ливия, Фаластин ва бошқа юртларда мусулмонларни қириб йўқ қилиш, ислом юртларини вайрон қилиш бўйича тизимли режаларни амалга ошираётганлар, ҳадисларда айтилганидек махлуқларнинг энг ёмони, жаҳаннам итлари деб таърифланган ҳавориж гуруҳларини ташкил этиб, ўзини мусулмон деб кўрсатаётган худкушлардир.
Аллоҳ таоло азиз юртимизни тинч, осмонимизни мусаффо ва осойишталигимизни бардавом қилсин! Юртимизни шу каби ғараз ниятли инсонларнинг кирди-корларидан ҳифзу ҳимоясида сақласин!
Ихтиёржон СУЛТОНОВ,
Бувайда тумани “Оққўрғон” масжиди имом-хатиби.
