Бутун ислом олами Рамазон ойини ҳар вақт хурсандчилик ва шодлик билан кутиб оладилар. Чунки бу ой тоат-ибодат, сахийлик, раҳмат ва барака мавсуми саналади. Бундан ҳам ортиқ хурсандчилик борми?
Аллоҳ таоло Қуръони каримда шундай марҳамат қилган: “Айтинг, Аллоҳнинг фазли ва раҳмати билан, бас, албатта шулар сабабли мўминлар шодлансинлар. У тўплаган нарса (бойликлари)дан яхшироқдир (Юнус сураси, 58-оят).
Дарҳақиқат, Аллоҳ нозил қилган Қуръон ва Рамазон рўзаси бошчилигидаги ибодатларни хурсандчилик билан қабул қилиш ўткинчи дунё матоҳларидан минг чандон афзал. Расулуллоҳ соллаллоҳу алайҳи васаллам саҳобаларини ҳам Рамазон ойи учун тайёргарлик кўришга ундар ва бу ишни бу ой рўзасининг хусусиятлари, унга бериладиган улкан савоблар ҳақидаги ҳадислар билан амалга оширар эдилар. Бунга далолат қилувчи ҳадислар кўп. Қуйида уларнинг айримлари билан танишамиз:
“Агар Рамазон ойи кириб келса, осмон эшиклари очилиб, жаҳаннам эшиклари ёпилади ва шайтонлар кишанланади”.
“Жаннатда Раййон номли бир эшик бор. Ундан Қиёмат куни рўзадорлар киради. У кунда: “Рўзадорлар қаерда” деб нидо қилинади. Шунда рўзадорлар ўринларидан турадилар. Улардан бошқа ҳеч ким Раййон эшигидан кира олмайди. Рўзадорлар кириб бўлгач, эшик ёпилади. Шундан кейин у эшикдан ҳеч ким кирмайди (Имом Бухорий ривояти).
Бу улуғ суннатни тарғиб қилиш, бу чақириқ ва хушхабарларни овоза қилиш, одамларга Рамазон фазилати ва барокатини етказиш, бу ойда фурсатни ғанимат билиб, улкан савобларга эришиш ва барчани саодат сари чорлаш барчамизга муносиб вазифа саналади. Мўмин-мусулмон бандалар Рамазон кириб келиши туфайли қалбида мамнуният туюши, Рамазонга алоҳида тайёргарлик кўришга, Рамазон ойидаги савоб ва ажрлардан тўлиқ истеъфода этишга, турли лаззат ва таомларга маҳлиё бўлмасдан, ибодатга эътибор қаратишимиз даркор.
Рамазон барчамиз учун ғаниматли меҳмондир. Рамазон ғофилларни уйғотади, зокирларга мадад беради, олимларга қувват бағишлайди, ибодатга рағбатни оширади, гуноҳ ва хатолардан асрайди, шаҳват ва лаззатлардан узоқлаштиради. Натижада масжидлар тўлиб, қалблар саҳийлашади, ибодатлар кўпаяди, шайтонлар заифлашади.
Аллоҳим, бизларни Рамазонга етиштирганинга шукрлар бўлсин! Бизларни рушду-ҳидоят билан илҳомлантир! Марҳабо, ё Рамазон!
Ҳилолахон КОМИЛОВА,
Фарғона вилояти бош имом хатибининг хотин-қизлар
масалалари бўйича ёрдамчиси, вилоят бош отинойиси
