Шайх Юсуфхон Тўра Шокиров — илм ва маърифат фидойиси
Термиз шаҳридаги “Имом Термизий” ўрта махсус ислом таълим муассасасида таниқли уламо Шайх Юсуфхон тўра Шокиров таваллудининг 100 йиллигига бағишланган маънавий-маърифий тадбирлар бўлиб ўтмоқда.
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ташаббуслари билан диний соҳада кўп йиллар хизмат қилган уламолар хотирасига бағишланган тадбирлар ўтказилмоқда. Шундай тадбирлардан бири — “Илм ва маърифатга бағишланган умр” мавзусида “Имом Термизий” таълим муассасасида ташкил этилди.
Тадбирда таълим муассасаси раҳбарияти, устозлар ва талабалар иштирок этиб, Шайх Юсуфхон тўра Шокировнинг ҳаёт йўли ва илмий мероси ҳақида сўз юритдилар. Уламонинг дин равнақи ва халқ маърифати йўлидаги фидокорона хизматлари ёдга олиниб, илмий фаолияти ва қолдирган бой маънавий хазинасининг бугунги кун ёшлари учун аҳамияти таъкидланди.
Тадбир давомида нотиқлар Шайх Юсуфхон тўранинг олимлик ва инсонийлик фазилатлари талабалар учун ҳақиқий ибрат мактаби эканини эътироф этдилар.
Шунингдек, таълим муассасасининг расмий ижтимоий тармоқларида “Шайх Юсуфхон тўра Шокиров — илм ва маърифат фидойиси” сарлавҳали кенг қамровли илмий мақола чоп этилди. Унда алломанинг сермаҳсул ижоди ва Ўзбекистон мусулмонлари идораси тизимидаги кўп йиллик фаолияти таҳлил қилинган.
Бу каби тадбирлар аждодлар хотирасини эъзозлаш ва келажак авлодни миллий-диний қадриятларимизга содиқ руҳда тарбиялашда муҳим аҳамият касб этади.
***
Termiz shahridagi “Imom Termiziy” o‘rta maxsus islom ta’lim muassasasida taniqli ulamo Shayx Yusufxon to‘ra Shokirov tavalludining 100 yilligiga bag‘ishlangan ma’naviy-ma’rifiy tadbirlar bo‘lib o‘tmoqda.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari tashabbuslari bilan diniy sohada ko‘p yillar xizmat qilgan ulamolar xotirasiga bag‘ishlangan tadbirlar o‘tkazilmoqda. Shunday tadbirlardan biri — “Ilm va ma’rifatga bag‘ishlangan umr” mavzusida “Imom Termiziy” ta’lim muassasasida tashkil etildi.
Tadbirda ta’lim muassasasi rahbariyati, ustozlar va talabalar ishtirok etib, Shayx Yusufxon to‘ra Shokirovning hayot yo‘li va ilmiy merosi haqida so‘z yuritdilar. Ulamoning din ravnaqi va xalq ma’rifati yo‘lidagi fidokorona xizmatlari yodga olinib, ilmiy faoliyati va qoldirgan boy ma’naviy xazinasining bugungi kun yoshlari uchun ahamiyati ta’kidlandi.
Tadbir davomida notiqlar Shayx Yusufxon to‘raning olimlik va insoniylik fazilatlari talabalar uchun haqiqiy ibrat maktabi ekanini e’tirof etdilar.
Shuningdek, ta’lim muassasasining rasmiy ijtimoiy tarmoqlarida “Shayx Yusufxon to‘ra Shokirov — ilm va ma’rifat fidoyisi” sarlavhali keng qamrovli ilmiy maqola chop etildi. Unda allomaning sermahsul ijodi va O‘zbekiston musulmonlari idorasi tizimidagi ko‘p yillik faoliyati tahlil qilingan.
Bu kabi tadbirlar ajdodlar xotirasini e’zozlash va kelajak avlodni milliy-diniy qadriyatlarimizga sodiq ruhda tarbiyalashda muhim ahamiyat kasb etadi.
