Рамазон ойининг аввалида юртимиз масжидлари бўйлаб бошланган хатми Қуръонлар Қадр кечасида ниҳоясига етди. Ҳар бир ояти шифо, ҳар бир ҳарфи нур бўлган Қуръони карим тиловати бу муборак ой давомида масжидларимиз осмонида жаранг сочди. Жумладан, вилоятимиздаги 195 та масжидда ўтказилган хатми Қуръонлар кўтаринки кайфиятда якунланди.
Қори ва ҳофизлар томонидан ихлос билан ўқилган хатми Қуръонлар юртдошларимизнинг қалбига нур, кўнгилларига таскин бўлди. Ушбу шарафли хизматнинг якунида халқимиз дуо ва истиғфор билан Aллоҳ таолога илтижо қилиб, юртимизга тинчлик, фаровонлик, мўмин-мусулмонларга омонлик тилашди.
Қадр кечаси – минг ойдан афзал кеча. Бу кечада Aллоҳнинг раҳмати жўш уриб, мўминларнинг ибодатлари қабул бўладиган онлар берилади. Хатми Қуръон якунида айтилган дуолар сабаб Aллоҳ таоло юртимизга файз, халқимизга меҳр-оқибат, фарзандларимизга илм ва камолот ато этсин!
Aллоҳ хатми Қуръонларни, қилган дуоларимизни ўз даргоҳида мақбул айласин. Ушбу улуғ кечада қилган ибодатларимиз охиратимиз учун нур бўлиб ёзилсин!
***
Ramazon oyining avvalida yurtimiz masjidlari boʼylab boshlangan xatmi Qurʼonlar Qadr kechasida nihoyasiga yetdi. Har bir oyati shifo, har bir harfi nur boʼlgan Qurʼoni karim tilovati bu muborak oy davomida masjidlarimiz osmonida jarang sochdi. Jumladan, viloyatimizdagi 195 ta masjidda oʼtkazilgan xatmi Qurʼonlar koʼtarinki kayfiyatda yakunlandi.
Qori va hofizlar tomonidan ixlos bilan oʼqilgan xatmi Qurʼonlar yurtdoshlarimizning qalbiga nur, koʼngillariga taskin boʼldi. Ushbu sharafli xizmatning yakunida xalqimiz duo va istigʼfor bilan Alloh taologa iltijo qilib, yurtimizga tinchlik, farovonlik, moʼmin-musulmonlarga omonlik tilashdi.
Qadr kechasi – ming oydan afzal kecha. Bu kechada Allohning rahmati joʼsh urib, moʼminlarning ibodatlari qabul boʼladigan onlar beriladi. Xatmi Qurʼon yakunida aytilgan duolar sabab Alloh taolo yurtimizga fayz, xalqimizga mehr-oqibat, farzandlarimizga ilm va kamolot ato etsin!
Alloh xatmi Qurʼonlarni, qilgan duolarimizni oʼz dargohida maqbul aylasin. Ushbu ulugʼ kechada qilgan ibodatlarimiz oxiratimiz uchun nur boʼlib yozilsin!
