Бугун масжидларимиз қайта чирой очмоқда, янги қиёфа кашф этмоқда. Мўмин-мусулмонлар учун яратилаётган қулай шарт-шароитлар, миллий ва замонавий руҳдаги масжид бино ва иншоотлари нафақат чиройи билан, балки мустаҳкамлиги билан кўзни қувонтиради ҳамда узоқ йиллар давомида халқимизга хизмат қилади. Шуни ҳам таъкидлаш керакки, нафақат шаҳар марказлари, балки чекка ҳудудлардаги масжидлар ҳам бугун янги қиёфа кашф этмоқда. Бувайда туманидаги «Ҳусан қори» масжиди шулар жумласидан.
Бувайда туманининг Ўрта Қўнғирот, Чўмбоғиш, Шўрқишлоқ маҳалласида истиқомат қилувчи мўмин-мусулмонларга хизмат қилаётган «Ҳусан қори» масжидининг аввалги хонақоҳида 200 киши ибодат қилиб келган бўлса, эндиликда унинг ўрнига 1000 кишини ўз бағрига сиғдира оладиган ибодатгоҳ қад кўтармоқда. Бундан ташқари, янги таҳоратхона ва маъмурий бинолар ҳам янги қиёфа кашф этмоқда. Асосийси, масжиднинг янги лойиҳаси миллий ва замонавий дизайнни уйғунлаштирилган, мустаҳкам ҳолда бунёд этилмоқда.
Жоме дастлабки қурилиш ишлари охири етгани муносабати билан тадбир ташкил этилди. Унда вилоят бош имом-хатиби Убайдуллоҳ домла Абдуллаев ҳамда бир гуруҳ уламолар жомега иштирок этиб, масжид жамоасини қутлашди. Ушбу даргоҳ динимиз ривожи ҳамда халқимиз илму маърифатини ошишида маёқ бўлишини тилаб дуога қўл очилди.
