Савол: Ассалому алайкум!
— Биз Лут қавмини ким бўлганлигини биламиз, улар нима ишлар қилганини ҳам. Энди саволим шундан иборатки, уларга мансуб бўлган одамларни кўрганимизда нима қилайлик, шариат нима дейди? Уларни урайликми, ўлдирайликми ё индамаслик керакми?
Жавоб: Ва алайкум ассалом!
— Уларни қилаётган ишлари шундай бир оғир гуноҳки, Аллоҳ таоло тарихда бу гуноҳни қилган қавмнинг барчасини ҳалок қилган.
فَلَمَّا جَاءَ أَمْرُنَا جَعَلْنَا عَالِيَهَا سَافِلَهَا وَأَمْطَرْنَا عَلَيْهَا حِجَارَةً مِنْ سِجِّيلٍ مَنْضُودٍ
«Энди қачонки Бизнинг фармонимиз (яъни, азобимиз) келганида, у жойларни остин-устин қилиб юбордик ва уларнинг (кофирларнинг) устига Парвардигорингиз даргоҳида белгилаб қўйилган сопол тошларни пайдар-пай ёғдирдик».
Пайғамбаримиз соллаллоҳу алайҳи васаллам айтган эдиларки: «Умматим хусусида қўрққан нарсаларимнинг энг қўрқинчлироғи Лут қавмининг амалидир» (Ибн Можа ривояти).
Бошқа бир ҳадиси шарифда эса: «Лут қавми амалини қилган кимсани Аллоҳ лаънатласин», деб уч бора такрорлаганлар (Ибн Ҳиббон ривояти).
Лекин бундай инсонларни кўрганимизда уларга ўзимиздан келиб чиқиб жазо қўллашимиз мумкин эмас. Уларни жазолашни махсус ваколатли идоралар амалга оширади. Бизнинг вазифамиз чиройли насиҳат ва қилаётган ишлари оғир гуноҳ эканини тушинтиришдир. Валлоҳу аълам.
ЎМИ Фатво ҳайъати
