Ҳозирда интернет, телеграмм каналларида асосий қаратилган мавзу коронавирус бўлиб, унинг ҳаққидаги хабарларни асосли-асоссиз равишда тарқатаётган инсонлар кўплаб учрамокда. Афсуски, уларнинг ёлғонлари сабаб, аввало, ўзлари қолаверса, бошқаларга ҳам кўплаб зарарлар етиб келиши мумкинлиги ҳақида ўйлаб кўрсалар тўғри бўлар эди. Мисол учун бу касалликка фалон нарса дори бўлади ёки ундай-бундай экан деб хабар тарқатса, у нарса инсонни бошқа аъзоларига зарар келтирса, агар инсофи бўлса, виждони қийналади. Лекин билсинки, албатта, Аллоҳнинг олдида жавоб беради. Бундан ташқари халқимиз тепасига синовли кунлар келиб турган вақтда одамларни ваҳимага солувчи ёлғон хабарларни тарқатишдан ҳам ўзимизни тийиб турсак, айни муддао бўлар эди. Акс ҳолда асоссиз хабарлар сабаб бизлар катта гуноҳ иш қилиб мўминлик шаънимизга нолойиқ иш қилган бўламиз.
Расулуллоҳ даврларида мусулмонларни жуда қаттиқ очарчилик, қурғоқчилик ушлади. Нарх-наво ниҳоятда қимматлаб кетди. Бир қанча вақт шу аҳвол давом этганидан кейин Расулуллоҳ алайҳиссалом шундай дедилар: “Аллоҳга қасам, бугун кун ботгунча Аллоҳ бизга ризқ етказади”.
Усмон ибн Аффон бу сўзларни эшитиб, “Ҳа, бугун келаркан, қаёқдан келаркин?” деб ўтирмадилар. Дарҳол, озиқ-овқат, бошқа керакли нарсалар юкланган 14 та туяни сотиб олиб, мусулмонларга тарқатдилар. Расулуллоҳ бу моллар Усмондан эканини эшитиб, ниҳоятда хурсанд бўлдилар ва унинг ҳаққига узоқ дуо қилдилар.
Усмон ибн Аффон ана шундай саховатли, бировнинг қийин кунларидан фойдаланишни кўзламайдиган киши эдилар. Ана шу хислатлари сабаб Расуллоҳдан бир неча марта “жаннатни сотиб олди”лар.
Халқнинг қийин ҳолатидан фойдаланиб, нархларни ошираётганлар хулоса қилиши керак. Пайғамбаримиз алайҳиссалом: “Кимки агар мусулмонларни ташвишини қилмаса биздан эмас” дедилар. Аллоҳим ҳеч биримизни ихлосдан айирмасин! Аллоҳ бу халқимиз ва бошқа халқларга туширган синовни тезроқ кўтариб, офият неъматини барқарор ва бардавом қилсин!
Муҳаммаднаби ОРИПОВ,
Риштон тумани бош имом-хатиби
