Юртимизда миллий ва диний қадриятларни асраш, мўмин-мусулмонларнинг ибодатларини эркин ва бемалол адо этишлари учун кенг кўламли ишлар изчил давом этмоқда. Айниқса, масжидларни замонавий талаблар асосида қайта таъмирлаш ва реконструкция қилиш борасида амалга оширилаётган ишлар халқимиз маънавий ҳаётини янада бойитишга хизмат қилмоқда.
Шу муносабат билан Қўштепа туманида жойлашган «Салмони Форсий» жоме масжидининг тубдан қайта қурилиб, фойдаланишга топширилишига бағишланган маросим бўлиб ўтди. Тадбирда вилоят бош имом-хатиби Убайдуллоҳ домла Абдуллаев, туман фаоллари, нуронийлар, диний соҳа вакиллари ҳамда кенг жамоатчилик иштирок этди.
Маросим давомида таъкидланганидек, вилоят маркази ҳамда пойтахт томон йўналишидаги асосий автомобиль йўли бўйлаб, Катта Болтакўл маҳалласида жойлашган ушбу масжид ҳозирги кунда нафақат маҳаллий аҳоли, балки йўловчилар учун ҳам қулай бўлмоқда.
Қайд этилишича, масжид қурилиши ва ободончилигида маҳаллий аҳоли, саховатпеша тадбиркорлар ҳамда ҳомийлар фаол иштирок этган. Уларнинг хайру эҳсон ва фидокорона меҳнати самараси ўлароқ, масжид замонавий инфратузилма, қулай ибодат шарт-шароитлари билан таъминланди. Бу эса юртимиздаги диний-маърифий соҳадаги ислоҳотлар натижаси, шунингдек, инсон қадрини юксалтиришга қаратилаётган эътибордан нишона экани айтилди.
Тадбир сўнгида юртимиз тинчлиги, халқимиз фаровонлиги ва масжидларимиз доимо обод бўлишини тилаб дуолар қилинди. Янгиланган «Салмони Форсий» жоме масжиди бугундан эътиборан аҳолининг маънавий-маърифий ҳаётида муҳим ўрин эгаллаб, эзгу ишларга хизмат қилишига ишонч билдирилди.
***
Yurtimizda milliy va diniy qadriyatlarni asrash, mo‘min-musulmonlarning ibodatlarini erkin va bemalol ado etishlari uchun keng ko‘lamli ishlar izchil davom etmoqda. Ayniqsa, masjidlarni zamonaviy talablar asosida qayta ta’mirlash va rekonstruksiya qilish borasida amalga oshirilayotgan ishlar xalqimiz ma’naviy hayotini yanada boyitishga xizmat qilmoqda.
Shu munosabat bilan Qo‘shtepa tumanida joylashgan «Salmoni Forsiy» jome masjidining tubdan qayta qurilib, foydalanishga topshirilishiga bag‘ishlangan marosim bo‘lib o‘tdi. Tadbirda viloyat bosh imom-xatibi Ubaydulloh domla Abdullayev, tuman faollari, nuroniylar, diniy soha vakillari hamda keng jamoatchilik ishtirok etdi.
Marosim davomida ta’kidlanganidek, viloyat markazi hamda poytaxt tomon yo‘nalishidagi asosiy avtomobil yo‘li bo‘ylab, Katta Boltako‘l mahallasida joylashgan ushbu masjid hozirgi kunda nafaqat mahalliy aholi, balki yo‘lovchilar uchun ham qulay bo‘lmoqda.
Qayd etilishicha, masjid qurilishi va obodonchiligida mahalliy aholi, saxovatpesha tadbirkorlar hamda homiylar faol ishtirok etgan. Ularning xayru ehson va fidokorona mehnati samarasi o‘laroq, masjid zamonaviy infratuzilma, qulay ibodat shart-sharoitlari bilan ta’minlandi. Bu esa yurtimizdagi diniy-ma’rifiy sohadagi islohotlar natijasi, shuningdek, inson qadrini yuksaltirishga qaratilayotgan e’tibordan nishona ekani aytildi.
Tadbir so‘ngida yurtimiz tinchligi, xalqimiz farovonligi va masjidlarimiz doimo obod bo‘lishini tilab duolar qilindi. Yangilangan «Salmoni Forsiy» jome masjidi bugundan e’tiboran aholining ma’naviy-ma’rifiy hayotida muhim o‘rin egallab, ezgu ishlarga xizmat qilishiga ishonch bildirildi.
