Юртимиз мустақилликка эришган илк йилларда 14 январь санасида Ўзбекистон Республикасининг Қуролли кучларига асос солинди. Айнан шу сана ҳар йили мамлакатимизда Ватан ҳимоячилари куни деб белгиланиб, юртимиз бўйлаб кенг нишонланиб келинмоқда.
2022 йил 12 январь куни Фарғона вилояти Божхона бошқармасида Ватан ҳимоячилари куни муносабати билан бошқарма ходимлари иштирокида учрашув бўлиб ўтди. Унда Фарғона шаҳар бош имом-хатиби Журабек домла Рахманов иштирок этди.
Журабек домла Ватанимизни севиш, ҳар бир қариш ерини асраб-авайлаш шарафли ва савобли бўлиш билан бирга, барчамизнинг бурчимиз экани айтиб ўтди.
Пайғамбаримиз соллаллоҳу алайҳи ва саллам: “Аллоҳ таоло розилиги йўлида бир кун чегара ҳудудида посбонлик қилиш бир ой кечалари ибодат қилиб, кундузлари нафл рўза тутишдан афзалдир”, деганлар. Ушбу ҳадис инсон ўзи яшаб турган Ватани, дини, оила аъзоларини ҳимоя қилиши улуғ ва хайрли амаллар сирасига кириши маълум бўлади.
Юртни асраш, қўриқлаш, Ватан ҳимояси учун ҳарбийлар сафида туриш динимиз таълимотида улкан савобли амал саналади. Бинобарин, шижоатли палласини, борингки, ҳаётларини шарафли бурчини адо этиш учун бахшида қилган ўғлонларнинг хизмати сабаб элу юрт хотиржам, заминимиз осойишталик ҳукм сурмоқда.
Тадбир сўнгида Божхона соҳасида фаолият олиб бораётган барча ходимларни 14 январь “Ватан ҳимоячилари куни” муносабати билан шаҳар бош имом-хатиби муборакбот этди.
Ҳусниддин Турсунзода,
Фарғона шаҳар «Нур» масжиди имом-хатиби
