Ҳар бир киши борадиган жойларига қараб кийим танлаши бу табиий ҳол экани ҳаммамизга маълум. Кийим – инсон зийнати. У киши маънавияти, маданияти, диди ва дунёқарашининг ёрқин кўзгусидир. У инсонни иссиқ-совуқдан сақлайди, авратларини беркитади ва кишига зийнат бўлиб хизмат қилади.
Бугунги кунда жамиятимиз аъзолари орасида кийиниш маъданиятига бўлган талаб кескин ўзгараётганини кўриш мумкин. Бу мавзулар асосан ёшлар учун эканлигини ҳаммамиз яхши билсакда, ёши катталар ҳам бундан мустасно эмаслар.
Ўзбек халқи ўзининг асрлар оша қадрланиб келаётган миллий либослари билан ҳам бутун дунёга довруғ таратган. Бугун оммавий маданият ниқоби остида кириб келаётган ажнабий суратлар ва турли ёзувлар акс этган, ёҳуд кийим борасида ҳаддан ошганларни кўриб ёқа ушлайсан киши. Айниқса, айрим ўсмир йигит ва қизлар устидаги либослар ҳар қандай инсонни таажжубга солиши шубҳасиз.
Маданияти тўғри шаклланмаган ёшлар орасида турли хил чет мамлакатларга тақлид қилишнинг авж олганлиги, оқибатда ўз миллийлигимизнинг қадрсизланиб бораётгани ачинарли ҳол, албатта. Айрим ёшларнинг кийиб юрган кийимлари ҳатто ҳеч қандай маданиятга ҳам тўғри келмайди. Уят ҳисси тўғрисида гапирганда ёзнинг жазирамаси баҳонасида бемалол калта иштон (шортик) кийиб юрганларни кўриб ҳайрон коласан. Парвардигор ҳаммани бирдек яратган. Нега бошқалар исимайди-ю, у исиб кетади? У бошқачами? Йўқ. Унда уят йўқ!
Пайғамбаримиз Муҳаммад алайҳиссалом: «Ҳаё қилмасанг, билганингни қил», деганлар. Ҳаё қилиш, ҳаёли бўлиш инсонга фақат яхшилик келтиради. Уялмаслик эса кўпчиликнинг назарини ҳисобга олмасликдан келиб чиқади.
Жамоат жойига боряпсизми, энг аввало кийимингизга бир қаранг. Шундай кийиниш керакки, сизга ҳеч кимнинг эътирозли нигоҳи тушмасин. Фақат ўзини эмас, бошқаларни ҳам ўйлайдиган одамнинг кўнгли равшан бўлади. Аёллардан фарқли ўлароқ эркакларда «мода» ўзгармайди. Уни мажбуран «ўзгартирмоқчи», яъни «янгилик» киритмоқчи бўлганлар эл назаридан қоладилар.
Биз шу кеча-кундузда кўпчиликни анчадан бери ўйлантираётган масалалар ҳусусида фикр юритдик. Уни сиз ҳам ўйлаб кўринг. Эҳтимол, сиздаги мулоҳазалар бошқачадир.
Иқболжон АЪЗАМОВ,
Қўқон шаҳар «Дегрезлик» масжиди имом-хатиби
