Рамазон ҳайити Фарғона вилоятида ҳам катта шодиёна билан нишонланмоқда. Шаҳар ва туманлардаги 194 та жоме масжидида ҳайит намози ўқилди.
Хусусан, бугун эрта тонгдан Фарғона шаҳридаги “Тоййиба” жоме масжиди юртдошларимиз билан гавжум бўлди. Бу ерда ҳайит намозини адо этиш учун йиғилган намозхонларга қулайлик яратиш мақсадида барча зарурий ишлар амалга оширилди. Масжидга туташ кўчалар вақтинча ёпилиб, намозхонлар учун жойлар ажратилди.
Масжидда Ҳайит намозига йиғилган барча мусулмонлар ушбу қутлуғ ва муқаддас байрам билан қутланиб, тинч ва осуда юртда яшаётганимиз, хотиржам ибодатлар қилаётганимиз учун яратганга шукроналар айтилди.
Ҳайит байрами арафасида “Вақф” хайрия фонди, шунингдек, ташаббускор ҳомийлар томонидан кам таъминланган, боқувчисини йўқотган оилалар ва ижтимоий ҳимояга муҳтож шахсларга, Иккинчи жаҳон уруши қатнашчилари, меҳнат фахрийларига ёрдам кўрсатилди. “Мурувват”, Саховат уйларида хайрия тадбирлари амалга оширилди.
Шунингдек, муқаддас қадамжо ҳамда қабристонлар ободонлаштирилди.
М.Сулаймонов, ЎзА мухбири
М.Қодиров олган сурат
* * *
Ramazon hayiti Farg‘ona viloyatida ham katta shodiyona bilan nishonlanmoqda. Shahar va tumanlardagi 194 ta jome masjidida hayit namozi o‘qildi.
Xususan, bugun erta tongdan Farg‘ona shahridagi “Toyyiba” jome masjidi yurtdoshlarimiz bilan gavjum bo‘ldi. Bu yerda hayit namozini ado etish uchun yig‘ilgan namozxonlarga qulaylik yaratish maqsadida barcha zaruriy ishlar amalga oshirildi. Masjidga tutash ko‘chalar vaqtincha yopilib, namozxonlar uchun joylar ajratildi.
Masjidda Hayit namoziga yig‘ilgan barcha musulmonlar ushbu qutlug‘ va muqaddas bayram bilan qutlanib, tinch va osuda yurtda yashayotganimiz, xotirjam ibodatlar qilayotganimiz uchun yaratganga shukronalar aytildi.
Hayit bayrami arafasida “Vaqf” xayriya fondi, shuningdek, tashabbuskor homiylar tomonidan kam ta’minlangan, boquvchisini yo‘qotgan oilalar va ijtimoiy himoyaga muhtoj shaxslarga, Ikkinchi jahon urushi qatnashchilari, mehnat faxriylariga yordam ko‘rsatildi. “Muruvvat”, Saxovat uylarida xayriya tadbirlari amalga oshirildi.
Shuningdek, muqaddas qadamjo hamda qabristonlar obodonlashtirildi.
M.Sulaymonov, O‘zA muxbiri
M.Qodirov olgan surat
