Ислом динида фарзанд тарбиясига алоҳида эътибор қаратилган. Шариат фарзандга таълим-тарбия бериш, одоб-ахлоқни ўргатиш, ҳалол-ҳаромни ажратишдек муҳим масалаларни ота-онанинг зиммасига юклади.
Тарбия динимизда вожиб амал ҳисобланади. Шунинг учун ҳам амаллар ҳисоб қилинадиган кунда Аллоҳ таолонинг ҳузурида фарзанднинг таълим-тарбияси учун ота-она жавобгар бўлади. Абдуллоҳ ибн Умар розияллоҳу анҳудан қилинган ривоятда Пайғамбаримиз соллаллоҳу алайҳи васаллам: “Ҳар бирингиз раҳбарсиз ва қўл остингиздагиларга жавобгарсизлар”, дедилар.
Фарзандга тўғри таълим-тарбия бериш мусулмон жамиятининг ислоҳ бўлишига ҳисса қўшиш билан биргаликда қиёматга улкан заҳира бўлиб хизмат қилади. Эркакнинг оилани моддий томондан таъминлаш учун кўп вақтини меҳнатга сарфлаши фарзанд тарбиясидаги масъулиятини ҳеч ҳам камайтирмайди. Баъзан эркак киши мол-давлат топаман деб фарзанд тарбиясига беэътибор бўлиб қолади. Натижада эса фарзандга тарбия берилиши лозим бўлган қимматли вақтларни қўлдан чиқаради. Бу жуда катта хато ҳисобланади. Зеро, Пайғамбаримиз саллаллоҳу алайҳи васаллам: “Ота ўз фарзандига чиройли тарбия, гўзал одобдан кўра яхшироқ нарса бера олмайди”, деганлар. Шундай экан, фарзанд тарбиясига алоҳида эътибор қаратиш лозим бўлади.
Хайдарали ХАЙДАРОВ,
Марғилон шаҳар “Жаннатлар калити” масжиди имом-хатиби
