Бугун, 28 ноябрь куни юртдошларимиз жума намозидан сўнг ихлос ила истисқо намозини адо этдилар.
Намоздан кейин имом бошчилигида қиблага юзланган ҳолда: “Ё Аллоҳ! Қалбларни иймон билан, ерни эса ёмғир ва майин томчилар билан сероб қил”, дея дуога қўл очдилар.
Ҳар бир юртдошимизнинг қалбини илоҳий бир шукуҳ қамраб олди. Қалблар бирдек Аллоҳнинг раҳматидан умидвор, дуолар ижобат бўлишига ишонч билан тўлиб тошди.
Аллоҳга юзланган қалблар юмшаб, гуноҳларини англаб, тавба қилишга, Аллоҳга янада яқинлашишга интилди десак муболаға бўлмайди.
Зеро, ривоятларда Пайғамбаримиз соллаллоҳу алайҳи ва саллам ҳам жума намози вақтида истисқо ўқиганлари ва тез орада дуолари ижобат бўлгани келтирилади.
Маълумот ўрнида айтиб ўтиш жоизки, 2025 йилда кузатилаётган глобал иқлим ўзгариши шароитида истисқо намозлари Иордания, Бирлашган Араб Амирликлари, Қувайт, Саудия Арабистони, Қатар, Покистон каби давлатларда ҳам кенг миқёсда адо этилган.
Аллоҳ таоло қилинган ушбу ибодат ва дуоларни қабул айлаб, тез орада ер юзига, хоссатан, юртимизга баракали ёмғирларини ёғдирсин!
***
Bugun, 28 noyabr kuni yurtdoshlarimiz juma namozidan so‘ng ixlos ila istisqo namozini ado etdilar.
Namozdan keyin imom boshchiligida qiblaga yuzlangan holda: “Yo Alloh! Qalblarni iymon bilan, yerni esa yomg‘ir va mayin tomchilar bilan serob qil”, deya duoga qo‘l ochdilar.
Har bir yurtdoshimizning qalbini ilohiy bir shukuh qamrab oldi. Qalblar birdek Allohning rahmatidan umidvor, duolar ijobat bo‘lishiga ishonch bilan to‘lib toshdi.
Allohga yuzlangan qalblar yumshab, gunohlarini anglab, tavba qilishga, Allohga yanada yaqinlashishga intildi desak mubolag‘a bo‘lmaydi.
Zero, rivoyatlarda Payg‘ambarimiz sollallohu alayhi va sallam ham juma namozi vaqtida istisqo o‘qiganlari va tez orada duolari ijobat bo‘lgani keltiriladi.
Ma’lumot o‘rnida aytib o‘tish joizki, 2025 yilda kuzatilayotgan global iqlim o‘zgarishi sharoitida istisqo namozlari Iordaniya, Birlashgan Arab Amirliklari, Quvayt, Saudiya Arabistoni, Qatar, Pokiston kabi davlatlarda ham keng miqyosda ado etilgan.
Alloh taolo qilingan ushbu ibodat va duolarni qabul aylab, tez orada yer yuziga, xossatan, yurtimizga barakali yomg‘irlarini yog‘dirsin!
