Бугун, Фарғона вилояти бош имом-хатиби Убайдуллоҳ домла Абдуллаев ҳамда вилоят бош имом-хатиби ўринбосари Алишер домла Наимов Фарғона шаҳридаги “Муҳаммад авлиё” жоме масжидига ташриф буюрдилар.
Жамоат билан пешин намозини адо этиб, намозхонларга муқаддас динимиз тараққиёти йўлида бугунги кунда мамлакатимизда олиб борилаётган хайрли ишлар ҳақида сўз юритдилар.
Вилоят бош имом-хатибига “Муҳаммад авлиё” масжидининг янги лойиҳаси тақдим этилди. Убайдуллоҳ домла мутахассислар билан учрашиб, қурилаётган бинонинг мўмин-мусулмонлар учун қулай ва шинам бўлиши, хонақоҳларни кенг ва ёруғ, замонавийлик ва миллийликка уйғунлашган ҳолда олиб бориш, атрофларини обод ва кўркам этишга алоҳида урғу қаратиш борасидаги тавсиялар берилди.
Ташриф якунида дуога қўл очилиб, ушбу жоме масжидни барпо этилишида бошчилик қилган мутасаддилар, кенг жамоатчилик ҳамда қурувчи-муҳандислар, саховатпеша мурувватли инсонларнинг ҳаққиларига ва уларнинг ўтган марҳумларининг руҳи покига Қуръони карим оятлари тиловат қилиниб дуои хайрлар қилдилар.
