Бугун юртимизда 9-май — Хотира ва қадрлаш куни кенг нишонланмоқда. Иккинчи жаҳон урушида ҳалок бўлган аждодларимиз ёдга олиниб, бу куни улар хотирланади. Шунингдек, урушда жонини тикиб, ватани, халқи учун фидоийлик кўрсатган кесалар ҳолидан хабар олиниб, уларга ҳурмат-эҳтиром кўрсатилади.
Ғанижон ота Аҳмадмаджонов, Эргаш ота Тошбоев ва Мўминжон ота Тошматовлар иккинчи жаҳон уруши иштирокчиларидан. Улар Қува туманида истиқомат қилади. Ватан, халқ, оила ва фарзандлари ҳимояси йўлида уруш майдонига кирганлар. Шунинг учун ҳам бугунги тинчлик, осойишталикнинг қадрини ҳаммадан ҳам кўра кўпроқ ҳис қиладилар.
Фарғона вилояти бош имом-хатиби Убайдуллоҳ домла Абдуллаев Қува туманига ташриф буюриб, туман бош имом-хатиби Ғанижон Исломов, «Қўшкечик» масжиди имом-хатиби Бозорали Хомидов ва бошқа мутасаддилар ҳамроҳлигида уруш қатнашчилари ҳолидан хабар олди. Ғанижон ота, Эргаш ота ва Мўминжон оталар билан дилдан суҳбат қурдилар. Тиловати Қуръон қилиниб, ўтганлар ҳаққига ҳамда ватанимиз тинчлиги, халқимиз фаровонлиги ва динимиз равнақи юксалишини сўраб дуога қўл очилди.
Фарғона вилояти вакиллиги Матбуот хизмати
