Бисмиллаҳир Роҳманир Роҳийм
Алҳамдулиллаҳ, ҳар куни эрта тонгда тўрт мучангиз соғ-саломат уйғонасиз. Кўзларингиз кўряпти, қулоқларингиз эшитяпти, қўл-оёқларингиз ҳаракатланяпти. Бунинг барчаси Аллоҳнинг марҳаматидандир. Аллоҳ таолонинг берган бу неъматларининг шукронасини қандай адо этиш мумкин?!
Бу ҳақда Расулуллоҳ соллаллоҳу алайҳи васаллам: “Ҳар бирингиз бўғин ва суяклар устида тонг оттирганингиз учун бир садақа бор. Ҳар бир тасбеҳингиз – садақа. Ҳар бир таҳмид (Алҳамдулиллаҳ) – садақа, ҳар бир таҳлил (Лаа илаҳа иллаллоҳ) – садақа, ҳар бир такбир – садақа, яхшиликка буюришингиз ҳам, ёмонликдан қайтаришингиз ҳам садақадир. Энди буларнинг ҳаммаси учун икки ракат зуҳо намоз ўқишингиз кифоя қилади”, деганлар (Имом Муслим ривояти).
Аллоҳнинг берган офият неъматига шукр қилиш уни янада зиёда қилади. Ахир офиятдан ҳам улуғроқ неъмат борми?
Аллоҳнинг берган беҳисоб неъматларининг шукри учун икки ракат зуҳо намозини адо этинг! Роббимизнинг карами кенглигини, ўта сахийлигини қаранг, бор йўғи 2 ёки 3 дақиқада адо этиладиган икки ракат намозингизни шукрона сифатида қабул қиляпти. Бундан ташқари, Аллоҳ таоло: «Қасамки, агар шукр қилсангиз, албатта, сизга зиёда қиламан» деб марҳамат қилган. Агар Аллоҳ таолонинг сизга берган офият неъмати учун шукр қилсангиз, ҳеч шак-шубҳасиз Аллоҳ сизга Ўзининг марҳамати ва фазли билан неъматларини янада зиёда қилади.
Расулуллоҳ соллаллоҳу алайҳи васаллам: “Ким бомдодни жамоат билан ўқиса, сўнгра қуёш чиққунича Аллоҳни зикр қилиб ўтирса, кейин икки ракат намоз ўқиса, унинг учун ҳаж ва умранинг ажри тўлиқ, тўлиқ, тўлиқ берилади”, дедилар (Имом Термизий ривояти).
Расулуллоҳ соллаллоҳу алайҳи васаллам зуҳо намозини адо этганларга ҳаж ва умранинг савоби мукаммал ҳамда тўлиқ берилишини 3 маротаба такрорладилар. Қандай қилиб инсон осонгина ҳаракат билан шундай улкан мукофотларга эришишдан маҳрум қолиши мумкин? Аллоҳ таоло Ўзининг марҳамати ила бу амални осон қилиб қўйди. Бу намознинг адо этилиши осон бўлса-да, унда қанчадан-қанча фазилатлар бор.
Зуҳо намозининг энг ози икки ракат ўқиш мумкин. 4 ёки 8 ракат ўқиса ҳам бўлади. Айримлар унинг ракатларининг чегараси йўқ дейишади. Аммо 2 ракат кифоя қилади. Энг муҳими зуҳо намозини қуёш чиққандан то пешин намозининг ўқилишига бир соат қолгунча ўқиш мумкин. Ишга кетишдан олдин уйда ҳам, ишхонада ҳам ўқиб олса бўлади. Бор йўғи 2 ёки 3 дақиқа вақт кетади, аммо улкан савобларга эришилади. Қандай қилиб инсон шундай улкан неъматни қўлдан чиқариши мумкин, ахир унга эришиш жуда осон-ку?!
Расулуллоҳ соллаллоҳу алайҳи васаллам зуҳо намозида “Шамс” ва “Зуҳо” сураларини ўқир эдилар.
Даврон НУРМУҲАММАД
***
Bismillahir Rohmanir Rohiym
Alhamdulillah, har kuni erta tongda to‘rt muchangiz sog‘-salomat uyg‘onasiz. Ko‘zlaringiz ko‘ryapti, quloqlaringiz eshityapti, qo‘l-oyoqlaringiz harakatlanyapti. Buning barchasi Allohning marhamatidandir. Alloh taoloning bergan bu ne’matlarining shukronasini qanday ado etish mumkin?!
Bu haqda Rasululloh sollallohu alayhi vasallam: “Har biringiz bo‘g‘in va suyaklar ustida tong ottirganingiz uchun bir sadaqa bor. Har bir tasbehingiz – sadaqa. Har bir tahmid (Alhamdulillah) – sadaqa, har bir tahlil (Laa ilaha illalloh) – sadaqa, har bir takbir – sadaqa, yaxshilikka buyurishingiz ham, yomonlikdan qaytarishingiz ham sadaqadir. Endi bularning hammasi uchun ikki rakat zuho namoz o‘qishingiz kifoya qiladi”, deganlar (Imom Muslim rivoyati).
Allohning bergan ofiyat ne’matiga shukr qilish uni yanada ziyoda qiladi. Axir ofiyatdan ham ulug‘roq ne’mat bormi?
Allohning bergan behisob ne’matlarining shukri uchun ikki rakat zuho namozini ado eting! Robbimizning karami kengligini, o‘ta saxiyligini qarang, bor yo‘g‘i 2 yoki 3 daqiqada ado etiladigan ikki rakat namozingizni shukrona sifatida qabul qilyapti. Bundan tashqari, Alloh taolo: «Qasamki, agar shukr qilsangiz, albatta, sizga ziyoda qilaman» deb marhamat qilgan. Agar Alloh taoloning sizga bergan ofiyat ne’mati uchun shukr qilsangiz, hech shak-shubhasiz Alloh sizga O‘zining marhamati va fazli bilan ne’matlarini yanada ziyoda qiladi.
Rasululloh sollallohu alayhi vasallam: “Kim bomdodni jamoat bilan o‘qisa, so‘ngra quyosh chiqqunicha Allohni zikr qilib o‘tirsa, keyin ikki rakat namoz o‘qisa, uning uchun haj va umraning ajri to‘liq, to‘liq, to‘liq beriladi”, dedilar (Imom Termiziy rivoyati).
Rasululloh sollallohu alayhi vasallam zuho namozini ado etganlarga haj va umraning savobi mukammal hamda to‘liq berilishini 3 marotaba takrorladilar. Qanday qilib inson osongina harakat bilan shunday ulkan mukofotlarga erishishdan mahrum qolishi mumkin? Alloh taolo O‘zining marhamati ila bu amalni oson qilib qo‘ydi. Bu namozning ado etilishi oson bo‘lsa-da, unda qanchadan-qancha fazilatlar bor.
Zuho namozining eng ozi ikki rakat o‘qish mumkin. 4 yoki 8 rakat o‘qisa ham bo‘ladi. Ayrimlar uning rakatlarining chegarasi yo‘q deyishadi. Ammo 2 rakat kifoya qiladi. Eng muhimi zuho namozini quyosh chiqqandan to peshin namozining o‘qilishiga bir soat qolguncha o‘qish mumkin. Ishga ketishdan oldin uyda ham, ishxonada ham o‘qib olsa bo‘ladi. Bor yo‘g‘i 2 yoki 3 daqiqa vaqt ketadi, ammo ulkan savoblarga erishiladi. Qanday qilib inson shunday ulkan ne’matni qo‘ldan chiqarishi mumkin, axir unga erishish juda oson-ku?!
Rasululloh sollallohu alayhi vasallam zuho namozida “Shams” va “Zuho” suralarini o‘qir edilar.
Davron NURMUHAMMAD
