Савол: Ассалому алайкум!
— Нафл намозда сажда қилинган пайтда дуони ўзбекча қилса бўладими?
Жавоб: Ва алайкум ассалом!
—Нафл намозларида ўзбек тилида дуо қилиб бўлмайди. Уламоларимиз асосан ҳадисларда ворид бўлган дуоларни айтиб, дуо қилишни тавсия қилганлар. Жумладан, Абу Ҳурайра разияллоҳу анҳудан ривоят қилинган ҳадиси шарифда айтилишича Пайғамбаримиз соллаллоҳу алайҳи васаллам саждада мана бу дуони қилганлар:
«اللَّهُمَّ اغْفِرْ لي ذَنْبِي كُلَّهُ: دِقَّهُ وَجِلَّهُ، وَأَوَّلَهُ وَآخِرَهُ، وَعَلاَنِيَتَهُ وَسِرَّهُ» (رواه الامام مسلم)
Ўқилиши: “Аллоҳум-мағфирли занбий куллаҳ, диққаҳу ва жиллаҳ ва аввалаҳу ва охироҳ ва алониятаҳу ва сирраҳ”.
Маъноси: “Ё Аллоҳ! Менинг ҳамма гуноҳларимни кечир, кичигини ҳам, каттасини ҳам, аввалгисини ҳам, охиргисини ҳам, очиғини ҳам, махфийсини ҳам кечир” (Имом Муслим ривоятлари).
Расули акрам алайҳиссалом нафл намозларда бундан бошқа дуолари ҳам ривоят қилинган. Валлоҳу аълам.
ЎМИ Фатво ҳайъати
