“Янги Ўзбекистоннинг тинчлик ва маънавият тарғиботчилари бўламиз” ташаббуси доирасида ўтказиб келинаётган намунавий-амалий тадбирнинг навбатдагиси Сўх туманида ўтказилди. Тадбирга Фарғона вилояти бош имом-хатиби ўринбосари Алишер домла Наимов бошчилик қилди.
“Иноятуллоҳ” масжидида ўтказилган ташкилий йиғилишда тажрибали имом-хатиблардан иборат Ишчи гуруҳ тузилиб, улар ўртасида вазифалар тақсимланди. Алишер домла амалий ишлар йўналишлари, гуруҳ аъзоларининг ҳамкорлиги ва маҳаллаларда олиб бориладиган маънавий ишлар самарадорлигини ошириш юзасидан кўрсатмалар берди.
Ишчи гуруҳ фаолияти уч йўналишда ташкил этилди. Жумладан, ҳожилар иштирокида фуқаролар билан суҳбатлар ўтказилди, маҳалланинг муаммоли хонадонлари аниқланди ва уларда тарғибот ҳамда амалий ёрдам ишлари амалга оширилди.
Тадбир давомида имом-хатиблар томонидан ижтимоий ва маънавий кўмакка муҳтож фуқаролар билан маърифий суҳбатлар ўтказилди, аразлашган оилаларни яраштириш мақсадида олиб борилган суҳбатлар натижасида икки хонадонда ажримнинг олдини олишга эришилди.
Шунингдек, эҳтиёжманд, ногирон ва кекса фуқаролар истиқомат қилаётган хонадонларга борилиб, уларга моддий ёрдам кўрсатилди.
Ишчи гуруҳ аъзолари маҳаллий масжидларда жума намозини адо этиб, “Ушр – барака омили” мавзусида маърузалар ўқишди. Маърузаларда етук мусулмон шахснинг жамият ва иқтисоддаги масъулияти, ҳалол меҳнатнинг фазилати ҳақида сўз юритилди.
Тадбир якунида амалга оширилган ишлар таҳлил қилиниб, Сўх туманидаги масжид имом-хатибларининг фаолиятида кузатилган камчиликларни бартараф этиш бўйича кўрсатма ва тавсиялар берилди.
***
“Yangi O‘zbekistonning tinchlik va ma’naviyat targ‘ibotchilari bo‘lamiz” tashabbusi doirasida o‘tkazib kelinayotgan namunaviy-amaliy tadbirning navbatdagisi So‘x tumanida o‘tkazildi. Tadbirga Farg‘ona viloyati bosh imom-xatibi o‘rinbosari Alisher domla Naimov boshchilik qildi.
“Inoyatulloh” masjidida o‘tkazilgan tashkiliy yig‘ilishda tajribali imom-xatiblardan iborat Ishchi guruh tuzilib, ular o‘rtasida vazifalar taqsimlandi. Alisher domla amaliy ishlar yo‘nalishlari, guruh a’zolarining hamkorligi va mahallalarda olib boriladigan ma’naviy ishlar samaradorligini oshirish yuzasidan ko‘rsatmalar berdi.
Ishchi guruh faoliyati uch yo‘nalishda tashkil etildi. Jumladan, haj ziyoratidan qaytgan fuqarolar bilan suhbatlar o‘tkazildi, mahallaning muammoli xonadonlari aniqlandi va ularda targ‘ibot hamda amaliy yordam ishlari amalga oshirildi.
Tadbir davomida imom-xatiblar tomonidan ijtimoiy va ma’naviy ko‘makka muhtoj fuqarolar bilan ma’rifiy suhbatlar o‘tkazildi, arazlashgan oilalarni yarashtirish maqsadida olib borilgan suhbatlar natijasida ikki xonadonda ajrimning oldini olishga erishildi.
Shuningdek, ehtiyojmand, nogiron va keksa fuqarolar istiqomat qilayotgan xonadonlarga borilib, ularga moddiy yordam ko‘rsatildi.
Ishchi guruh a’zolari mahalliy masjidlarda juma namozini ado etib, “Ushr – baraka omili” mavzusida ma’ruzalar o‘qishdi. Ma’ruzalarda yetuk musulmon shaxsning jamiyat va iqtisoddagi mas’uliyati, halol mehnatning fazilati haqida so‘z yuritildi.
Tadbir yakunida amalga oshirilgan ishlar tahlil qilinib, So‘x tumanidagi masjid imom-xatiblarining faoliyatida kuzatilgan kamchiliklarni bartaraf etish bo‘yicha ko‘rsatma va tavsiyalar berildi.
