Ўзбекистондаги Ислом цивилизацияси марказида ўтаётган халқаро анжуманнинг иккинчи куни исломий меросни ўрганиш, рақамлаштириш ва халқаро тарғибот ишларини мутлақо янги босқичга олиб чиқувчи тарихий ҳужжатларни қабул қилиш билан давом этди.
Анжуман доирасида Ўзбекистондаги Ислом цивилизацияси маркази, ТУРКСОЙ ва Халқаро Туркий академия ўртасида сунъий интеллект асосида ягона электрон платформа яратиш бўйича келишувга эришилди. Шунингдек, халқаро хаттотлар танловини ўтказиш ва Имом ал-Бухорий номидаги Халқаро мукофотни таъсис этиш юзасидан муҳим тўхтамларга келинди. Ўзбекистон халқаро исломшунослик академияси ва ICESCO, Имом Мотуридий халқаро илмий-тадқиқот маркази ва Туркиянинг Ислом тадқиқотлари маркази (ISAM) ўртасида англашув меморандумлари имзоланди.
Юртимиздаги Имом Мотуридий, Имом Бухорий ва Имом Термизий халқаро марказлари хорижий илмий муассасалар билан шартномалар тузиб, ҳадисшунослик, мотуридийлик ва қўлёзмаларни каталоглаштириш йўналишида глобал ҳамкорликни йўлга қўйдилар. Диний-маърифий соҳада тажриба алмашиш ва фиқҳий тадқиқотларни мустаҳкамлаш мақсадида Ўзбекистон мусулмонлари идораси ва Иордания Ҳошимийлар Подшоҳлигининг Фатво уйи ўртасида икки томонлама ҳамкорлик меморандуми имзоланди.
Иккинчи куннинг энг муҳим якуни сифатида анжуман иштирокчилари томонидан Тошкент декларацияси ҳамда Ислом цивилизацияси марказини 2027–2030 йилларда ривожлантириш бўйича “Йўл харитаси” қабул қилинди. Бу келишувлар форумнинг фақатгина фикр алмашиш майдони эмас, балки аниқ амалий натижаларга йўналтирилган нуфузли халқаро платформа эканини яна бир бор исботлади.
***
O‘zbekistondagi Islom sivilizatsiyasi markazida o‘tayotgan xalqaro anjumanning ikkinchi kuni islomiy merosni o‘rganish, raqamlashtirish va xalqaro targ‘ibot ishlarini mutlaqo yangi bosqichga olib chiquvchi tarixiy hujjatlarni qabul qilish bilan davom etdi.
Anjuman doirasida O‘zbekistondagi Islom sivilizatsiyasi markazi, TURKSOY va Xalqaro Turkiy akademiya o‘rtasida sun’iy intellekt asosida yagona elektron platforma yaratish bo‘yicha kelishuvga erishildi. Shuningdek, xalqaro xattotlar tanlovini o‘tkazish va Imom al-Buxoriy nomidagi Xalqaro mukofotni ta’sis etish yuzasidan muhim to‘xtamlarga kelindi. O‘zbekiston xalqaro islomshunoslik akademiyasi va ICESCO, Imom Moturidiy xalqaro ilmiy-tadqiqot markazi va Turkiyaning Islom tadqiqotlari markazi (ISAM) o‘rtasida anglashuv memorandumlari imzolandi.
Yurtimizdagi Imom Moturidiy, Imom Buxoriy va Imom Termiziy xalqaro markazlari xorijiy ilmiy muassasalar bilan shartnomalar tuzib, hadisshunoslik, moturidiylik va qo‘lyozmalarni kataloglashtirish yo‘nalishida global hamkorlikni yo‘lga qo‘ydilar. Diniy-ma’rifiy sohada tajriba almashish va fiqhiy tadqiqotlarni mustahkamlash maqsadida O‘zbekiston musulmonlari idorasi va Iordaniya Hoshimiylar Podshohligining Fatvo uyi o‘rtasida ikki tomonlama hamkorlik memorandumi imzolandi.
Ikkinchi kunning eng muhim yakuni sifatida anjuman ishtirokchilari tomonidan Toshkent deklaratsiyasi hamda Islom sivilizatsiyasi markazini 2027–2030 yillarda rivojlantirish bo‘yicha “Yo‘l xaritasi” qabul qilindi. Bu kelishuvlar forumning faqatgina fikr almashish maydoni emas, balki aniq amaliy natijalarga yo‘naltirilgan nufuzli xalqaro platforma ekanini yana bir bor isbotladi.
