Пойтахтимизда ташкил этилган “Ислом – тинчлик ва эзгулик дини” мавзусидаги халқаро нуфузли конференция қизғин суҳбатларга, ўзаро фикр алмашинувларга бой бўлмоқда. Унда ислом динининг тинчликпарвар ғоялари хусусида батафсил сўз юритилмоқда. Мазкур халқаро конференция исломнинг эзгу ғояларини тарғиб этишда олимларнинг якдил, ҳамжиҳат бўлишларига чорлаётгани билан ҳам аҳамиятли.
Кавказ мусулмонлари идораси раиси, муфтий Шайхул ислом Аллоҳшукур Пошозода бу нуфузли конференция ҳақида фикрларини билдирди:
– Ўзбекистон Республикаси Президенти Шавкат Мирзиёев давлат қурилишида шундай улуғвор меросга, бой маънавий манба ва чуқур мазмунли асосга таянадики, бу ютуқлар ўз номини тарихга зарҳал ҳарфлар билан ёздириб, Ўзбекистоннинг асрлар давомида чўққида бўлишига мустаҳкам кафолат беради. Ўзбекистоннинг Ибн Сино, Форобий, Беруний, Улуғбек каби олимлари, Имом Бухорий, Термизий, Мотуридий каби улуғ дин пешволари, Амир Темур ва Бобур каби буюк саркардалари, Алишер Навоий каби шеърият усталари ва бошқа кўзга кўринган тарихий шахслари башарият тарихига беқиёс ҳисса қўшиб, исломнинг улуғ маданий-маънавий меросини бойитганлар, шунингдек, Европа уйғониш даврига туртки берганлар.
Аллоҳга шукрки, ислом олами учун туганмас хазинага эга бўлган биродар Ўзбекистон ўзининг қудратли сиёсий етакчиси бошчилигида тарихий-маънавий миссиясини муваффақиятли давом эттирмоқда.
Бой тарихий ва маънавий меросга асосланиб, Ўзбекистон билан бўлган маданий-маънавий алоқаларни сақлаш ва ривожлантириш Озарбайжон учун ҳам ҳар доим катта аҳамиятга эга бўлиб келган. Бугунги кунда Президентимиз Илҳом Алиев ва Ўзбекистон Президенти Шавкат Мирзиёев ўртасидаги биродарлик ришталари халқларимиз ва давлатларимиз ўртасидаги ҳамкорликни янада юксалтиришга, жумладан, маънавий соҳалардаги алоқаларнинг ривожланишига улкан туртки бермоқда.
Бир хил этник илдизларга, ўхшаш тарих ва менталитетга эга бўлган қардош халқларимиз ўртасидаги ҳамкорликнинг янги сифат босқичига кўтарилишини, Озарбайжон ва Ўзбекистон ўртасидаги Иттифоқчилик қарорини беқиёс фахр ва ифтихор манбаи деб ҳисоблаймиз. Қорабоғ заминида Ўзбекистон томонидан қуриб берилган Мирзо Улуғбек номидаги ўрта мактабнинг нафис ва муҳташам биноси ўзбек халқининг қардош совғаси сифатида Озарбайжон халқи учун ниҳоятда азиздир.
Ислом оламининг ажралмас қисми бўлган, миллий ва маънавий қадриятларига содиқ дунёвий, намунавий давлат моделлари бўлган Ўзбекистон ва Озарбайжоннинг доно, глобал тафаккурга эга давлат етакчиларининг бу йўналишда, шунингдек, муқаддас ислом динининг инсонпарварлик моҳиятини дунё миқёсида танитиш, унинг қадриятларини ҳимоя қилиш ва исломофобияга қарши курашишдаги алоҳида ўрни бор. Озарбайжон Президенти Илҳом Алиевнинг 2017 йилни “Ислом ҳамжиҳатлиги йили” деб эълон қилиш қарорини Президент Шавкат Мирзиёев Ислом олами учун зарур деб баҳолаган ва Тошкентда “Ўзбекистон ва Озарбайжон мисолида Ислом ҳамжиҳатлиги” халқаро конференциясини ўтказишимизга ўз хайр-дуосини берган эди. Президент Шавкат Мирзиёевнинг Ислом цивилизацияси марказини барпо этиши дин, илм ва замонавийликнинг уйғунлашган бирлиги рамзи ва ривожини ифодалайди.
Бугунги нуфузли тадбирни ўтказиш қарорини Шавкат Мирзиёев БМТ Бош Ассамблеясининг юксак минбаридан баён қилган эдилар. Шукрки, Президентнинг глобал ғоя ва ташаббуси ўз самарасини бермоқда ва ислом динининг гуманистик моҳиятини юксак даражада тақдим этиш нуқтаи назаридан муҳим форум Ўзбекистон мезбонлигида амалга ошмоқда.
Ушбу нуфузли конференцияда Ислом оламининг машҳур, обрўли диний ва жамоат арбоблари иштирок этмоқда. Ишончим комилки, Тошкент форуми Ислом оламининг манфаатларини ҳимоя қилиш ва юқори даражада тақдим этиш йўлида ўзига хос ҳисса қўшади. Қардош Ўзбекистон атеизм ҳукмрон бўлган даврда ислом нурини ўчирмаган маёқ ролини бажарган. Советлар Иттифоқи даврида бу нурга эргашиб, 500 йиллик тарихга эга бўлган Мир Араб мадрасасига, Тошкент Ислом Академиясига юзланган авлод вакили сифатида, ўз ватаним Ўзбекистоннинг бугунги кунда ҳам бу миссияни давом эттираётганидан фахрланаман.
Яна бир бор Ўзбекистон Республикаси Президенти Шавкат Мирзиёевнинг Ўзбекистон халқи ва давлатининг ривожи ҳамда Ислом оламининг юксалиши йўлида олиб бораётган эзгу фаолиятларига Аллоҳдан барака тилайман. Парвардигор давлатларимизни, Озарбайжон-Ўзбекистон иттифоқини, халқларимизни ва доно давлат раҳбарларимизни ҳимоя қилсин! Аллоҳ Таоло Ислом оламини, мусулмон умматини доимо улуғда барқарор қилсин, ер юзида тинчлик ҳукмрон бўлсин!
Н.Усмонова,
manba: ЎзА
***
Poytaxtimizda tashkil etilgan “Islom – tinchlik va ezgulik dini” mavzusidagi xalqaro nufuzli konferensiya qizg‘in suhbatlarga, o‘zaro fikr almashinuvlarga boy bo‘lmoqda. Unda islom dinining tinchlikparvar g‘oyalari xususida batafsil so‘z yuritilmoqda. Mazkur xalqaro konferensiya islomning ezgu g‘oyalarini targ‘ib etishda olimlarning yakdil, hamjihat bo‘lishlariga chorlayotgani bilan ham ahamiyatli.
Kavkaz musulmonlari idorasi raisi, muftiy Shayxul islom Allohshukur Poshozoda bu nufuzli konferensiya haqida fikrlarini bildirdi:
– O‘zbekiston Respublikasi Prezidenti Shavkat Mirziyoyev davlat qurilishida shunday ulug‘vor merosga, boy ma’naviy manba va chuqur mazmunli asosga tayanadiki, bu yutuqlar o‘z nomini tarixga zarhal harflar bilan yozdirib, O‘zbekistonning asrlar davomida cho‘qqida bo‘lishiga mustahkam kafolat beradi. O‘zbekistonning Ibn Sino, Forobiy, Beruniy, Ulug‘bek kabi olimlari, Imom Buxoriy, Termiziy, Moturidiy kabi ulug‘ din peshvolari, Amir Temur va Bobur kabi buyuk sarkardalari, Alisher Navoiy kabi she’riyat ustalari va boshqa ko‘zga ko‘ringan tarixiy shaxslari bashariyat tarixiga beqiyos hissa qo‘shib, islomning ulug‘ madaniy-ma’naviy merosini boyitganlar, shuningdek, Yevropa uyg‘onish davriga turtki berganlar.
Allohga shukrki, islom olami uchun tuganmas xazinaga ega bo‘lgan birodar O‘zbekiston o‘zining qudratli siyosiy yetakchisi boshchiligida tarixiy-ma’naviy missiyasini muvaffaqiyatli davom ettirmoqda.
Boy tarixiy va ma’naviy merosga asoslanib, O‘zbekiston bilan bo‘lgan madaniy-ma’naviy aloqalarni saqlash va rivojlantirish Ozarbayjon uchun ham har doim katta ahamiyatga ega bo‘lib kelgan. Bugungi kunda Prezidentimiz Ilhom Aliyev va O‘zbekiston Prezidenti Shavkat Mirziyoyev o‘rtasidagi birodarlik rishtalari xalqlarimiz va davlatlarimiz o‘rtasidagi hamkorlikni yanada yuksaltirishga, jumladan, ma’naviy sohalardagi aloqalarning rivojlanishiga ulkan turtki bermoqda.
Bir xil etnik ildizlarga, o‘xshash tarix va mentalitetga ega bo‘lgan qardosh xalqlarimiz o‘rtasidagi hamkorlikning yangi sifat bosqichiga ko‘tarilishini, Ozarbayjon va O‘zbekiston o‘rtasidagi Ittifoqchilik qarorini beqiyos faxr va iftixor manbai deb hisoblaymiz. Qorabog‘ zaminida O‘zbekiston tomonidan qurib berilgan Mirzo Ulug‘bek nomidagi o‘rta maktabning nafis va muhtasham binosi o‘zbek xalqining qardosh sovg‘asi sifatida Ozarbayjon xalqi uchun nihoyatda azizdir.
Islom olamining ajralmas qismi bo‘lgan, milliy va ma’naviy qadriyatlariga sodiq dunyoviy, namunaviy davlat modellari bo‘lgan O‘zbekiston va Ozarbayjonning dono, global tafakkurga ega davlat yetakchilarining bu yo‘nalishda, shuningdek, muqaddas islom dinining insonparvarlik mohiyatini dunyo miqyosida tanitish, uning qadriyatlarini himoya qilish va islomofobiyaga qarshi kurashishdagi alohida o‘rni bor. Ozarbayjon Prezidenti Ilhom Aliyevning 2017 yilni “Islom hamjihatligi yili” deb e’lon qilish qarorini Prezident Shavkat Mirziyoyev Islom olami uchun zarur deb baholagan va Toshkentda “O‘zbekiston va Ozarbayjon misolida Islom hamjihatligi” xalqaro konferensiyasini o‘tkazishimizga o‘z xayr-duosini bergan edi. Prezident Shavkat Mirziyoyevning Islom sivilizatsiyasi markazini barpo etishi din, ilm va zamonaviylikning uyg‘unlashgan birligi ramzi va rivojini ifodalaydi.
Bugungi nufuzli tadbirni o‘tkazish qarorini Shavkat Mirziyoyev BMT Bosh Assambleyasining yuksak minbaridan bayon qilgan edilar. Shukrki, Prezidentning global g‘oya va tashabbusi o‘z samarasini bermoqda va islom dinining gumanistik mohiyatini yuksak darajada taqdim etish nuqtayi nazaridan muhim forum O‘zbekiston mezbonligida amalga oshmoqda.
Ushbu nufuzli konferensiyada Islom olamining mashhur, obro‘li diniy va jamoat arboblari ishtirok etmoqda. Ishonchim komilki, Toshkent forumi Islom olamining manfaatlarini himoya qilish va yuqori darajada taqdim etish yo‘lida o‘ziga xos hissa qo‘shadi. Qardosh O‘zbekiston ateizm hukmron bo‘lgan davrda islom nurini o‘chirmagan mayoq rolini bajargan. Sovetlar Ittifoqi davrida bu nurga ergashib, 500 yillik tarixga ega bo‘lgan Mir Arab madrasasiga, Toshkent Islom Akademiyasiga yuzlangan avlod vakili sifatida, o‘z vatanim O‘zbekistonning bugungi kunda ham bu missiyani davom ettirayotganidan faxrlanaman.
Yana bir bor O‘zbekiston Respublikasi Prezidenti Shavkat Mirziyoyevning O‘zbekiston xalqi va davlatining rivoji hamda Islom olamining yuksalishi yo‘lida olib borayotgan ezgu faoliyatlariga Allohdan baraka tilayman. Parvardigor davlatlarimizni, Ozarbayjon-O‘zbekiston ittifoqini, xalqlarimizni va dono davlat rahbarlarimizni himoya qilsin! Alloh Taolo Islom olamini, musulmon ummatini doimo ulug‘da barqaror qilsin, yer yuzida tinchlik hukmron bo‘lsin!
N.Usmonova,
manba: O‘zA
