Ҳукуматнинг тегишли фармойишига биноан, “Наврўз” умумхалқ байрамини муносиб нишонлашга тайёргарлик кўриш, шунингдек маҳаллалар, аҳоли турар жойларини ободонлаштириш ва кўкаламзорлаштириш мақсадида 2021 йил 13 март куни мамлакатимизнинг барча ҳудудларида “Обод ва кўркам маҳаллам” ободонлаштириш ва кўкаламзорлаштириш умумхалқ хайрия ҳашарини ўтказиш белгиланган эди.
Шунга кўра, вилоятимиздаги масжидлар, зиёратгоҳлар ва қабристонларда ободонлаштириш ва кўкаламзорлаштириш ишларини қизғин равишда олиб борилмоқда. Олиб борилаётган хайрия ҳашарида вилоятдаги қабристон ва зиёратгоҳлар тозаланиб, махсус техникаларни жалб қилган ҳолда чиқиндилар чиқариб ташланмоқда. Мевали ва манзарали дарахтлар оқланиб, шакл берилаётир. Шунингдек, йўлаклар ҳамда майдонлар ободонлаштирилиб, манзарали дарахт ва мавсумий гул кўчатлари ўтказиляпти.
Вилоят бош имом-хатиби Убайдуллоҳ домла Абдуллаев Қўштепа туманининг Намуна ва Қийқи маҳалласидага «Ғиштмон» қабристонида ободонлаштириш ишларида иштирок этаётган ҳашарчилар билан учрашди.
— Поклик иймоннинг ярми ҳамда файзу барака омили, буни чуқур англаган ҳар бир иймон соҳиби ўзи яшаб турган маскани, жамоатчилик жойлари, ибодатгоҳ ва зиёратгоҳларини, ҳатто кўз илғамас жойларни ҳам пок тутишга интилади. Сизлар ана шундай хайрли иш устидасиз, — дея таъкидлади вилоят бош имом-хатиби.
Қуръон тиловат қилиниб, ўтганлар ҳақига ҳамда ҳашарчиларга куч-қувват, ғайрат тилаб дуо қилинди.
