2025 йил 29-30 апрель кунлари Самарқанд шаҳрида “Мотуридийлик – бағрикенглик, мўътадиллик ва маърифат таълимоти” мавзусида халқаро илмий-амалий конференция ўтказиляпти. Унда 20 дан ортиқ мамлакатдан етмишдан ошиқ уламо ва олимлар, халқаро ташкилот раҳбарлари, муфтийлар, таниқли уламолар ва илмий тадқиқотчилар қатнашяпти.
Мазкур тадбир доирасида Бирлашган Араб Амирлигидаги Мусулмон донишмандлари кенгаши бош котиби Муҳаммад Абдуссалом, Миср Араб Республикаси Вақф ишлари вазири Усома Азҳарий, Миср Араб Республикаси муфтийси Муҳаммад Назир Айяд, Туркия Диёнат ишлари бошқармаси мутасаддилари, Қирғизистон муфтийси Шайх Абдулазиз Закиров, “Ҳинд уламолари жамияти” президенти Мавлоно Маҳмуд Маданий каби Ислом оламининг нуфузли шахслари ҳамда Иордания, Қозоғистон, Тожикистон, Россия, Малайзия, Германия, Бразилия, Буюк Британия, Корея, Индонезия, Покистон, Италия, АҚШ каби давлатларнинг илмий тадқиқот ва таълим муассасаларининг етук олим ва мутахассислари юртимизда меҳмон бўлиб турибди.
Меҳмонларни Тошкент ва Самарқанд халқаро аэропортида диний-маърифий соҳа мутасаддилари кутиб олиб, уларни диёримизга ташрифи билан қутлаш баробарида халқаро анжуманнинг аҳамияти, таниқли уламолар ва аҳли илмларнинг юртимизга тез-тез ташрифи динимиз равнақи ва халқимиз манфаати йўлида хизмат қилаётгани ҳақида сўз юритдилар.
Анжуманда иштирокчилар Имом Мотуридий ва мотуридийлик таълимоти моҳияти, мотуридийлик намояндалари ва асарлари, мотуридийлик таълимотига оид замонавий тадқиқотлар, глобаллашув жараёнида мўътадил ислом таълимотининг аҳамияти, замонавий исломшунослик тадқиқотлари сингари муҳим илмий масалаларни муҳокама қиладилар.
***
2025-yil 29-30-aprel kunlari Samarqand shahrida “Moturidiylik – bag‘rikenglik, mo‘’tadillik va ma’rifat ta’limoti” mavzusida xalqaro ilmiy-amaliy konferensiya o‘tkazilyapti. Unda 20 dan ortiq mamlakatdan yetmishdan oshiq ulamo va olimlar, xalqaro tashkilot rahbarlari, muftiylar, taniqli ulamolar va ilmiy tadqiqotchilar qatnashyapti.
Mazkur tadbir doirasida Birlashgan Arab Amirligidagi Musulmon donishmandlari kengashi bosh kotibi Muhammad Abdussalom, Misr Arab Respublikasi Vaqf ishlari vaziri Usoma Azhariy, Misr Arab Respublikasi muftiysi Muhammad Nazir Ayyad, Turkiya Diyonat ishlari boshqarmasi mutasaddilari, Qirg‘iziston muftiysi Shayx Abdulaziz Zakirov, “Hind ulamolari jamiyati” prezidenti Mavlono Mahmud Madaniy kabi Islom olamining nufuzli shaxslari hamda Iordaniya, Qozog‘iston, Tojikiston, Rossiya, Malayziya, Germaniya, Braziliya, Buyuk Britaniya, Koreya, Indoneziya, Pokiston, Italiya, AQSh kabi davlatlarning ilmiy tadqiqot va ta’lim muassasalarining yetuk olim va mutaxassislari yurtimizda mehmon bo‘lib turibdi.
Mehmonlarni Toshkent va Samarqand xalqaro aeroportida diniy-ma’rifiy soha mutasaddilari kutib olib, ularni diyorimizga tashrifi bilan qutlash barobarida xalqaro anjumanning ahamiyati, taniqli ulamolar va ahli ilmlarning yurtimizga tez-tez tashrifi dinimiz ravnaqi va xalqimiz manfaati yo‘lida xizmat qilayotgani haqida so‘z yuritdilar.
Anjumanda ishtirokchilar Imom Moturidiy va moturidiylik ta’limoti mohiyati, moturidiylik namoyandalari va asarlari, moturidiylik ta’limotiga oid zamonaviy tadqiqotlar, globallashuv jarayonida mo‘’tadil islom ta’limotining ahamiyati, zamonaviy islomshunoslik tadqiqotlari singari muhim ilmiy masalalarni muhokama qiladilar.
