Аллоҳ ато қилган неъматлари орасида иймон улуғидир. Иймон инсонни яхшиликка чорлайди. Инсонларни чиройли амалларни қилишлига ундайди. Расулуллоҳ соллаллоҳу алайҳи васаллам айтадилар: “Икки хислат бор, унданда афзалроқ хислат йўқ. Бири Аллоҳга иймон келтириш, иккинчиси мусулмонларга наф келтиришликдир”.
Наф келтиришлик – моли, бадани, сўзи билан бўлиши мумкин. Имконимиз бўлса, бева-бечораларга, етимларга, қийналган оилаларга ёрдам берсак, таомлантирсак, кийинтирсак ёки айни совуқ кунларда бир қоп кўмир билан бўлса хам йўқласак, сўзимиз билан уларга тасалли берсак, пулимиз билан ёрдам берсак, энг яхши ишлардан бирини қилган бўламиз.
Бошқа ҳадисда Расулуллоҳ соллаллоҳу алайҳи васаллам айтадилар: “Бир киши ҳеч кимга зулм қилмайман деб тонг оттирса, Аллоҳ ўша банданинг гуноҳини кечиради. Бир киши мазлумга ёрдам бераман, мусулмонни ҳожатини чиқараман деган ният билан тонг оттирса, ҳажжи мабрур савобини беради”.
Қаранг, азизлар, мусулмонни ҳожатини чиқараман деган ниятга шунча ажр, савоб берилса, энди уни амалга оширса қанча савоб бўлади?!Келинглар, қўлимиздан келганича кучимиз, пулимиз, сўзимиз билан-ми яхшилик қилиб энг гўзал хислатга эга бўлайлик, азизлар!
Нуриддин ТИЛЛАБОЕВ,
Учкўприк тумани “Учкўприк” масжиди имом–хатиби
